୫୧ ହଜାର କୋଟି ଟଙ୍କାର ନିବେଶ ପାଇଁ ୩ଟି ବୁଝାମଣାପତ୍ର ସ୍ୱାକ୍ଷରିତ, ଓଡିଶା ଅକ୍ଷୟଶକ୍ତି ନୀତି -୨୦୨୨ ଘୋଷିତ
କନକ ବ୍ୟୁରୋ : ଓଡିଶା ସରକାରଙ୍କ ମେକ୍ ଇନ୍ ଓଡିଶା କନକ୍ଲେଭର ତୃତୀୟ ସଂସ୍କରଣ -୨୦୨୨ ପ୍ରଥମ ଦିନରେ ଓଡିଶା ଅକ୍ଷୟଶକ୍ତି ନୀତି -୨୦୨୨ ଘୋଷିତ ହୋଇଛି । ଅକ୍ଷୟଶକ୍ତି ସଂପର୍କିତ ଏକ ବିଜନେସ ଲିଡର ଅଧିବେଶନରେ ଯୋଗଦେଇ ଶକ୍ତି, ଶିଳ୍ପ, ଏମଏସଏଇ ମନ୍ତ୍ରୀ ପ୍ରତାପ କେଶରୀ ଦେବ ବକ୍ତବ୍ୟ ରଖିବା ସହ ଅକ୍ଷୟଶକ୍ତି ନୀତି ଘୋଷଣା କରିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
‘ସବୁଜ ଶକ୍ତି ଅଭିମୁଖେ’ ଶୀର୍ଷକ ଏହି ବକ୍ତୃତାମାଳାରେ ମନ୍ତ୍ରୀ ପ୍ରତାପ କେଶରୀ ଦେବ କହିଥିଲେ କି ରାଜ୍ୟର ଅକ୍ଷୟଶକ୍ତି ଉତ୍ପାଦନ କ୍ଷମତାର ୧୦ ହଜାର ମେଗାୱାଟ ବୃଦ୍ଧି ପାଇଁ ନୀତିରେ ବ୍ୟବସ୍ଥା ରହିଛି । ଏହା ସହିତ ରାଜ୍ୟରେ ବିିଭିନ୍ନ ଅକ୍ଷୟଶକ୍ତିର ପ୍ରକଳ୍ପ ବିକାଶ ନିମନ୍ତେ ବହୁମୁଖୀ ରିହାତି ବ୍ୟବସ୍ଥା ପ୍ରବର୍ତ୍ତନ କରାଯାଇଛି ।
ଶକ୍ତି ବିଭାଗର ପ୍ରମୁଖ ଶାସନ ସଚିବ ନିକୁଞ୍ଜ ବିହାରୀ ଧଳ ସ୍ୱାଗତ ବକ୍ତବ୍ୟ ରଖିଥିଲେ । ପରେ ଏନଟିପିସିର ସିଏମଡି, ଏସଜେଭିଏନଏଲର ସିଏମଡି, ଟାଟା ପାୱାରର ସିଇଓ, ହିଣ୍ଡାଲକୋର ଏମଡିଙ୍କ ସମେତ ଇଣ୍ଟରନ୍ୟାସନାଲ ସୋଲାର ଆଲିୟାନ୍ସର ପୂର୍ବତନ ମହାନିର୍ଦ୍ଦେଶକ ଉପେନ୍ଦ୍ର ତ୍ରିପାଠୀ ତାଙ୍କର ଅଭିଭାଷଣରେ ଅକ୍ଷୟଶକ୍ତି ବିକାଶ ଉପରେ ମତ ରଖିଥିଲେ ।
ଶକ୍ତି ବିଭାଗ ତରଫରୁ ୩ ଟି କେନ୍ଦ୍ରୀୟ ସରକାରୀ ଉଦ୍ୟୋଗ ସହ ବୁଝାମଣା ହୋଇଛି । ଏନଟିପିସି, ଏସଜେଭିଏନଏଲ ଓ ଏନଏଲସି ସହିତ ଗ୍ରୀଡକୋ ଏହି ବୁଝାମଣାପତ୍ରରେ ସ୍ୱାକ୍ଷର କରିଛନ୍ତି । ବୁଝାମଣାପତ୍ର ଗୁଡିକରେ ମୋଟ ୫୧ ହଜାର କୋଟି ଟଙ୍କା ପୁଞ୍ଜିନିବେଶର ବ୍ୟବସ୍ଥା ରହିଛି । ଏସବୁ ପ୍ରକଳ୍ପ କାର୍ଯ୍ୟକାରୀ ହେଲେ ପ୍ରତ୍ୟକ୍ଷ ଭାବେ ୧୨ ଶହ ଓ ପରୋକ୍ଷ ଭାବେ ୨୬ ଶହ ଲୋକ ନିଯୁକ୍ତି ପାଇବେ ବୋଲି କୁହାଯାଇଛି ।