ପାଣି ପାଇଁ ଲଢ଼େଇ କରୁଛନ୍ତି ଲୋକେ । ତାତି ବଢିବା ଭିତରେ ରାଜ୍ୟର ବିଭିନ୍ନ ଅଞ୍ଚଳରୁ ଆସିଲା ଜଳକଷ୍ଟର ଚିତ୍ର…
କନକ ବ୍ୟୁରୋ: ପାଣି ପାଇଁ ହାହାକାର । ଅସହ୍ୟ ଗରମ ସାଙ୍ଗକୁ ରାଜ୍ୟର ବିଭିନ୍ନ ସ୍ଥାନରେ ପାନୀୟ ଜଳର ଉକ୍ରଟ ସମସ୍ୟା ଲୋକଙ୍କ ଚିନ୍ତା ବଢ଼ାଇ ଦେଇଛି । ପାଣି ପାଇଁ କିଏ ଜଙ୍ଗଲକୁ ଯାଉଛି ତ, କେଉଁଠି ପାଣି ନେବା ପାଇଁ ଟ୍ୟାଙ୍କର ଆଗରେ ଲାଗିଛି ଲମ୍ବା ଲମ୍ବା ଧାଡ଼ି । ଆଠଗଡ଼ କୁଲାଇଲୋ ପଞ୍ଚାୟତ ତଳଗଡ଼ ଗାଁରେ ଟ୍ୟାଙ୍କର ଆଗରେ ପାଣି ନେବା ପାଇଁ ଲାଗିଛି ମହିଳାଙ୍କ ଭିଡ । ଶୁଦ୍ଧ ପାନୀୟ ଜଳ ଯୋଗାଣ ପାଇଁ ଲକ୍ଷାଧିକ ଟଙ୍କା ବ୍ୟୟରେ ଷ୍ଟାଣ୍ଡ ପୋଷ୍ଟ ନିର୍ମିତ କରାଯାଇଛି, ହେଲେ ପାଣି ଆସୁନି । ତେଣୁ ବୋରୱେଲ କରି ପାନୀୟ ଜଳର ସୁବିଧା ଯୋଗାଇ ଦେବା ପାଇଁ ସାଧାରଣରେ ଦାବି ହୋଇଛି ।
Kanak News is now on WhatsApp
Join and get latest news updates delivered to you via WhatsApp
ସେହିପରି ରାଜନଗର ବ୍ଲକ ରଙ୍ଗଣୀ ପଞ୍ଚାୟତର ଭେକ୍ଟା ଗାଁରେ ପାନୀୟ ଜଳର ସୁବିଧା ନଥିବାରୁ ମହିଳାମାନେ ଅଢେଇ କିଲୋମିଟର ଚାଲି ଚାଲି ଜଙ୍ଗଲ ମଧ୍ୟ ଦେଇ ପାଣି ଆଣିବାକୁ ଯାଉଛନ୍ତି । ପାନୀୟ ଜଳ ସମସ୍ୟାକୁ ଦୂର କରିବାକୁ ବାରମ୍ବାର ଅଭିଯୋଗ କରୁଥିଲେ ମଧ୍ୟ ପ୍ରଶାସନର ଚେତା ପଶୁନି । ସେପଟେ ତଦନ୍ତ କରାଯାଇ ଖୁବଶୀଘ୍ର ଗାଁରେ ନଳକୂପ ବସାଯିବ ବୋଲି କହିଛନ୍ତି ରାଜନଗର ବିଡିଓ ।
ସେପଟେ ଢେଙ୍କାନାଳ ଓଡାପଡ଼ା ବ୍ଲକ୍ ସଦାସିବପୁର ପଞ୍ଚାୟତରେ ବାସ କରୁଥିବା ତିନି ଗାଁର ଲୋକଙ୍କୁ ପାଣି ପାଇଁ ମାଇଲ୍ ମାଇଲ୍ ଚାଲିବାକୁ ପଡ଼ୁଛି । ଏଠାକାର ଲୋକେ ବର୍ଷ ବର୍ଷ ଧରି ବ୍ରାହ୍ମଣୀ ନଦୀର ପାଣି ଉପରେ ନିର୍ଭର କରିଆସୁଛନ୍ତି । ଅପରିଷ୍କାର ନଦୀ ଜଳ ପିଇ ଲୋକେ କିଡନୀ ଓ ହୃଦଜନିତ ରୋଗର ଶିକାର ହେଉଛନ୍ତି । ସ୍ଥାନୀୟ ସରପଞ୍ଚ ପାନୀୟ ସଙ୍କଟକୁ ସ୍ୱୀକାର କରିବା ସହ ଏହାର ପ୍ରତିକାର ଲାଗି ଉଦ୍ୟମ କରାଯାଉଥିବା କହିଛନ୍ତି । ରାଜ୍ୟରେ ପାନୀୟ ଜଳ ସଙ୍କଟ ଲାଗି ରହିଥିବା ବେଳେ ଏହାର ତୁରନ୍ତ ସମାଧାନ ପାଇଁ ଦାବି କରାଯାଉଛି । ଏହାସହ ଲୋକଙ୍କୁ ବିଶୁଦ୍ଧ ପାନୀୟ ଜଳ କେବେ ମିଳୁଛି, ତାହା ଦେଖିବାକୁ ବାକି ରହିଲା ।