ଓଡିଶା ଡିଜିପି ଶହୀଦ! ତାମିଲ ଚଳଚିତ୍ରରେ ‘ଶହୀଦ’ଙ୍କ ସ୍ଥାନରେ ଲାଗିଛି ଡିଜିପିଙ୍କ ଫଟୋ
କନକ ବ୍ୟୁରୋ : ଓଡିଶା ଡିଜିପି କେ. ବି. ସିଂ ଶହୀଦ । ଏଭଳି ଆଶ୍ଚର୍ଯ୍ୟଜନକ ତଥା ଚକିତ କଲାଭଳି ତଥ୍ୟ ଦେଖାଯାଇଛି ତାମିଲ ଚଳଚିତ୍ରରେ । ଗତ ସପ୍ତାହରେ ତାମିଲ ଚଳଚିତ୍ର ଏସିପି ଶିବା, ହିନ୍ଦୀ ଭଷାରେ ଟିଭିରେ ଦେଖାଯାଇଥିଲା । ଗୁରୁତ୍ୱପୂର୍ଣ୍ଣ କଥା ହେଉଛି ଏଥିରେ ଏକ ସିନରେ ଓଡିଶା ଡିଜିପି କେ. ବି. ସିଂଙ୍କୁ ଶହୀଦ ହୋଇଥିବା ପୋଲିସ କର୍ମଚାରୀ ଭାବେ ଦେଖାଯାଇଛି । ଡିଜିପିଙ୍କ ଫଟୋ ମଧ୍ୟ କାନ୍ଥରେ ଝୁଲିଛି । ପୋଲିସ ଡିଜି ଏହି ଘଟଣାକୁ ହାଲକା ଭାବେ ନେଇଥିଲା ବେଳେ ଓଡିଶା ପୋଲିସ ଆସୋସିଏସନ ଘଟଣାକୁ ଗମ୍ଭୀରତାର ସହ ନେଇଛି । ଫିଲ୍ମର ପ୍ରଯୋଜକ ଓ ନିର୍ଦ୍ଦେଶକ କ୍ଷମା ମାଗନ୍ତୁ ବୋଲି ସଂଘ ଦାବି କରିଛି ।
Kanak News is now on WhatsApp
Join and get latest news updates delivered to you via WhatsApp
ଚଳଚିତ୍ର ସିନରେ ସତ୍ୟରାଜ୍ ଯିଏ ବାହୁବଳୀ ଚଳଚିତ୍ରରେ କଟପ୍ପା ଭୁମିକାରେ ଅଭିନୟ କରିଥିଲେ, ସେ କାନ୍ଥରେ ଲାଗିଥିବା ଫଟୋ ଗୁଡିକୁ ଦେଖାଇ ସମାଜ ପ୍ରତି ସେମାନଙ୍କର ଅବଦାନକୁ ଦର୍ଶାଇଥିଲେ । କାନ୍ଥରେ ଲାଗିଥିବା ଫଟୋ ଗୁଡିକ ଶହୀଦ ପୋଲିସ କର୍ମଚାରୀ ମାନଙ୍କର ଥିବା କୁହାଯାଉଛି । ହେଲେ ସ୍ପଷ୍ଟ ଭାବେ ଏଥିରେ ଜଣାପଡୁଛି, କାନ୍ଥରେ ଝୁଲୁଛି ଡିଜିପି କେ. ବି. ସିଂଙ୍କ ଫଟୋ । ଚଳଚିତ୍ରରେ ଜଣେ ସଚ୍ଚୋଟ ପୋଲିସ କର୍ମଚାରୀ ଭୁମିକାରେ ଅଛନ୍ତି ସତ୍ୟରାଜ୍ ।
ତେବେ ଏନେଇ ପ୍ରତିକ୍ରିୟା ରଖିଛନ୍ତି ଓଡିଶା ଡିଜିପି । ଟାଇମ୍ସ ଅଫ ଇଣ୍ଡିଆକୁ ପ୍ରତିକ୍ରିୟା ଦେଇ କହିଛନ୍ତି, ପ୍ରଥମେ ମୁଁ ଏହାକୁ ଦେଖି ଆଶ୍ଚର୍ଯ୍ୟ ହେଲି, ହେଲେ ପରେ ହସିଦେଲି । ମୁଁ କଣ କରିପାରିବି? ବୋଧହୁଏ ଭୁଲବଶତଃ କେହି ଇଂଟରନେଟରେ ଶହୀଦ ପୋଲିସ କର୍ମଚାରୀଙ୍କ ଫଟୋ ଖୋଜୁଥିଲେ । ଆଉ ଭୁଲରେ ମୋ ଫଟୋକୁ ଡାଉନଲୋଡ କରି ବ୍ୟବହାର କରିନେଇଛନ୍ତି । ଯଦି ସମ୍ଭବ ହୁଏ, ମୁଁ ଏନେଇ ଫିଲ୍ମର ନିର୍ଦ୍ଦେଶକ ଓ ପ୍ରଯୋଜକଙ୍କ ସହ କଥା ହେବି ।
ତେବେ ଓଡିଶା ପୋଲିସ୍ ଆସୋସିଏସନ ଟାଇମ୍ସ ଅଫ ଇଣ୍ଡିଆକୁ ଦେଇଥିବା ପ୍ରତିକ୍ରିୟାରେ କହିଛି, ଏହା ଏକ ସାଂଘାତିକ ଘଟଣା । ଫିଲ୍ମର ନିର୍ଦ୍ଦେଶକ ଓ ପ୍ରଯୋଜକ ରାଜ୍ୟର ପୋଲିସ ମୁଖ୍ୟଙ୍କ ମଜାକ ଉଡାଇଛନ୍ତି । ଯେହେତୁ ଫିଲ୍ମ ହିନ୍ଦୀ ଭାଷାରେ ଡବିଂ ହୋଇଛି, ତେଣୁ ଓଡିଶାରେ ମଧ୍ୟ ବହୁତ ଲୋକ ଏହାକୁ ଦେଖିବାକୁ ଆଶଙ୍କା ରହିଛି । ଫିଲ୍ମ ନିର୍ମାତା ଏନେଇ ଭୁଲ ମାଗିବାକୁ ଆମେ ଦାବି କରିବୁ ବୋଲି କହିଛନ୍ତି ସଂଘ ସଭାପତି ସତ୍ୟଜିତ୍ ମିଶ୍ର ।