କନକ ବ୍ୟୁରୋ: ଦିଲ୍ଲୀ କଂଗ୍ରେସ ଅଧ୍ୟକ୍ଷ ପଦରୁ ଇସ୍ତଫା ଦେବା ପରେ ବିଜେପିରେ ସାମିଲ ହେଲେ ଅରବିନ୍ଦର ସିଂହ ଲଭଲି । ଦୀର୍ଘ ଦିନର ଚର୍ଚ୍ଚା ଆଲୋଚନା ପରେ ଆଜି ପଦ୍ମ ଶିବିରରେ ସାମିଲ ହେଇଛନ୍ତି ଏହି କଂଗ୍ରେସ ନେତା । ଖାଲି ସେତିକି ନୁହେଁ, ତାଙ୍କ ସହିତ କଂଗ୍ରେସ ନେତା ରାଜକୁମାର ଚୌହାନ, ଅମିତ ମଲିକ, ନସୀବ ସିଂହ ଏବଂ ନୀରଜ ବସୋୟା ମଧ୍ୟ ପଦ୍ମ ଧରିଛନ୍ତି । ଅରବିନ୍ଦର ସିଂହ ଲଭଲି କେନ୍ଦ୍ରମନ୍ତ୍ରୀ ହରଦୀପ ସିଂହ ପୁରୀ, ଦିଲ୍ଲୀ ବିଜେପି ଅଧ୍ୟକ୍ଷ ବୀରେନ୍ଦ୍ର ସଚଦେବା ଏବଂ ପାର୍ଟିର ରାଷ୍ଟ୍ରୀୟ ମହାସଚିବ ବିନୋଦ ତାୱଡେଙ୍କ ଉପସ୍ଥିତିରେ ବିଜେପିରେ ସାମିଲ ହେଇଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ବିନୋଦ ତାୱଡେ କହିଛନ୍ତି, ରାୟବରେଲୀରେ ପ୍ରିୟଙ୍କା ଗାନ୍ଧୀଙ୍କ ପୋଷ୍ଟର ଲାଗିଥିଲା, କଂଗ୍ରେସ କାର୍ଯ୍ୟକର୍ତ୍ତା ଚାହୁଁଥିଲେ କି, ସେଠାରୁ ପ୍ରିୟଙ୍କା ଗାନ୍ଧୀ ନିର୍ବାଚନ ଲଢନ୍ତୁ । ହେଲେ ରାହୁଲ ଗାନ୍ଧୀ କିନ୍ତୁ ରାୟବରେଲୀରୁ ନାମାଙ୍କନ ଦାଖଲ କଲେ । ପିଏମ୍ ମୋଦୀଙ୍କ ନାରା ହେଉଛି ବେଟୀ ବଚାଓ, ବେଟୀ ପଢାଅ । ହେଲେ କଂଗ୍ରେସର ନାରା ହେଉଛି ବେଟା ବେଚାଓ, ବେଟା ବଢାଅ । ଏହିଭଳି ରାଜନୀତିରୁ ବୀତସ୍ପୃହ ହେଇ ଅରବିନ୍ଦର ସିଂହ ଲଭଲି ବିଜେପିରେ ସାମିଲ ହେଇଛନ୍ତି ବୋଲି ସେ କହିଥିଲେ ।
ଅନ୍ୟପଟେ ବିଜେପିରେ ସାମିଲ ହେବା ପରେ ଅରବିନ୍ଦର ସିଂହ ଲଭଲି କହିଛନ୍ତି, ଆପଣ ଜାଣିଛନ୍ତି ମୁଁ କେଉଁଭଳି ପରିସ୍ଥିତିରେ ଦିଲ୍ଲୀ କଂଗ୍ରେସ ଅଧ୍ୟକ୍ଷ ପଦରୁ ଇସ୍ତଫା ଦେଲି । ପଦରୁ ଇସ୍ତଫା ଦେବା ପରେ ମୁଁ ଘରେ ରହିବାକୁ ନିଷ୍ପତ୍ତି ନେଇଥିଲି । ହେଲେ ଆମ ସମର୍ଥକ ମୋତେ ତାହା କରିବାକୁ ମନା କରିଥିଲେ । ତା ସହିତ ଦିଲ୍ଲୀ ପାଇ ଲଢିବାକୁ ତାଙ୍କ ସମର୍ଥକ ତାଙ୍କୁ କହିଥିବା କହିଛନ୍ତି ଅରବିନ୍ଦର ସିଂହ ଲଭଲି ।
ସୂଚନାଯୋଗ୍ୟ ଯେ, କିଛି ଦିନ ତଳେ ଦିଲ୍ଲୀ କଂଗ୍ରେସ ଅଧ୍ୟକ୍ଷ ପଦରୁ ଇସ୍ତଫା ଦେଇଥିଲେ ଅରବିନ୍ଦର ସିଂହ ଲଭଲି । ଏହାପରେ ସେ କେଉଁ ଦଳରେ ସାମିଲ ହେବେ ସେନେଇ ଚର୍ଚ୍ଚା ହେଉଥିଲା । ଆଉ ସବୁ ଚର୍ଚ୍ଚାରେ ପୂର୍ଣ୍ଣଚ୍ଛେଦ ଟାଣି ଶେଷରେ ବିଜେପିରେ ସାମିଲ ହେଇଛନ୍ତି ଅରବିନ୍ଦର ।