ପୋକରା କ୍ଷେତ ପାଇଁ ପ୍ୟାକେଜ ଘୋଷଣା : କ୍ଷେତ ଜଳିଥିଲେ ମଧ୍ୟ ମିଳିବ କ୍ଷତିପୂରଣ, ରାଜ୍ୟ କୃଷି କ୍ୟାବିନେଟରେ ହେଲା ନିଷ୍ପତ୍ତି
କନକ ବ୍ୟୁରୋ : କ୍ଷେତ ଜାଳିଥିବା ଚାଷୀଙ୍କୁ କ୍ଷତିପୂରଣ ମିଳିବ ନାହିଁ ବୋଲି କୃଷିମନ୍ତ୍ରୀଙ୍କ ଘୋଷଣାକୁ ଖଣ୍ଡନ କରି ଆଜି କୃଷି କ୍ୟାବିନେଟ ପରେ ରାଜସ୍ୱ ମନ୍ତ୍ରୀଙ୍କ ସୂଚନା । ଚକଡା ପୋକଦ୍ୱାରା ପ୍ରଭାବିତ ସମସ୍ତ ଚାଷୀଙ୍କୁ ମିଳିବ ସରକାରୀ ସହାୟତା । ଚାଷ ଜମି ଜାଳିଦେଇଥିବା ଚାଷୀଙ୍କୁ ମଧ୍ୟ କ୍ଷତିପୂରଣ ମିଳିବ ବୋଲି ଘୋଷଣା କରିଛନ୍ତି ସରକାର । କୃଷିମନ୍ତ୍ରୀ ଦାମ ରାଉତ ଏ ସଂପର୍କିତ ଏକ ପ୍ରଶ୍ନର ଉତର ରଖୁଥିବାବେଳେ, ରାଜସ୍ୱ ମନ୍ତ୍ରୀ ଏହାର ଉତର ଗଣମାଧ୍ୟମ ସାମ୍ନାରେ ଦେଇଥିଲେ ।
Kanak News is now on WhatsApp
Join and get latest news updates delivered to you via WhatsApp
ଆଜି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଅଧ୍ୟକ୍ଷତାରେ କୃଷି କ୍ୟାବିନେଟ ବୈଠକ ପରେ ଏନେଇ ସରକାରଙ୍କ ପକ୍ଷରୁ ସ୍ପଷ୍ଟ କରାଯାଇଛି । ପୂର୍ବରୁ ଘୋଷଣା ହୋଇଥିବା ମରୁଡି ସହାୟତା ଆଧାରରେ, ଚକଡା ପୋକ ଦ୍ୱାରା ପ୍ରଭାବିତ ଚାଷୀଙ୍କୁ ଇନପୁଟ ସବସିଡି ପ୍ରଦାନ କରାଯିବ । ଅର୍ଥାତ, ଜଳସେଚିତ ଜମି ପାଇଁ ୧୩ ହଜାର ୫୦୦ ଓ ଅଣଜଳସେଚିତ ଜମି ପାଇଁ ୬ ହଜାର ୮ଶହ ଟଙ୍କା ସହାୟତା ପାଇବେ ପ୍ରତ୍ୟେକ କ୍ଷତିଗ୍ରସ୍ତ ଚାଷୀ । ସେହିପରି କୀଟନାଶକ ଉପରେ ସବସିଡି ହାରକୁ ବୃଦ୍ଧି କରାଯାଇଛି । ପୂର୍ବରୁ ରୋଗପୋକ ପାଇଁ ୫୦ ପ୍ରତିଶତ ସବସିଡି ଦରରେ କୀଟନାଶକ ଦିଆଯାଉଥିବାବେଳେ ଏଣିକି ୭୫ ପ୍ରତିଶତ ସବସିଡି ପ୍ରଦାନ କରାଯିବ । ପ୍ରଭାବିତ ଅଂଚଳରେ ୫୦ ପ୍ରତିଶତ ରିହାତିରେ କୀଟନାଶକ ସିଂଚନ ମେସିନ ଯୋଗାଇ ଦିଆଯିବ ।
ଏଥିସହ ପ୍ରଭାବିତ ଅଂଚଳରେ ୫୦ ହଜାର ଚାଷୀଙ୍କୁ ବିକଳ୍ପ ଜୀବନଧାରଣ ପାଇଁ ସହାୟତା କରିବାକୁ କୁକୁଡା ଚିଆଁ ଓ ଫୁଡର କିଟ ଯୋଗାଇ ଦିଆଯିବ । ସେହିଭଳି ରବି ଚାଷ ଋଣ ପାଇଁ ୫ ହଜାର କୋଟି ଟଙ୍କା ରଖାଯାଇଛି ।ଏହାଛଡା ପୋକ ପାଇଁ ୩୩% ପ୍ରତିଶତରୁ ଅଧିକ କ୍ଷତିଗ୍ରସ୍ତ ଜମିରେ ୫୦% ଖଜଣା ଛାଡ ହେବ ବୋଲି ରାଜସ୍ୱ ମନ୍ତ୍ରୀ କହିଛନ୍ତି । ଚାଷ କ୍ଷତିଗ୍ରସ୍ତ ଅଞ୍ଚଳରେ ପିଲାଙ୍କ ଟ୍ୟୁସନ ଫି ଛାଡ କରିବାକୁ କୃଷି କ୍ୟାବିନେଟରେ ନିଷ୍ପତି ହୋଇଛି । ଏହାବାଦ ମରୁଡି ପ୍ରଭାବିତ ଅଂଚଳ ପାଇଁ ସରକାର ଯେଉଁସବୁ ଘୋଷଣା କରିଥିଲେ, ଚକଡା ପୋକ ଦ୍ୱାରା ପ୍ରଭାବିତ ଅଂଚଳର ଚାଷୀଙ୍କ ପାଇଁ ମଧ୍ୟ ସେହିସବୁ ଘୋଷଣା ଦୋହରାଇଛନ୍ତି ।
ଅନ୍ୟପଟେ ରାଜ୍ୟରେ ଚକଡା ପୋକ ଯୋଗୁଁ ଦେଖାଦେଇଥିବା ଚାଷୀ ସମସ୍ୟାକୁ ନେଇ ବିଜେଡି ସରକାରଙ୍କ ଉପରେ ବର୍ଷିଛନ୍ତି କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ । ଫସଲ କ୍ଷତି ହେବା ପରେ ପ୍ୟାକେଜ ଘୋଷଣା ନକରି ଚାଷୀ ଆତ୍ମହତ୍ୟା ପର୍ଯ୍ୟନ୍ତ କାହିଁକି ସରକାର ଅପେକ୍ଷା କରିଥିଲେ ବୋଲି ପ୍ରଶ୍ନ କରିଛନ୍ତି ଧର୍ମେନ୍ଦ୍ର । ଡିବିଟି ଯୋଜନାରେ ଚାଷୀମାନଙ୍କୁ କାହିଁକି ସାମିଲ କରାଗଲା ନାହିଁ ବୋଲି ସେ ପ୍ରଶ୍ନ କରିଛନ୍ତି । ସେପଟେ ବିଜେଡି କହିଛି ସରକାରକୁ ଆସିବାର ସାଢେ ୩ ବର୍ଷ ପରେ ବି କାହିଁକି ସାରା ଦେଶରେ ଚାଷୀ ଆତ୍ମହତ୍ୟା ବଢି ଚାଲିଛି ତାର ଉତର ରଖୁନ୍ତୁ କେନ୍ଦ୍ରମନ୍ତ୍ରୀ ।