ପୁଣି ସାମନାକୁ ଆସିଲା ପୋଲିସର ଦାଦାଗିରି । ଡ୍ରାଇଭରଙ୍କୁ ପିଟିପିଟି ମାରିଦେଲେ ଦୁଇ ପୋଲିସ କନେଷ୍ଟବଳ
ଦୁଇ କନେଷ୍ଟବଳ ଉତକ୍ଷିପ୍ତ ହୋଇ ଡ୍ରାଇଭର ପ୍ରଦୀପକୁ ଲାଠିରେ ପିଟିଲେ
କନକ ବ୍ୟୁରୋ : ମହାରାଷ୍ଟ୍ରର ସୋଲାପୁର ଜିଲ୍ଲାରେ ଦୁଇଜଣ ପୁଲିସ କନେଷ୍ଟବଳ ଜଣେ ଟ୍ରାକ୍ଟର ଡ୍ରାଇଭରକୁ ପିଟି ପିଟି ମାରି ଦେଇଥିବା ଭଳି ଏକ ଭୟାନକ ଘଟଣା ଆଲୋଡନ ସୃଷ୍ଟି କରିଛି। ମିଳିଥିବା ସୂଚନା ଅନୁଯାୟୀ ଜଣେ ଟ୍ରାକ୍ଟର ଡ୍ରାଇଭର ଅତି ଉଚ୍ଚ ସ୍ୱରରେ ସଙ୍ଗୀତ ବଜାଇ ବଜାଇ ଟ୍ରାକ୍ଟର ଚଳାଉଥିଲେ। ଏହାର ସ୍ୱର ଅତ୍ୟନ୍ତ କର୍କଶ ଥିଲା। ଏହି ଡ୍ରାଇଭରଙ୍କ ନାମ ହେଲା ପ୍ରଦୀପ କୁଟେ। ତାଙ୍କର ବୟସ ୨୮ ବର୍ଷ। ସେ ସନ୍ଧ୍ୟାରେ ନିଜର ଗାଆଁରୁ ଟ୍ରାକ୍ଟରରେ ଚିନି ନେଇ ଯାଉଥିଲେ। ସାନେଗାଓଁ ନିକଟରେ ଥିବା ପୁଲିସ ଫାଣ୍ଡି ପାଖରେ ଡ୍ରାଇଭର ପ୍ରଦୀପକୁ ଦୁଇ ଜଣ ପୋଲିସ କନେଷ୍ଟବଳ ଅଟକାଇଥିଲେ। ଏ ଦୁହିଁଙ୍କ ନାଆଁ ହେଲା ଦଶରଥ କୁମ୍ଭାର ଓ ଦୀପକ କ୍ଷୀର ସାଗର।
Kanak News is now on WhatsApp
Join and get latest news updates delivered to you via WhatsApp
ଦଶରଥ ଓ ଦୀପକ ପ୍ରଦୀପକୁ କାହିଁକି ଏତେ ଜୋର ଆବାଜରେ ଗୀତ ବଜାଉଛ ବୋଲି ପଚାରିଥିଲେ। ଏହାକୁ ନେଇ ସେମାନଙ୍କ ଭିତରେ ବାକ୍ ବିତଣ୍ଡା ହୋଇଥିଲା। ଏହାପରେ ଦୁଇ କନେଷ୍ଟବଳ ଉତକ୍ଷିପ୍ତ ହୋଇ ଡ୍ରାଇଭର ପ୍ରଦୀପକୁ ଲାଠିରେ ପିଟିବାକୁ ଲାଗିଲେ। ଏହାପରେ ପ୍ରଦୀପ ଅଚେତ ହୋଇଗଲା। ଏ ଖବର ପାଇବା ପରେ ପ୍ରଦୀପର ଘରଲୋକେ ନିକଟସ୍ଥ ହସ୍ପିଟାଲକୁ ନେଇଯାଇଥିଲେ। କିନ୍ତୁ ସେଠାରେ ପହଞ୍ଚିବା ପୂର୍ବରୁ ପ୍ରଦୀପର ମୃତ୍ୟୁ ହୋଇସାରିଥିଲା। ଏହାପରେ ଗ୍ରାମବାସୀମାନେ ପ୍ରଦୀପର ଶବକୁ ଧରି ଥାନା ଘେରାଉ କରିଥିଲେ। ତା’ପରେ ବରିଷ୍ଠ ପୁଲିସ ଅଧିକାରୀ ଚାପଗ୍ରସ୍ତ ହୋଇ ଅଭିଯୁକ୍ତ କନେଷ୍ଟବଳ ଦୀପକ ଓ କ୍ଷୀରସାଗରଙ୍କ ବିରୁଦ୍ଧରେ ହତ୍ୟା ମାମଲା ରୁଜୁ କରିଥିବା ଜଣାଯାଇଛି।