ଇତିହାସ ରଚିଲା ଆମେଠୀ ଆସନ । ୩୧ ବର୍ଷର କ୍ଷମତା, ଏବେ ୨୫ ବର୍ଷ ପରେ ବିନା ଗାନ୍ଧୀ ପରିବାରରେ ଆମେଠୀ ହେବ ନିର୍ବାଚନ
କନକ ବ୍ୟୁରୋ : ଉତ୍ତର ପ୍ରଦେଶର ଆମେଠୀ ଲୋକସଭା ଆସନରେ ଗାନ୍ଧୀ ପରିବାରର ଦବଦବା ଦୀର୍ଘ ୨୫ ବର୍ଷ ଦେଖିବାକୁ ମିଳିଥିଲା । ହେଲେ ଚଳିତ ନିର୍ବାଚନରେ ପ୍ରଥମ ଥର ପାଇଁ ବିନା ଗାନ୍ଧୀ ପରିବାରରେ ଆମେଠୀରେ ନିର୍ବାଚନ ହେବାକୁ ଯାଉଛି । ୧୯୬୭ ମସିହାରେ ଲୋକସଭା କ୍ଷେତ୍ରର ମାନ୍ୟତା ପାଇଥିବା ଆମେଠୀକୁ ଗାନ୍ଧୀ ପରିବାରର ଗଡ ବୋଲି କୁହାଯାଇଥାଏ । ସଂସଦରେ ଆମେଠୀରୁ ୩୧ ବର୍ଷ ଧରି ଗାନ୍ଧୀ ପରିବାରର କେହି ନା କେହି ପ୍ରତିନିଧୀତ୍ୱ କରୁଥିଲେ।
Kanak News is now on WhatsApp
Join and get latest news updates delivered to you via WhatsApp
ଗତ ୨୦୧୯ ନିର୍ବାଚନରେ ଏଠାରେ ବ୍ୟତିକ୍ରମ ଦେଖିବାକୁ ମିଳିଥିଲା । ଏଠାରୁ ବିଜେପି ନେତ୍ରୀ ସ୍ମୃତି ଇରାନୀ ରାହୁଲ ଗାନ୍ଧୀଙ୍କୁ ୫୫ ହଜାର ଭୋଟରେ ପରାଜିତ କରିଥିଲେ । ଚଳିତ ନିର୍ବାଚନରେ ରାହୁଲ ଗାନ୍ଧୀ ଆମେଠୀ ଛାଡି ରାୟବରେଲୀରୁ ପ୍ରାର୍ଥୀ ହେଉଛନ୍ତି । ହେଲେ ଗାନ୍ଧୀ ପରିବାରର ନିକଟତର କୁହାଯାଉଥିବା କେଶୋରୀ ଲାଲ ଶର୍ମା ଏଥର ଆମେଠୀରେ ସ୍ମୃତି ଇରାନୀଙ୍କ ବିପକ୍ଷରେ ପ୍ରାର୍ଥୀ ହୋଇଛନ୍ତି ।
କେଶୋରୀ ଲାଲ ଶର୍ମା ଗାନ୍ଧୀ ପରିବାର ତରଫରୁ ଆମେଠୀ ଓ ରାୟବରେଲୀ ଲୋକସଭା କ୍ଷେତ୍ରର ପ୍ରଭାରୀ ଭାବେ କାର୍ଯ୍ୟ କରୁଥିଲେ । ଏହା ପୂର୍ବରୁ ୧୯୯୮ ମସିହାରେ ଆମେଠୀ ଆସନରୁ ଅଣ ଗାନ୍ଧୀ ପରିବାରରୁ ଜଣଙ୍କୁ ପ୍ରାର୍ଥୀ କରିଥିଲା କଂଗ୍ରେସ । ଏଠାରୁ ସୋନିଆ ଓ ରାଜୀବଙ୍କ ନିକଟତର କୁହାଯାଉଥିବା ସତୀଶ ଶର୍ମା ନିର୍ବାଚନ ଲଢିଥିଲେ । ହେଲେ ସେ ବିଜେପିର ସଂଜୟ ସିଂଙ୍କ ଠାରୁ ପରାଜିତ ହୋଇଥିଲେ । ହେଲେ ପୁଣି ୧୯୯୯ ମସିହାରେ ହୋଇଥିବା ନିର୍ବାଚନରେ ସୋନିଆ ଗାନ୍ଧୀ ସଂଜୟ ସିଂଙ୍କୁ ୩ ଲକ୍ଷରୁ ଅଧିକ ଭୋଟରେ ପରାଜିତ କରି ଗଡ ହାତେଇଥିଲେ । ହେଲେ ୨୦୦୪ ମସିହାରେ ସୋନିଆ ଗାନ୍ଧୀ ରାହୁଲଙ୍କ ପାଇଁ ଏହି ଆସନ ଛାଡି ନିକଟବର୍ତ୍ତୀ ରାୟବରେଲୀ ଆସନରୁ ନିର୍ବାଚନ ଲଢିଥିଲେ । ରାହୁଲ ଗାନ୍ଧୀ ୨୦୦୪,୨୦୦୯ ଓ ୨୦୧୪ କ୍ରମାଗତ ଭାବେ ଏହି ଆସନରୁ ନିର୍ବାଚନ ଲଢି ବିଜୟୀ ହୋଇଥିଲେ । ହେଲେ ୨୦୧୯ ରେ ସେ ବିଜେପିର ସ୍ମୃତି ଇରାନୀଙ୍କ ଠାରୁ ପରାଜିତ ହୋଇଥିଲେ ।