କେନ୍ଦ୍ର ବିରୋଧରେ ମମତା ବାନାର୍ଜୀଙ୍କ ମୋର୍ଚ୍ଚା: ଅଣ-ବିଜେପି ଶାସିତ ମୁଖ୍ୟମନ୍ତ୍ରୀ ଓ ବିରୋଧୀଦଳ ନେତାଙ୍କୁ ଚିଠି ଲେଖିଲେ ଦିଦି
କନକ ବ୍ୟୁରୋ: ଅଣବିଜେପି ରାଜ୍ୟର ମୁଖ୍ୟମନ୍ତ୍ରୀ ଏବଂ ସମସ୍ତ ବିରୋଧୀ ଦଳ ନେତାଙ୍କୁ ଚିଠି ଲେଖିଲେ ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ । ଚିଠିରେ ଭାରତୀୟ ଜନତା ପାର୍ଟି ବିରୋଧରେ ଏକଜୁଟ ହୋଇ ଲଢେଇ କରିବାକୁ ନିବେଦନ କରିଛନ୍ତି ମମତା । କେବଳ ସେତିକି ନୁହେଁ ଭାଜପା ବିରୋଧରେ ମୋର୍ଚ୍ଚାକୁ ସୁଦୃଢ କରିବା ପାଇଁ ବୈଠକ କରିବାକୁ ଅପିଲ କରିଛନ୍ତି ବେଙ୍ଗଲର ଦିଦି ।
Kanak News is now on WhatsApp
Join and get latest news updates delivered to you via WhatsApp
କେନ୍ଦ୍ରର ବିଜେପି ସରକାର ବିରୋଧରେ ପୁଣିଥରେ ବିରୋଧୀଙ୍କୁ ଏକଜୁଟ କରିବା ପାଇଁ ଲାଗିପଡିଛନ୍ତି ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ । ଏହି ପରିପ୍ରେକ୍ଷୀରେ ଅଣ-ବିଜେପି ଶାସିତ ରାଜ୍ୟର ମୁଖ୍ୟମନ୍ତ୍ରୀ ଏବଂ ବିରୋଧୀ ଦଳ ନେତାଙ୍କୁ ଚିଠି ଲେଖିଛନ୍ତି ଦିଦି । ଏହି ଚିଠିରେ କେନ୍ଦ୍ର ଭାଜପା ବିରୋଧରେ ଏକତ୍ରିତ ହେବାକୁ କହିଛନ୍ତି ମମତା । ଏହି ଚିଠିରେ ମୁଖ୍ୟମନ୍ତ୍ରୀ ମମତା ବାନାର୍ଜୀ ଲେଖିଛନ୍ତି –
“ଅତ୍ୟାଚାରୀ କେନ୍ଦ୍ର ବିରୋଧରେ ଲଢେଇ ପାଇଁ ସବୁ ପ୍ରଗତିଶୀଳ ଶକ୍ତିକୁ ଏକତ୍ରିତ ହେବାର ସମୟ ଆସିଛି । ସମସ୍ତ ବିରୋଧୀ ଏକଜୁଟ ହେଲେ ଦେଶବାସୀଙ୍କୁ ତାଙ୍କ ମନପସନ୍ଦର ସରକାର ମିଳି ପାରିବ । କେନ୍ଦ୍ରର ମୋଦୀ ସରକାର ପ୍ରବର୍ତନ ନିର୍ଦ୍ଦେଶାଳୟ, ସିବିଆଇ, ଆୟକର ବିଭାଗ ଭଳି ସବୁ କେନ୍ଦ୍ରୀୟ ସଂସ୍ଥା ଗୁଡିକର ଦୁରୁପଯୋଗ କରୁଛି । ବିଜେପି ଏହି ସଂସ୍ଥା ଗୁଡିକର ଉପଯୋଗ ନିଜ ଫାଇଦା ପାଇଁ କରୁଛି । ଆମକୁ ବିଜେପିର ଏଭଳି କାର୍ଯ୍ୟକୁ ମିଳିମିଶି ବିରୋଧ କରିବା ଉଚିତ୍ ।”
ବୀରଭୂମ ହିଂସାକାଣ୍ଡକୁ ନେଇ ଏବେ କେନ୍ଦ୍ର ସରକାର ପଶ୍ଚିମବଙ୍ଗ ମୁଖ୍ୟମନ୍ତ୍ରୀଙ୍କ ଉପରେ ଚାପ ସୃଷ୍ଟି କରୁଥିବା ଦେଖିବାକୁ ମିଳୁଛି । ଘଟଣାର ତଦନ୍ତ ଭାର ସିବିଆଇ ହାତକୁ ଯିବା ପରେ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କ ତରଫରୁ ବିଜେପି ବିରୋଧରେ ଏହି ଉଦ୍ୟମ କରାଯାଇଥିବା କୁହାଯାଉଛି ।
ପଶ୍ଚିମବଙ୍ଗ ବୀରଭୂମ ହିଂସାକାଣ୍ଡକୁ ନେଇ ବିଜେପି ବନାମ – ଟିଏମସି ବୟାନବାଜି ଜାରି ରହିଛି । ହିଂସାକାଣ୍ଡକୁ ନେଇ ପରସ୍ପରକୁ ଆରୋପ – ପ୍ରତ୍ୟାରୋପ କରିବାରେ ଲାଗିଛନ୍ତି ଉଭୟ ଦଳ ନେତା । ମଙ୍ଗଳବାର ମମତା ବାନାର୍ଜୀଙ୍କୁ ଟାର୍ଗେଟ କରି ବିଜେପି ରାଷ୍ଟ୍ରୀୟ ପ୍ରବକ୍ତା କହିଛନ୍ତି – ଭଲ ହୋଇଛି ଘଟଣାର ତଦନ୍ତ ସିବିଆଇକୁ ହସ୍ତାନ୍ତର କରାଯାଇଛି । କୋଲକତା ହାଇକୋର୍ଟ ଭାବିଚିନ୍ତି ଏହି ନିର୍ଦ୍ଦେଶ ଦେଇଛନ୍ତି । କୋର୍ଟ ମଧ୍ୟ ଜାଣିଛନ୍ତି- ପଶ୍ଚିମ ବଙ୍ଗରେ ନାୟ ମିଳିବା ଅସମ୍ଭବ ।
ଗତ ୨୧ ମାର୍ଚ୍ଚରେ ବୀରଭୂମରେ ୧୦ ଜଣଙ୍କୁ ଅମାନବୀୟ ନିର୍ଜାତନା ଦେବା ପରେ କୋଠରି ବନ୍ଦ କରି ନିଆଁ ଲଗାଇଦେଇଥିଲେ ଟିଏମସି ସମର୍ଥକ । ଘଟଣାରେ ମୁଖ୍ୟ ଅଭିଯୁକ୍ତ ସମେତ ୨୦ ଜଣଙ୍କୁ ପୁଲିସ ଗିରଫ କରିଛି । ଶୁକ୍ରବାର ମାମାଲା ସିବିଆଇ କୁ ହସ୍ତାନ୍ତର କରାଯାଇଛି ।