ବିଶ୍ୱରେକର୍ଡ ସୃଷ୍ଟି କଲେ ଓଡ଼ିଆ ପୁଅ ସଂଗ୍ରାମ । ଦୁଇ ବର୍ଷ ଧରି ଓଡ଼ିଆ ୱିକିରେ ପ୍ରତିଦିନ ଉପସ୍ଥାପନ କରିଛନ୍ତି ବିଭିନ୍ନ ପ୍ରସଙ୍ଗ ।
କନକ ବ୍ୟୁରୋ : ଓଡ଼ିଆ ଓ୍ଵିକିପିଡିଆରେ କ୍ରମାଗତ ଭାବେ ୨ ବର୍ଷ ଧରି ପ୍ରତିଦିନ ଗୋଟାଏ ଲେଖାଏଁ ପ୍ରସଙ୍ଗ ରଚନା କରି ବିଶ୍ୱରେକର୍ଡ ସୃଷ୍ଟି କରିଛନ୍ତି ଭଦ୍ରକର ସଂଗ୍ରାମ କେଶରୀ ସେନାପତି । ତେଲୁଗୁ ଓ୍ଵିକିପିଡିଆର ଲେଖକ ପ୍ରଣୟ ରାଜ ଓ ପଞ୍ଜାବୀ ଓ୍ଵିକିପିଡିଆର ଲେଖକ ନିତେଶ ଗିଲଙ୍କ ପରେ ସଂଗ୍ରାମ ହେଉଛନ୍ତି ବିଶ୍ୱରେ ଏଭଳି ତୃତୀୟ ବ୍ୟକ୍ତିତ୍ବ ।
Kanak News is now on WhatsApp
Join and get latest news updates delivered to you via WhatsApp
୨୦୧୪ ମସିହା ଡିସେମ୍ବର ମାସରୁ ସଂଗ୍ରାମ ଓଡ଼ିଆ ଓ୍ଵିକିପିଡିଆ ପାଇଁ ଲେଖିବା ଆରମ୍ଭ କରିଥିଲେ । ପ୍ରଥମେ ସେ ଓଡ଼ିଆ ସଂସ୍କୃତି ଓ ଚଳଚ୍ଚିତ୍ର ଦୁନିଆ ଉପରେ ଲେଖା ଆରମ୍ଭ କରି ପରେ ସେ ବିଭିନ୍ନ ବିଷୟବସ୍ତୁ ଉପରେ ଉପସ୍ଥାପନା ଜାରି ରଖିଥିଲେ । ଓଡ଼ିଆ ସଂସ୍କୃତି ଓ ପାରମ୍ପରିକ ଉତ୍ସବର ଆକର୍ଷଣୀୟ ଫଟୋ ଅପ୍ଲୋଡ କରି ୨୦୧୯ ମସିହାରେ ଅନୁଷ୍ଠିତ ‘ଓ୍ଵିକି ଲଭ୍ସ ଲଭ୍’ ଶୀର୍ଷକ ଏକ ବିଶ୍ୱସ୍ତରୀୟ ଫଟୋଗ୍ରାଫି ପ୍ରତିଯୋଗିତାରେ ଭାରତରେ ତୃତୀୟ ଓ ସାରା ବିଶ୍ୱରେ ଷଷ୍ଠ ସ୍ଥାନ ଅଧିକାର କରିଥିଲେ ସଂଗ୍ରାମ । ସେ ଓଡ଼ିଶାର ପ୍ରଥମ ଇ-ମାଗାଜିନ୍ ‘ଶୁଭପଲ୍ଲବ’ ପ୍ରକାଶ କରିଥିଲେ । ଏହି ପତ୍ରିକାର ସଂପାଦନା ଦାୟିତ୍ୱରେ ରହି ପରବର୍ତ୍ତୀ ସମୟରେ ସେ ଏହି ପତ୍ରିକାକୁ ଇଂରାଜୀ, ବଙ୍ଗଳା ଓ ସଂସ୍କୃତ ଭାଷାରେ ପ୍ରକାଶ କରିଥିଲେ ।