ପିଲାଙ୍କ ରୋଗ ନେଇ ଆସୁଛି ନୂଆ ନୂଆ ତଥ୍ୟ: ୫ ବର୍ଷରୁ କମ୍ ବୟସର ପିଲାଙ୍କୁ ହେଉଥିଲା ହାତ, ପାଦ, ମୁହଁ ରୋଗ ବା ଏଚଏଫଏମଡି
କନକ ବ୍ୟୁରୋ: ଓଡିଶାର ବିଭିନ୍ନ ସ୍ଥାନରେ ଛୋଟ ପିଲାଙ୍କୁ ଏଭଳି ଏକ ଚର୍ମ ରୋଗ ଆକ୍ରାନ୍ତ କରୁଛି । ଏହା ଏକ ସଂକ୍ରାମକ ରୋଗ ବୋଲି କୁହାଯାଉଛି । କେହି କେହି ଏହାକୁ ଟମାଟୋ ଫ୍ଲୁ ବୋଲି କହୁଥିବାବେଳେ ଓଡିଶାରେ ଡାକ୍ତର କହୁଛନ୍ତି ଏହା ହ୍ୟାଣ୍ଡ ଫୁଟ୍ ମାଉଥ୍ ଡିଜିଜ୍ । ସାଧାରଣତଃ ହାତ, ପାଦ ଓ ମୁହଁରେ ଏଭଳି ରୋଗର ଲକ୍ଷଣ ଦେଖାଯାଉଥିବାରୁ ଏଭଳି ନାମକରଣ କରାଯାଇଛି । କିନ୍ତୁ ବିଶେଷଜ୍ଞମାନେ କହୁଛନ୍ତି, ପୂର୍ବରୁ ଏଚଏଫଏମସିରେ ୫ବର୍ଷର କମ୍ ବୟସର ପିଲା ସଂକ୍ରମିତ କରୁଥିଲା । କିନ୍ତୁ ଏବେ ଏହି ଭୂତାଣୁ ଲକ୍ଷଣ ବଦଳାଇବା ସହ ୧୪ବର୍ଷ ଯାଏ ପିଲାଙ୍କୁ ବି ଆକ୍ରାନ୍ତ କରୁଛି ।
Kanak News is now on WhatsApp
Join and get latest news updates delivered to you via WhatsApp
ରାଜ୍ୟର ବିଭିନ୍ନ ସ୍ଥାନରୁ ଏଚଏଫଏମଡି ଆକ୍ରାନ୍ତ ଚିହ୍ନଟ ହେଉଥିବାବେଳେ ନିକଟରେ ଭୁବନେଶ୍ୱର ହଂସପାଳ ଅଂଚଳରୁ ଜଣେ ୧୨ବର୍ଷ ପିଲା ସଂକ୍ରମିତ ହୋଇଥିବା ଚିହ୍ନଟ ହୋଇଛନ୍ତି । ଏ ହେଉଛନ୍ତି ସେହି ପିଲା । ଯାହାଙ୍କୁ ଆମେ ସମ୍ପୂର୍ଣ୍ଣ ଭାବେ ଦେଖାଇ ପାରୁନାହୁଁ । କିନ୍ତୁ ତାଙ୍କ ହାତ ଗୋଡକୁ ନଜର ପକାନ୍ତୁ । ନାଲି ନାଲି ହୋଇ ଫଳି ଯାଇଛି ତାଙ୍କ ହାତ ଆଉ ଗୋଡ । ଦେହରେ ଜ୍ୱର ବି ଥିବା ଜଣାପଡିଛି । ସବୁଠାରୁ ବଡ କଥା ହେଉଛି ଏହି ପିଲା ଜଣଙ୍କ ୨୦୧୪ରେ ସମାନ ରୋଗରେ ଆକ୍ରାନ୍ତ ହୋଇଥିଲେ । ଏବେ ୮ବର୍ଷ ପରେ ପୁଣି ଥରେ ସେହି ରୋଗରେ ଆକ୍ରାନ୍ତ ହୋଇଛନ୍ତି ।
ଦେଶର ବିଭିନ୍ନ ସ୍ଥାନରେ ହ୍ୟାଣ୍ଡ ଫୁଟ୍ ଆଣ୍ଡ ମାଉଥ୍ ଡିଜିଜ୍୍ ବା ଏଚଏଫଏମଡି ଆକ୍ରାନ୍ତ ଶିଶୁଙ୍କ ସଂଖ୍ୟା ବଢ଼ିବା ସହ ଲକ୍ଷଣରେ କେତେକ ପରିବର୍ତନ ଦେଖାଯାଉଛି । ଏହି ପରିବର୍ତିତ ଲକ୍ଷଣ , କାରଣ ଓ ଚିକିତ୍ସା ସମ୍ପର୍କରେ ଜାଣିବା ପାଇଁ, ନମୁନା ସଂଗ୍ରହ କରାଯାଇ, ଭୁବନେଶ୍ୱର ସ୍ଥିତ ଏଆଇପିଏଚ୍ ବିଶ୍ୱବିଦ୍ୟାଳୟର ବିଏସଏଲ-୩ ଲାବରୋଟୋରୀରେ ଅଧିକ ଅନୁଧ୍ୟାନ କରାଯାଉଛି ।
ଏହି ରୋଗରେ କେସଲୋଡ ଦିନକୁ ଦିନ ବୃଦ୍ଧି ପାଇବାରେ ଲାଗିଛି । ବିଭିନ୍ନ ଜିଲ୍ଲାରେ ଏହି ରୋଗୀ ଚିହ୍ନଟ ହେଉଛନ୍ତି । ତେଣୁ ଅଧିକ ଅନୁଧ୍ୟାନ ପାଇଁ ନମୁନା ସଂଗ୍ରହ କରି ଆରଏମଆରସିକୁ ପଠାଇବା ପାଇଁ ଜିଲ୍ଲା ଚିକିତ୍ସାଳୟଗୁଡିକୁ ସ୍ୱାସ୍ଥ୍ୟ ବିଭାଗ ନିର୍ଦ୍ଦେଶ ଦେଇଛି ।