କନକ ବ୍ୟୁରୋ: ଯେଉଁ ଦୋଷ-ଦୁର୍ବଳତା କରୋନାର ଦ୍ୱିତୀୟ ଲହରରେ ରହିଯାଇଥିଲା, ସେହି ଭୁଲର ଯେମିତି ପୁନରାବୃତ୍ତି ନହେବ, ସେଥିପାଇଁ ଆଗକୁ ପ୍ରସ୍ତୁତ ହେଉଛି ଭାରତ । ବିଏଫ୍-୭ ଭାରିଆଣ୍ଟର ଭୟାବତାକୁ ଦୃଷ୍ଟିରେ ରଖି, ଦେଶର ସମସ୍ତ ପ୍ରମୁଖ ହସ୍ପିଟାଲରେ ହୋଇଛି ମହାମାରୀ ମୁକାବିଲାର ପ୍ରସ୍ତୁତି । ଯଦି ଭାରତରେ ସଂକ୍ରମଣ ବଢ଼େ, ସ୍ଥିତିର ମୁକାବିଲା କେମିତି କରାଯିବ ସେନେଇ ସାରା ଦେଶରେ ହୋଇଛି ମକଡ୍ରିଲ୍ । ଏହି ମକଡ୍ରିଲରେ ଭେଣ୍ଟିଲେଟର ବ୍ୟବସ୍ଥା, ଅକ୍ସିଜେନର ସୁବିଧା, କୋଭିଡ୍ ବେଡ୍, ସଙ୍ଗରୋଧ ଗୃହ, କୋଭିଡ ପରୀକ୍ଷା, ଡାକ୍ତର ଓ ସ୍ୱାସ୍ଥ୍ୟକର୍ମୀଙ୍କ ଉପସ୍ଥିତି, ମହଜୁଦ ଔଷଧ ସମେତ ହସ୍ପିଟାଲ ଭିତ୍ତିଭୂମିର ତଦାରଖ ଓ ଅନୁଧାନ କରାଯାଇଛି ।
Kanak News is now on WhatsApp
Join and get latest news updates delivered to you via WhatsApp
କେନ୍ଦ୍ର ସ୍ୱାସ୍ଥ୍ୟମନ୍ତ୍ରୀ ମନସୁଖ ମାଣ୍ଡଭୀୟ, ଦିଲ୍ଲୀ ସଫଦରଜଙ୍ଗ ହସ୍ପିଟାଲ ଯାଇ କୋଭିଡ ମକଡ୍ରିଲର ସମୀକ୍ଷା କରିଥିବା ବେଳେ ବାରଣାସୀର ଏକ ହସ୍ପିଟାଲକୁ ଯାଇ ସ୍ଥିତିର ଅନୁଧ୍ୟାନ କରିିଥିଲେ ୟୁପି ଉପ-ମୁଖ୍ୟମନ୍ତ୍ରୀ । ଭୁବନେଶ୍ୱର କ୍ୟାପିଟାଲ ହସ୍ପିଟାଲରେ ବି ସ୍ୱାସ୍ଥ୍ୟ ବିଭାଗର ପ୍ରତ୍ୟକ୍ଷ ନିରୀକ୍ଷଣରେ ହୋଇଥିଲା ମକଡ୍ରିଲ୍ ।
ଯଦିଓ ଭାରତର କୋଭିଡ ସ୍ଥିତି ନିୟନ୍ତ୍ରଣରେ ରହିଛି ତଥାପି ସାପ୍ତାହିକ ସଂକ୍ରମଣ ୧୧% ବୃଦ୍ଧିପାଇଛି । ୨ମାସ କ୍ରମାଗତ ସଂକ୍ରମଣ କମିବା ପରେ ଏବେ ମହାରାଷ୍ଟ୍ର, ପଞ୍ଜାବ, ରାଜସ୍ଥାନ, ଦିଲ୍ଲୀ ଓ ହିମାଚଳ ପ୍ରଦେଶରେ ସଂକ୍ରମଣ ସାମାନ୍ୟ ବୃଦ୍ଧି ପାଇଛି । ସୋମବାର ଭାରତ ଫେରିଥିବା ୨୩ଜଣ କରୋନା ଚିହ୍ନଟ ହୋଇଛନ୍ତି । ବେଙ୍ଗାଲୁର, କୋଲକାତା, ବୁଦ୍ଧଗୟାକୁ ଫେରିଥିବା ଏହି ଯାତ୍ରୀଙ୍କ ଚିକିତ୍ସା ଚାଲିଛି । ତେବେ ବିଶ୍ୱର ସ୍ଥିତି ଚିନ୍ତାର କାରଣ ବଢ଼ାଇଛି । ଗତ ସପ୍ତାହରେ ଜାପାନରେ ହାରାହାରି ଏକ ଲକ୍ଷ ୩୦ ହଜାର ମାମଲା ସାମ୍ନାକୁ ଆସିଛି । ଆମେରିକା ଓ ଦକ୍ଷିଣ କୋରିଆରେ ୫୦ ହଜାରରୁ ଅଧିକ ମାମଲା ସାମ୍ନାକୁ ଆସିଥିବା ବେଳେ ଜର୍ମାନୀ, ବ୍ରାଜିଲ ଓ ଫ୍ରାନ୍ସରେ କରୋନା ମାମଲା ୩୦ରୁ ୫୦ ହଜାର ଭିତରେ ରହିଛି ।
ଏସବୁ ଭିତରେ ବିଦେଶ ଫେରନ୍ତାଙ୍କ ଆରଟିପିସିଆର ଟେଷ୍ଟକୁ ବାଧ୍ୟତାମୂଳକ କରାଯାଇଥିବା ବେଳେ ବୁଷ୍ଟର ଡୋଜ୍ ଉପରେ ଗୁରୁତ୍ୱ ଦିଆଯାଇଛି । ସେହିପରି ଭାରତ ବାୟୋଟେକର ନାଜାଲ ଭ୍ୟାକସିନକୁ ମଧ୍ୟ ଅନୁମତି ମିଳିଛି । ଆଉ କର୍ଣ୍ଣାଟକ ସମେତ ଅନ୍ୟ କିଛି ରାଜ୍ୟରେ ମାସ୍କ ପିନ୍ଧିବା, ସାମାଜିକ ଦୂରତା ରକ୍ଷାକରିବା ଭଳି ସତର୍କତା ପାଳନ ପାଇଁ ଜନସାଧାରଣଙ୍କ ପାଇଁ ଗାଇଡଲାଇନ ଜାରି କରାଯାଇଛି ।