କନକ ବ୍ୟୁରୋ: ଖୋର୍ଦ୍ଧା ଜିଲ୍ଲା ନିଜିଗଡ ତାପଙ୍ଗ ଅଂଚଳରୁ ବେଆଇନ ମାଙ୍କଡା ପଥର ଖଣି ଖନନ ଓ ଜଙ୍ଗଲ ନଷ୍ଟକୁ ନେଇ ଶ୍ରୀମନ୍ଦିର ଉପରେ ୧୨କୋଟି ଟଙ୍କାର ଜରିମାନା କଷିଛି ନେସନାଲ ଗ୍ରୀନ ଟ୍ରିବ୍ୟୁନାଲ । ଅର୍ଥାତ୍ ମହାପ୍ରୁଭୁ ଜଗନ୍ନାଥଙ୍କୁ ଜରିମାନା କରାଯାଇଛି । ଟଙ୍କା ପୈଠ ପାଇଁ ଶ୍ରୀମନ୍ଦିରକୁ କୁହାଯାଇଛି । ଏନେଇ ଶ୍ରୀମନ୍ଦିର ପରିଚାଳନା କମିଟି ବୈଠକରେ ଆଲୋଚନା ହୋଇଛି ।
Kanak News is now on WhatsApp
Join and get latest news updates delivered to you via WhatsApp
ପରିଚାଳନା କମିଟି ବୈଠକ ପରେ ଏନଜିଟି ଛାଟକୁ ନେଇ ଶ୍ରୀମନ୍ଦିର ଉନ୍ନୟନ ପ୍ରଶାସକ ଅଜୟ ଜେନା ପ୍ରତିକ୍ରିୟା ଦେଇଛନ୍ତି । କହିଛନ୍ତି ଏହା ବିରୋଧରେ ଜାତୀୟ ଗ୍ରୀନ ଟ୍ରିବ୍ୟୁନାଲର ହାୟରଫୋରମରେ ଅପିଲ କରିବା ପାଇଁ ନିଷ୍ପତି ନିଆଯାଇଛି । ଦରକାର ପଡିଲେ ଷ୍ଟେ ପାଇଁ ସୁପ୍ରିମକୋର୍ଟରେ ଚାଲେଞ୍ଜ କରିବ ଶ୍ରୀମନ୍ଦିର ପ୍ରଶାସନ । ଏଥିସହ ଉନ୍ନୟନ ପ୍ରଶାସକ କହିଛନ୍ତି ଶ୍ରୀଜଗନ୍ନାଥ କାହିଁକି ଜରିମାନା ଦେବେ? ଯିଏ ଜଗନ୍ନାଥଙ୍କ ଜମିକୁ ବ୍ୟବହାର କରିଛି ସେ ଜରିମାନା ଦେଉ । ଖୋର୍ଦ୍ଧା ଜିଲ୍ଲା ପ୍ରଶାସନ ଏହି ଜରିମାନା ଦାଖଲ କରିବା ପାଇଁ ପୂର୍ବରୁ ସରକାରଙ୍କୁ ଜଣାଇ ଦିଆଯାଇଥିଲେ । ଖୋର୍ଦ୍ଧା ଜିଲ୍ଲା ପ୍ରଶାସନ ନହେଲେ ସରକାର ଏହି କ୍ଷତି ଭରଣା କରନ୍ତୁ ବୋଲି କହିଛି ଶ୍ରୀମନ୍ଦିର ପ୍ରଶାସନ ।
ଖୋର୍ଦ୍ଧା ଜିଲ୍ଲା ନିଜିଗଡ ତାପଙ୍ଗ ପଂଚାୟତରେ ଶ୍ରୀଜଗନ୍ନାଥଙ୍କ ମାଲିକାନାରେ ଥିବା ପାଖାପାଖି ୫ଶହ ଏକର ଜମିରୁ ବେଆଇନ ମାଙ୍କଡା ପଥର ଖନନ କରାଯାଇଥିବା ଅଭିଯୋଗ ହୋଇଛି । ଏନେଇ କୋଲକାତା ସ୍ଥିତ ଏନଜିଟି ଇଷ୍ଟ ଜୋନ ବେଂଚ ମାମଲାର ଶୁଣାଣି କରି ଶ୍ରୀମନ୍ଦିର ପ୍ରଶାସନକୁ ୧୨ କୋଟି ଟଙ୍କାର ଜରିମାନା କରିଛନ୍ତି । ଆଗକୁ ଏସଂପର୍କରେ ଏକ ଉଚ୍ଚସ୍ତରୀୟ ବୈଠକ କରି ପରବର୍ତି ପଦକ୍ଷେପ ନିଆଯିବ ବୋଲି କହିଛି ଶ୍ରୀମନ୍ଦିର ପରିଚାଳନା କମିଟି ।