ଗଣମାଧ୍ୟମର ଖବରକୁ କେନ୍ଦ୍ର ଗୃହମନ୍ତ୍ରଣାଳୟର ଖଣ୍ଡନ, ରୋହିଙ୍ଗ୍ୟା ଶରଣାର୍ଥୀଙ୍କୁ ଘର ମିଳିବା ଉପରେ କହିଲେ ଏଭଳି କଥା
କନକ ବ୍ୟୁରୋ : ରାଜଧାନୀ ଦିଲ୍ଲୀରେ ରୋହିଙ୍ଗ୍ୟା ଶରଣାର୍ଥୀଙ୍କୁ ଘର ଯୋଗାଇଦେବା ପ୍ରସଙ୍ଗରେ ମିଡିଆରେ ଚାଲିଥିବା ଖବରକୁ ଆଜି କେନ୍ଦ୍ର ଗୃହମନ୍ତ୍ରଣାଳୟ ଖଣ୍ଡନ କରିଛନ୍ତି । ଗୃହମନ୍ତ୍ରଣାଳୟ ସ୍ପଷ୍ଟ କରିଛି କି, ଦିଲ୍ଲୀର ବକ୍କରବାଲାରେ ରୋହିଙ୍ଗ୍ୟା ଶରଣାର୍ଥୀଙ୍କୁ ଇଡବ୍ଲ୍ୟୁଲସ ଫ୍ଲାଟ ପ୍ରଦାନ ପାଇଁ କୌଣସି ନିର୍ଦ୍ଦେଶ ଦିଆଯାଇ ନାହିଁ ।
Kanak News is now on WhatsApp
Join and get latest news updates delivered to you via WhatsApp
କହିରଖୁ କି ଦିଲ୍ଲୀର କେଜ୍ରିୱାଲ ସରକାରଙ୍କ ପକ୍ଷରୁ ରୋହିଙ୍ଗ୍ୟାଙ୍କୁ ଏକ ନୂଆ ସ୍ଥାନକୁ ସ୍ଥାନାନ୍ତରିତ କରିବାକୁ ଏକ ପ୍ରସ୍ତାବ ରଖିଥିଲେ । ଏହା ପରେ ଗୃହମନ୍ତ୍ରଣାଳୟ ଦିଲ୍ଲୀ ସରକାରଙ୍କୁ ଚିଠି ଲେଖି କହିଥିଲେ କି ରୋହିଙ୍ଗ୍ୟା ଶରଣାର୍ଥୀମାନେ ଯେଉଁଠି ଅଛନ୍ତି ଏବେ ସେଇଠି ରହିବେ । ଏହାର କାରଣ ଦର୍ଶା ଯାଇଥିଲା କି ବିଦେଶ ମନ୍ତ୍ରଣାଳୟ ସହାୟତାରେ ଶରଣାର୍ଥୀଙ୍କ ଦେଶସହ ଆଲୋଚନା ଜାରି ରହିଛି । ଶରଣାର୍ଥୀଙ୍କୁ କିଭଳି ସେମାନଙ୍କ ଦେଶକୁ ପଠାଇ ଦିଆଯିବ ତା ଉପରେ ଆଲୋଚନା ଚାଲିଛି ।
ଗୃହମନ୍ତ୍ରଣାଳୟ କହିଛି କି ଅବୈଦ୍ଧ ବିଦେଶୀମାନଙ୍କୁ ଆଇନ ମୁତାବକ ସେମାନଙ୍କ ଦେଶକୁ ଫେରାଇଦେବା ପର୍ଯ୍ୟନ୍ତ ସେମାନଙ୍କୁ ଡିଟେନସନ ସେଣ୍ଟରରେ ରଖାଯିବ । ହେଲେ ସେମାନେ ଏବେ ଯେଉଁ ସ୍ଥାନରେ ରହିଛନ୍ତି ଦିଲ୍ଲୀ ସରକାର ସେହି ସ୍ଥାନକୁ ଡିଟେନସନ ସେଣ୍ଟର ଭାବେ ଘୋଷଣା କରି ନାହାଁନ୍ତି । ଏଣୁ ଗୃହମନ୍ତ୍ରଣାୟ ସେହି ସ୍ଥାନକୁ ତୁରନ୍ତ ଡିଟେନସନ୍ ସେଣ୍ଟର ଭାବେ ଘୋଷିତ କରିବାକୁ ନିର୍ଦ୍ଦେଶ ଦିଆଯାଇଥିବା କଥା କେନ୍ଦ୍ର ଗୃହମନ୍ତ୍ରଣାଳୟ କହିଛି ।