କନକ ବ୍ୟୁରୋ: ଭଡ଼ାରେ ଲାଗିଛି ରାଜୀବ ଆବାସ । ଯେଉଁ ହିତାଧିକାରୀଙ୍କୁ ରାଜୀବ ଆବାସ ମିଳିଛି, ସେଥିରୁ କିଛି ବାସଗୃହ ଭଡ଼ାରେ ଲାଗିଛି । କିଛି ଘରେ ତାଲା ପଡ଼ିଛି ତ, କିଛି ଖୋଲାମେଲାରେ ରହିଛି । ଏଭଳି ଅଭିଯୋଗ ବହୁ ଦିନରୁ ହେଉଥିବା ବେଳେ ବିଏମସି ପକ୍ଷରୁ ଅତର୍କିତ ଭାବେ ଚଢ଼ଉ କରାଯାଇଛି । ରାଜୀବ ଆବାସ ଯୋଜନା ଅନୁଯାୟୀ ତାଲିକାଭୁକ୍ତ ହିତାଧିକାରୀ ଏଠାରେ ରହୁଛନ୍ତି ନା ସେହି ଘରେ ଅନ୍ୟ କିଏ ରହୁଛନ୍ତି ସେଥିନେଇ ଆରମ୍ଭ ହୋଇଯାଇଛି ଯାଞ୍ଚ । ସହରକୁ ବସ୍ତିମୁକ୍ତ କରିବା ସହ ଦିନ ମଜୁରିଆ ଓ ବାସହୀନଙ୍କୁ ବାସଗୃହ ଯୋଗାଇବା ଲକ୍ଷ୍ୟ ନେଇ କେନ୍ଦ୍ର ସରକାରଙ୍କ ପକ୍ଷରୁ ୨୦୧୭ ମସିହାରେ ଲାଗୁ ହୋଇଥିଲା ରାଜୀବ ଆବାସ ଯୋଜନା ।
Kanak News is now on WhatsApp
Join and get latest news updates delivered to you via WhatsApp
ସେହି ସମୟରେ ଉପଯୁକ୍ତ ହିତାଧିକାରୀ ଚୟନ କରି ତାଲିକା ପ୍ରସ୍ତୁତ କରାଯିବା ସହ ବିଏମସି ପକ୍ଷରୁ ତାଲିକା ଅନୁଯାୟୀ ହିତାଧିକାରୀଙ୍କୁ ବାସଗୃହ ପ୍ରଦାନ କରାଯାଇଥିଲା । ବିଏମସି ପକ୍ଷରୁ ପ୍ରସ୍ତୁତ କରାଯାଇଥିବା ଯୋଗ୍ୟ ତାଲିକାରେ କିଛି ହିତାଧିକାରୀ ସେହି ଆବାସରେ ରହିବାକୁ ପସନ୍ଦ କରୁନାହାନ୍ତି ଅନ୍ୟ କିଛି ହିତାଧିକାରୀ ବାସଗୃହ ହାତେଇ ଭଡ଼ା ଲଗାଇଥିବା ଅଭିଯୋଗ ହୋଇଥିଲା । ବିଏମସି ପକ୍ଷରୁ ଆଇନାବନ୍ଧ ସାହି ରାଜୀବ ଆବାସ ଯୋଜନାରେ ନିର୍ମିତ ବ୍ଲକ ଉପରେ ଚଢ଼ଉ କରାଯାଇଥିଲା । ୧୨୮ଟି ବାସଗୃହ ଯାଞ୍ଚ ବେଳେ ଅଧିକାଂଶ ଘରେ ତାଲା ପଡ଼ିଥିବା ବେଳେ ଅନ୍ୟ କିଛି ବାସଗୃହ ପଡ଼ିଥିଲା ଖାଲି ।