କନକ ବ୍ୟୁରୋ : ସ୍ମାର୍ଟ ସିଟି ରେସରେ ପ୍ରଥମ ଫେଜରେ କୋଚିକୁ ପଛରେ ପକାଇଥିଲା ଭୁବନେଶ୍ୱର । ହେଲେ ମେଟ୍ରୋ ଟ୍ରେନ୍ ଚଲାଇ ଭୁବନେଶ୍ୱରକୁ ବହୁ ପଛରେ ପକାଇଛି ଦକ୍ଷିଣ ଭାରତର ଏହି ପ୍ରମୁଖ ସହର । ପ୍ରଥମ ପର୍ଯ୍ୟାୟରେ ୧୩ କିମି ରାସ୍ତାରେ ମେଟ୍ରୋ ଗଡିଛି । ଏହା ମଧ୍ୟରେ ୧୧ଟି ଷ୍ଟେସନ୍ ରହିଛି, ଦୂରତା ଅତିକ୍ରମ କରିବାକୁ ୨୫ ମିନିଟ୍ ଲାଗିବ । ଏହା ପରେ ପ୍ରଶ୍ନ ଉଠିଛି, ସ୍ମାର୍ଟସିଟି ଭୁବନେଶ୍ୱରରେ ମେଟ୍ରୋ ଟ୍ରେନ୍ ଗଡିବ ନାହିଁ କାହିଁକି?
Kanak News is now on WhatsApp
Join and get latest news updates delivered to you via WhatsApp
ମେଟ୍ରୋ ଟ୍ରେନ୍ ଗଡିବାକୁ ତିଆରି ହୋଇଥିବା ରୁଟ୍ ଅର୍ଥାତ୍ ଗ୍ରେଟର୍ କୋଚିରେ ଜନସଂଖ୍ୟା ପାଖାପାଖି ୨୦ ଲକ୍ଷ । ଆଉ ଗ୍ରେଟର୍ ଭୁବନେଶ୍ୱର ଅର୍ଥାତ୍ ଟ୍ୱିନ୍ ସିଟିରେ ମଧ୍ୟ ଜନସଂଖ୍ୟା ପ୍ରାୟତଃ ସମାନ । ସେହିଭଳି କୋଚିରେ ମେଟ୍ରୋର ମୋଟ୍ ଦୂରତା ୨୬ କିମି, ଆଉ ଟ୍ୱିନସିଟି ଭିତରେ ଦୂରତା ୩୦ କିମି । ହେଲେ ଭୁବନେଶ୍ୱରର ବିକାଶ ପାଇଁ କାମ କରୁଥିବା ଅଧିକାରୀ ମେଟ୍ରୋ ପାଇଁ ଯୋଜନା କରିବା ବଦଳରେ ବସ୍ ମାଧ୍ୟମରେ ଯୋଗାଯୋଗ ବ୍ୟବସ୍ଥାକୁ ସୁଧାରିବାକୁ ବ୍ଲୁ-ପ୍ରିଂଟ୍ କରିଛନ୍ତି । ସହରରେ ମେଟ୍ରୋ ଭଳି ବ୍ୟବସ୍ଥା ବଦଳରେ ବସକୁ କାହିଁକି ମାଧ୍ୟମ କରିବାକୁ ଚାହୁଁଛନ୍ତି ବିଏମସି ଅଧିକାରୀ?
ସୂଚନା ଅନୁସାରେ, ବସ୍ ରାପିଡ୍ ଟ୍ରାନ୍ସପୋର୍ଟ ସିଷ୍ଟମ୍ ବା ବିଆରଟିଏସ୍କୁ ଭରସା କରୁଛି ନଗର ଉନ୍ନୟନ ବିଭାଗ । ଏନେଇ ଯୋଜନା ଚୁଡାନ୍ତ ପର୍ଯ୍ୟାୟରେ ପହଂଚିଛି । କୁହାଯାଉଛି, ମେଟ୍ରୋ ଟ୍ରେନକୁ ସ୍ମାର୍ଟସିଟିକୁ ଆଣିବା ପାଇଁ କିଛି ଅଧିକାରୀ ଚାହୁଁନାହାନ୍ତି । ହେଲେ ପ୍ରଶ୍ନ ଉଠୁଛି କାହିଁକି?
