ଅଯୋଗ୍ୟ ଘୋଷିତ ପରେ ଲୋକସଭା ୱେବସାଇଟରୁ ହଟିଲା ରାହୁଲ ଗାନ୍ଧୀଙ୍କ ନାଁ । ଏବେ ୱାୟନାଡ ଆସନ ଉପରେ ସମସ୍ତଙ୍କ ନଜର, ଆଜି ରାହୁଲ କରିବେ ସାମ୍ବାଦିକ ସମ୍ମିଳନୀ
କନକ ବ୍ୟୁରୋ: ରାହୁଲଙ୍କୁ ଲୋକସଭା ସଚିବାଳୟ ଅଯୋଗ୍ୟ ଘୋଷଣା କରିବା ପରେ ଏବେ ବଲ୍ ନିର୍ବାଚନ କମିଶନଙ୍କ କୋର୍ଟରେ । ନିର୍ବାଚନ କମିଶନ ୱାଇନାଡ ଆସନ ଖାଲି ବୋଲି ଘୋଷଣା କରିବେ । ପରବର୍ତୀ ସମୟରେ ସେଠାରେ ସାନି ନିର୍ବାଚନ କରାଯିବ । ଲୋକସଭା ନିର୍ବାଚନକୁ ଆହୁରି ବର୍ଷେ ରହିଛି । ତେଣୁ ଆଇନଗତ ଭାବେ କୌଣସି ଆସନ ୬ ମାସରୁ ଅଧିକ ସମୟ ଖାଲି ରହିବ ନାହିଁ । ନିର୍ବାଚନ କମିଶନ ମଧ୍ୟ ୱାଇନାଡରେ ଉପନିର୍ବାଚନ କରାଇବା ଲାଗି ବିଚାରବିମର୍ଶ ଆରମ୍ଭ କରିଦେଇଛନ୍ତି । ଆସନ୍ତା ଏପ୍ରିଲ ମାସରେ ନିର୍ବାଚନ ତାରିଖ ଘୋଷଣା ହେବାର ସମ୍ଭାବନା ରହିଛି । ସେପ୍ଟେମ୍ବର ୨୨ ତାରିଖ ସୁଦ୍ଧା ନିର୍ବାଚନ ହୋଇପାରେ । ରାହୁଲ ସାଂସଦ ଭାବେ ଅଯୋଗ୍ୟ ଘୋଷିତ ହୋଇଥିବାରୁ ଯେ ପର୍ଯ୍ୟନ୍ତ ଉଚ୍ଚ ଅଦାଲତ ତାଙ୍କ ଦଣ୍ଡାଦେଶ ଉପରେ ରୋକ ଲଗାଇ ନାହାନ୍ତି ସେ ପର୍ଯ୍ୟନ୍ତ ସେ ନିର୍ବାଚନ ଲଢିପାରିବେ ନାହିଁ । ଦଣ୍ଡାଦେଶ ଉପରେ ରୋକ୍ ନଲାଗିଲେ ରାହୁଲ ମୋଟ୍ ୮ ବର୍ଷ ନିର୍ବାଚନ ଲଢିପାରିବେ ନାହିଁ । କାରଣ ୨ ବର୍ଷର ଦଣ୍ଡାଦେଶ କାର୍ଯ୍ୟକାରୀ ହେବା ପରେ ନିର୍ବାଚନ ଲଢିବା ନେଇ ଆଉ ୬ ବର୍ଷର କଟକଣା ଜାରି ରହିବ । କିନ୍ତୁ ଯଦି ସେ ସୁରଟ୍ କୋର୍ଟର ଦଣ୍ଡାଦେଶ ମାମଲାରେ ଉପରକୋର୍ଟରୁ ରହିତାଦେଶ ଆଣନ୍ତି ତେବେ ତାଙ୍କର ଲୋକସଭା ସଦସ୍ୟ ପଦ ବଜାୟ ରହିବ । ଏଥି ସହ ସେ ୨୦୨୪ ଲୋକସଭା ନିର୍ବାଚନ ମଧ୍ୟ ଲଢିପାରିବେ । ତେଣୁ ରାହୁଲଙ୍କ ପାଖରେ ବିକଳ୍ପ ହେଉଛି ଉପର କୋର୍ଟକୁ ଯିବା । ଉପରେ କୋର୍ଟରେ ଅପିଲ କରିବା ପାଇଁ ରାହୁଲଙ୍କୁ ୩୦ ଦିନ ସମୟ ମିଳିଛି ।
