କାଲିଠୁ ୱେଷ୍ଟଇଣ୍ଡିଜ୍ ବିପକ୍ଷ ସିରିଜ୍ । ଟିମ୍ ଇଣ୍ଡିଆରେ ହେବ କି ପରିବର୍ତ୍ତନ? ପଢନ୍ତୁ, କଣ କହିଲେ ରୋହିତ ଶର୍ମା…
କନକ ବ୍ୟୁରୋ: ଆସନ୍ତାକାଲିଠାରୁ ଆରମ୍ଭ ହେବାକୁ ଯାଉଛି ଭାରତ-ୱେଷ୍ଟଇଣ୍ଡିଜ୍ କ୍ରିକେଟ୍ ସିରିଜ୍ । ଯାହାକି ଭାରତର ୧୦୦୦ ତମ ଦିନିକିଆ ମ୍ୟାଚ୍ ହେବ । ଏହି ମ୍ୟାଚ୍ ସହ ରୋହିତ ଶର୍ମା ମଧ୍ୟ ଏକ ନୂଆ ଇଂନିସ ଆରମ୍ଭ କରିବାକୁ ଯାଉଛନ୍ତି । ଫୁଲ୍ ଟାଇମ୍ କ୍ୟାପଟେନ୍ ହେବା ପରେ, ପ୍ରଥମ କରି ସେ ଦଳର ନେତୃତ୍ୱ ଭାର ସମ୍ଭାଳିବେ । ତେଣୁ ମ୍ୟାଚ୍ ପୂର୍ବରୁ ଅନୁଷ୍ଠିତ ହୋଇଥିବା ସାମ୍ବାଦିକ ସମ୍ମିଳନୀରେ ସେ ଦଳର ଆଗାମୀ ଗେମ୍ ପ୍ଲାନକୁ ପ୍ରତିକ୍ରିୟା ରଖିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଟିମ୍ ଇଣ୍ଡିଆରେ ହେବ କି ପରିବର୍ତ୍ତନ?
ସାମ୍ବାଦିକଙ୍କ ଏଭଳି ପ୍ରଶ୍ନରେ ଉତ୍ତର ଦେଇ ରୋହିତ କହିଛନ୍ତି, ଦଳରେ ସେଭଳି କୌଣସି ବଡ ପରିବର୍ତ୍ତନର ଆବଶ୍ୟକତା ନାହିଁ । କେବଳ ପରିସ୍ଥିତି ଅନୁସାରେ କିଛି ପରିବର୍ତ୍ତନ ହେବ । ପୂର୍ବରୁ ଆମେ ଭଲ କ୍ରିକେଟ୍ ଖେଳିଛେ, ତେଣୁ ଗୋଟିଏ ସିରିଜ ହାରିବା ପରେ ଦଳରେ ସେଭଳି କୌଣସି ବଡ ପରିବର୍ତ୍ତନ ହେବନାହିଁ । ତେବେ ଦିନିକିଆ କ୍ରିକେଟରେ ଆମର ବିଜୟ ପ୍ରତିଶତ ରହିଛି । ଯଦି ଆଗକୁ ଆମକୁ କିଛି ବି ପରିବର୍ତ୍ତନର ଆବଶ୍ୟକତା ପଡେ, ତେବେ ଦଳରେ ନିଶ୍ଚୟ ପରିବର୍ତ୍ତନ ହେବ ବୋଲି ସେ କହିଛନ୍ତି । ତେବେ ଅନ୍ୟ ଦଳଙ୍କ ଭଳି ଟିମ୍ ଇଣ୍ଡିଆ କେବେ ବି ଖେଳିବନି, ହେଲେ କିଛି ନୂଆ ଓ ଅଲଗା କରିବାକୁ ଦଳ ସବୁବେଳେ ପ୍ରସ୍ତୁତ ବୋଲି ରୋହିତ କହିଛନ୍ତି ।
କୋହଲିଙ୍କର ରହିବ କି ଭୂମିକା?
ଟିମ୍ ଇଣ୍ଡିଆର ଅଧିନାୟକ ପଦରୁ କୋହଲି ହଟିବା ପରେ ଏବେ ସେ ରୋହିତଙ୍କ ନେତୃତ୍ୱ ଅଧୀନରେ ମ୍ୟାଚ୍ ଖେଳିବେ । ତେଣୁ ଏହି ସମୟରେ ତାଙ୍କର ଭୂମିକା କଣ ରହିବ ବୋଲି ରୋହିତଙ୍କୁ ସାମ୍ବାଦିକମାନେ ପ୍ରଶ୍ନ କରିଥିଲେ । ଏହାର ଉତ୍ତର ରଖି ରୋହିତ କହିଥିଲେ, କୋହଲି ଯେଉଁଠାରେ ଛାଡିଛନ୍ତି, ସେ ସେହିଠାରୁ ହିଁ ଆରମ୍ଭ କରିବେ । ସମସ୍ତଙ୍କୁ ନିଜ ନିଜର ଦାୟିତ୍ୱ ଜଣାଅଛି । କେବଳ ଆମକୁ ପରିସ୍ଥିତି ଦେଖି ମ୍ୟାଚ୍ ଖେଳିବାକୁ ପଡିବ ବୋଲି ରୋହିତ କହିଛନ୍ତି ।
ଯୁବ ଖେଳାଳିଙ୍କୁ ମିଳିବ କି ମୌକା?
ଟିମ୍ ଇଣ୍ଡିଆରେ ନିଜ ସ୍ଥାନ ପକ୍କା କରିବା ପାଇଁ ଏବେ ଏକାଧିକ ଖେଳାଳି ରେସରେ ଅଛନ୍ତି । ଏଭଳି ସ୍ଥିତିରେ ଦଳରେ କେଉଁ ଖେଳାଳିଙ୍କୁ ସୁଯୋଗ ମିଳିବ ତାକୁ ନେଇ ମଧ୍ୟ ଚର୍ଚ୍ଚା ହେଉଛି । ତେଣୁ ରୋହିତ କହିଛନ୍ତି, ଯେଉଁ ଖେଳାଳି ଭଲ ପ୍ରଦର୍ଶନ କରିବ ସେ ଦଳରେ ରହିବ । ଏବେ ଶିଖର ଧାୱନ୍, ଋତୁରାଜ ଗାଏକ୍ୱାଡଙ୍କୁ କରୋନା ହୋଇଛି, ତେଣୁ ତାଙ୍କ ବଦଳରେ ଦଳରେ ଇଶାନ କିଷାନଙ୍କୁ ଦଳରେ ସୁଯୋଗ ମିଳିବ । ସେହିପରି ଦଳରେ ଏବେ ଫିନିସରଙ୍କ ଆବଶ୍ୟକତା ରହିଛି ବୋଲି ରୋହିତ କହିଛନ୍ତି । ସୂଚନାଯୋଗ୍ୟ ଯେ, ଭାରତ ଓ ୱେଷ୍ଟଇଣ୍ଡିଜ୍ ମଧ୍ୟରେ ତିନୋଟି ଦିନିକିଆ ଓ ୩ଟି ଟି-୨୦ ସିରିଜ୍ ଖେଳାଯିବାକୁ ଅଛି । ଏହି ସିରିଜରେ ରୋହିତ ଶର୍ମା ଦଳର ନେତୃତ୍ୱ ନେବେ । ଏହାସହ ପ୍ରଥମ କରି ରୋହିତଙ୍କ ନେତୃତ୍ୱରେ ଖେଳିବେ ବିରାଟ କୋହଲି ।