ସାମ୍ନାକୁ ଆସିଲା ସତୀଶ କୌଶିକଙ୍କ ଶେଷକଥା । ଅନ୍ତିମ ମୁହୂର୍ତ୍ତରେ ମ୍ୟାନେଜରଙ୍କୁ କହିଥିଲେ, ମୁଁ ମରିବାକୁ ଚାହୁଁନି, ଝିଅ ପାଇଁ ବଞ୍ଚିବାକୁ ଚାହେଁ ।
କନକ ବ୍ୟୁରୋ: ହସଖୁସି ମିଜାଜରେ ରହୁଥିବା ମଣିଷଟିଏ ଯେତେବେଳେ ଚାଲିଯାଏ, ସେତେବେଳେ ସେଇ ମଣିଷକୁ ସମସ୍ତେ ଝୁରନ୍ତି । ଠିକ୍ ସେଭଳି ଜଣେ ମଣିଷ ଥିଲେ, ବଲିଉଡର କଳାକାର ତଥା ନିର୍ଦ୍ଦେଶକ ସତୀଶ କୌଶିକ୍ । ସତୀଶଙ୍କ ମୃତ୍ୟୁକୁ ନେଇ ସନ୍ଦେହ ବଢୁଥିବା ବେଳେ ସେ କାଳରାତ୍ରୀର କାହାଣୀ ସାମ୍ନାକୁ ଆସିଛି । ମୃତ୍ୟୁ ସମୟରେ ସତୀଶଙ୍କ ସହ ଥିବା ତାଙ୍କ ମ୍ୟାନେଜର ସେଦିନ କ’ଣ ସବୁ ଘଟିଥିଲା, ଗୋଟି ଗୋଟି କରି ବୟାନ କରିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ସତୀଶଙ୍କ ମ୍ୟାନେଜର ସନ୍ତୋଷ ରାୟ ସେଦିନ ତାଙ୍କ ସହ ସେହି ହୋଟେଲରେ ଥିଲେ ଯେଉଁଠି ସତୀଶ ରାୟ ରାତ୍ରୀ ଯାପନ କରିଥିଲେ । ସନ୍ତେଷ ରାୟଙ୍କ ବୟାନ ଅନୁସାରେ, ସେ ଦିନ ସତୀଶ କହିଥିଲେ, ଆଜି ଶୀଘ୍ର ଶୋଇଯିବା । କାରଣ ସକାଳୁ ମୁମ୍ବାଇ ଯିବା ପାଇଁ ବିମାନ ଧରିବାକୁ ହେବ । ଏଭଳି କହି ରୁମରେ ଶୋଇଯାଇଥିଲେ ସତୀଶ । ପାଖ ରୁମକୁ ଚାଲିଯାଇଥିଲେ ତାଙ୍କ ମ୍ୟାନେଜର । କିନ୍ତୁ ରାତି ଠିକ୍ ୧୨ଟା ବେଳେ ଜୋରଜୋରରେ ତାଙ୍କୁ ଡାକିଥିଲେ । ରାତିରେ ସତୀଶଙ୍କ ଡାକ ଶୁଣି ଚମକି ପଡ଼ିଲେ ସନ୍ତୋଷ । ତୁରନ୍ତ, ତାଙ୍କ ରୁମକୁ ଯାଇ ଦେଖିଲା ବେଳେକୁ ସତୀଶ ଯନ୍ତ୍ରଣାରେ ଛଟପଟ ହେଉଥିଲେ । ସେ ନିଶ୍ୱାସ ନେବାର ସମସ୍ୟା ହେଉଥିଲା ।
ନିଜ ମ୍ୟାନେଜରଙ୍କୁ ସତୀଶ କହିଥିଲେ ମୋତେ ତୁରନ୍ତ ହସ୍ପିଟାଲ ନେଇଚାଲ । ମୁଁ ମରିବାକୁ ଚାହୁୁଁନି । ମୋ ଝିଅ ପାଇଁ ବଞ୍ଚିବାକୁ ଚାହୁଁଛି । ତୁରନ୍ତ ହସ୍ପିଟାଲ ନେଇଯିବାର ବ୍ୟବସ୍ଥା କରିଥିଲେ ମ୍ୟାନେଜର । କିନ୍ତୁ ରାସ୍ତାରେ ଛାତିରେ ଯନ୍ତ୍ରଣା ଆରମ୍ଭ ହୋଇଥିଲା । କିଛି ସମୟ ପରେ ଏହି ଯନ୍ତ୍ରଣା ବଢ଼ିବାରେ ଲାଗିଥିଲା । ସେଠୁ ମ୍ୟାନେଜରଙ୍କୁ କହିଥିଲେ ଶୀଘ୍ର ଚାଲ । ସନ୍ତୋଷଙ୍କୁ କହିଥିଲେ ମୁଁ ଏଭଳି ସ୍ଥିତିରେ ମରିଯିବିନି ତ? ବହୁତ ଡରିଯାଇଥିଲେ ସତୀଶ । ହସ୍ପିଟାଲକୁ ପହଞ୍ଚିବା ପୂର୍ବରୁ ସମ୍ପୂର୍ଣ୍ଣ ନିସ୍ତେଜ ହୋଇଯାଇଥିଲେ ସତୀଶ କୌଶିକ୍ । ଡାକ୍ତର କହିଥିଲେ ସ୍ଥିତି ଗମ୍ଭୀର ରହିଛି । ପରିବାର ଲୋକଙ୍କୁ ସୂଚନା ଦେଇଦେବା ଭଲ । ତୁରନ୍ତ, ସତୀଶଙ୍କ ଭଉଣୀଙ୍କୁ ଫୋନ କରିଥିଲେ । ତାଙ୍କ ଭଉଣୀ ଦିଲ୍ଲୀରେ ରହୁଥିବାରୁ ତାଙ୍କୁ ଫୋନ୍ କରିଥିଲେ । କିନ୍ତୁ ଶେଷରେ ଆଖି ବୁଜିଦେଇଥିଲେ ସତୀଶ । ସତୀଶଙ୍କ ମ୍ୟାନେଜର ସନ୍ତୋଷ ରାୟ ଏନେଇ ଏକ ଜାତୀୟ ଗଣମାଧ୍ୟମକୁ ସାକ୍ଷାତକାର ଦେଇ ପୁରା କାହାଣୀ ବର୍ଣ୍ଣନା କରିଛନ୍ତି ।
ଅନ୍ୟପଟେ ବଲିଉଡ଼ ଅଭିନେତା ତଥା ନିର୍ଦ୍ଦେଶକ ସତୀଶ କୌଶିକଙ୍କ ମୃତ୍ୟୁ ଘଟଣାକୁ ନେଇ ବଢ଼ୁଛି ସସପେନ୍ସ । ମୃତ୍ୟୁ ପୂର୍ବରୁ ସତୀଶଙ୍କ ସହ ଫାର୍ମହାଉସରେ ହୋଲି ଖେଳିଥିବା ସତୀଶଙ୍କ ବନ୍ଧୁ ବିକାଶ ମାଲୁଙ୍କ ପୂର୍ବତନ ପତ୍ନୀଙ୍କୁ ବୟାନ ରେକର୍ଡ଼ ପାଇଁ ପୋଲିସ ଡ଼କାଇଛି । ବିକାଶ ମାଲୁଙ୍କ ପୂର୍ବତନ ପତ୍ନୀ କହିଛନ୍ତି, ସତୀଶଙ୍କୁ ହତ୍ୟା କରାଯାଇଛି । ତାହା ପୁଣି ୧୫ କୋଟି ପାଇଁ । ତାଙ୍କ ସ୍ୱାମୀ ବିକାଶ ମାଲୁ ହିଁ ସତୀଶଙ୍କୁ ୧୫ କୋଟି ଟଙ୍କା ପାଇଁ ହତ୍ୟା କରିଛନ୍ତି । ତେବେ ବ୍ୟବସାୟ କ୍ଷେତ୍ରରେ ବିକାଶ ସତୀଶଙ୍କ ଠାରୁ ଟଙ୍କା ନେଇଥିଲେ । ପରେ ଏହାକୁ ଫେରାଇବା ତାଙ୍କ ପକ୍ଷେ ସମ୍ଭବ ନ ହେବାରୁ ବିକାଶ ସତୀଶଙ୍କୁ ହତ୍ୟା କରିଥିବା ସେ ଅଭିଯୋଗ ଆଣିଛନ୍ତି । ଅନ୍ୟପଟେ ବିକାଶ ମାଲୁ ଏହାପରେ ପ୍ରତିକ୍ରିୟା ରଖିଛନ୍ତି । ସତୀଶ ତାଙ୍କର ଜଣେ ପରିବାରର ସଦସ୍ୟ ଭଳିଥିଲେ ବୋଲି ବିକାଶ ମାଲୁ ସୋସିଆଲ ମିଡ଼ିଆରେ ସେୟାର କରିଛନ୍ତି । ଯେଉଁ ଫାର୍ମ ହାଉସରେ ସେ ସାଙ୍ଗମାନଙ୍କ ସହ ହୋଲି ପାର୍ଟି ମନାଉଥିଲେ, ସେଠାରୁ ତଦନ୍ତକାରୀ ପୁଲିସ କିଛି ଆପତ୍ତିଜନକ ଔଷଧ ପାଇବା ପରେ ଏନେଇ ତଦନ୍ତ ବଢ଼ାଇଛି । ଅନ୍ୟପଟେ ସତୀଶଙ୍କ ପୋଷ୍ଟମର୍ଟମ ରିପୋର୍ଟକୁ ଅପେକ୍ଷା କରିଛି ପୁଲିସ ।