Kanak News is now on WhatsApp
Join and get latest news updates delivered to you via WhatsApp
କଂଗ୍ରେସ ନେତା ରାହୁଲ ଗାନ୍ଧୀଙ୍କ ଲୋକସଭାର ପ୍ରାଥମିକ ସଦସ୍ୟତା ପଦ ରଦ୍ଦ ହେବା ପରେ ଲୋକସଭା ୱେବସାଇଟରେ ମଧ୍ୟ ତାଙ୍କ ନାଁ ମଧ୍ୟ ହଟିଯାଇଛି । ଏହି ପୂରା ଘଟଣାକୁ ନେଇ କଂଗ୍ରେସ ସହ ପୂରା ବିରୋଧୀ ଦଳ ଖୁବ୍ ହଙ୍ଗାମା କରିବା ସହ କେନ୍ଦ୍ର ସରକାରଙ୍କୁ କଡ଼ା ସମାଲୋଚନା କରିଛନ୍ତି । ସେପଟେ ଉଭୟ କଂଗ୍ରେସ ଓ ବିଜେପି ପରସ୍ପରକୁ ଘେରିବା ପାଇଁ ରଣନୀତି ପ୍ରସ୍ତୁତି ଆରମ୍ଭ କରିଦେଇଛନ୍ତି । ଏହାରି ଭିତରେ ଆଜି ରାହୁଲ ଗାନ୍ଧୀ ସାମ୍ବାଦିକ ସମ୍ମିଳନୀ କରିବେ ବୋଲି ସୂଚନା ମିଳିଛି । ସୁରତ ସେସନ୍ସ କୋର୍ଟ ତାଙ୍କ ଉପରେ ଯେଉଁ ଦଣ୍ଡାଦେଶ ଲଗାଇଛନ୍ତି ଏବଂ ଲୋକସଭାରୁ ସଦସ୍ୟତା ପଦ ଯିବା ପରେ ରାହୁଲ ପ୍ରଥମଥର ନିଜ ମତ ରଖିବେ । ଶୁକ୍ରବାର ଟ୍ୱିଟ୍ କରି ଲେଖିଥିଲେ, ମୁଁ ଭାରତର ସ୍ୱର ପାଇଁ ଲଢ଼େଇ କରୁଛି । ଆଉ ଏଥିପାଇଁ ଯେକୌଣସି ମୂଲ୍ୟ ଦେବାକୁ ପ୍ରସ୍ତୁତ ଅଛି ବୋଲି ରାହୁଲ ଲେଖିଥିଲେ । ସେପଟେ ରାହୁଲଙ୍କ ପାଇଁ ପୂରା କଂଗ୍ରେସ ରଣହୁଙ୍କାର ଦେଇଛି । ଆଜି କଂଗ୍ରେସ ପୁଣି ଦେଶବ୍ୟାପୀ କେନ୍ଦ୍ର ସରକାର ବିରୋଧରେ ପ୍ରତିବାଦ କରିବ । ଏହାସହ ରାହୁଲଙ୍କ ପାଇଁ କଂଗ୍ରେସ ଦଳ କୋର୍ଟଙ୍କ ଦ୍ୱାରସ୍ଥ ହେବ ବୋଲି ଜଣାପଡ଼ିଛି ।