୨୦୧୮ ସୁଦ୍ଧା ଭୁବନେଶ୍ୱରରେ ବସ୍ ରାପିଡ୍ ଟ୍ରାନ୍ସପୋର୍ଟ ସିଷ୍ଟମ୍ ଆରମ୍ଭ କରିବାକୁ ଚୁଡାନ୍ତ ହୋଇଛି । ସହର ଭିତରେ ୩୦ କିମି ରାସ୍ତାରେ ତିଆରି ହେବ କରିଡର୍, ଏଥିପାଇଁ ଖର୍ଚ୍ଚ ହେବ ୪୬୦ କୋଟି ଟଙ୍କା । ଶିଶୁଭବନ, ବାଣୀବିହାର, ଆଚାର୍ଯ୍ୟବିହାର, ସୈନିକ ସ୍କୁଲ୍, ନାଲକୋ ସ୍କୋୟାର୍ ଓ କିଟ୍ ସ୍କୋୟାର୍ ଯାଏଁ ଏହି ରୁଟ୍ ତିଆରି ହେବ । ପରବର୍ତ୍ତୀ ପର୍ଯ୍ୟାୟରେ ଅନ୍ୟ ମହାନଗର ନିଗମରେ ଏହାକୁ ଲାଗୁ କରିବାକୁ ଯୋଜନା କରାଯାଇଛି ।
କୋଚିରେ ଯଦି କେନ୍ଦ୍ର ରାଜ୍ୟ ସହଭାଗିତାରେ ମେଟ୍ରୋ ଟ୍ରେନ୍ ଚାଲିପାରିଲା, ତେବେ ଭୁବନେଶ୍ୱର ଭଳି ସହରରେ ଗୋଟିଏ ଯୋଜନା ତିଆରି କରିବାରେ ଅସୁବିଧା କେଉଁଠି ରହୁଛି? କରିଡର୍ ତିଆରି କରି ବସ୍ ଗଡାଇବା ଓ ଏଥିପାଇଁ ନୂଆ ବସ୍ କିଣିବା ପାଇଁ ରାଜ୍ୟ ତହବିଲରୁ ଟଙ୍କା ଖର୍ଚ୍ଚ କରିବା ବଦଳରେ କେନ୍ଦ୍ରକୁ ମେଟ୍ରୋଟ୍ରେନ୍ ପାଇଁ ପ୍ରସ୍ତାବ ଦିଆଯିବା ଉଚିତ୍ ନୁହେଁ କି?
ଦେଶରେ ସ୍ମାର୍ଟସିଟିରେ ନମ୍ବର ୧ ଭୁବନେଶ୍ୱର । ସବୁ ଦୃଷ୍ଟିକୋଣରୁ ଏଠି ମେଟ୍ରୋ ଚାଲିବାର ବ୍ୟବସ୍ଥା ଅଛି । ହେଲେ ଅଧିକାରୀ ଚାହୁଁନାହାନ୍ତି ମେଟ୍ରେ। ଗଡୁ । ବିଏମସିର ଜଣେ ବରିଷ୍ଠ ଅଧିକାରୀ ସୂଚନା ଦେଇ କହିଛନ୍ତି, ରାସ୍ତା ତିଆରି କରିବା ଓ ବସ୍ କିଣିବାରେ ହେରଫେର କରିବାର ଯଥେଷ୍ଟ ସୁଯୋଗ ରହିଛି । ଆଉ ମେଟ୍ରୋ ହେଲେ ତମାମ ବ୍ୟବସ୍ଥା ଅଧିକାରୀଙ୍କ ନିୟନ୍ତ୍ରଣରେ ରହିବନି । ତେଣୁ ସହର ପଛରେ ରହୁ, ପକେଟ ଗରମ ନ୍ୟାୟରେ ମେଟ୍ରୋ ଟ୍ରେନ୍ ଅପେକ୍ଷା ବସ୍କୁ ଗୁରୁତ୍ୱ ଦେଉଛନ୍ତି କିଛି ଅମଲା ।
ଟ୍ୱିନ୍ ସିଟି ତୁଳନାରେ ଅପେକ୍ଷାଜୃତ ଛୋଟ ସହରରେ ମଧ୍ୟ ମେଟ୍ରୋ ଚଲାଇବାକୁ କେନ୍ଦ୍ରକୁ ପ୍ରସ୍ତାବ ଦିଆସରିଛି । ତାଲିକାରେ ରହିଛି ଅମରାବତୀ-ବିଜୟୱାଡା । ସେହିପରି ୧୧ଟି ସହର ଚାହୁଁଛନ୍ତି ସେଠାରେ ମେଟ୍ରୋ ଗଡୁ । ହେଲେ ଭୁବନେଶ୍ୱରର ଭାଗ୍ୟ ଲେଖୁଥିବା ଅଧିକାରୀ କିନ୍ତୁ ମେଟ୍ରୋ ଚଲାଇବାକୁ ଅନାଗ୍ରହୀ ।