ମହାରାଷ୍ଟ୍ର ଓ ଦିଲ୍ଲୀରେ ରକେଟ ଭଳି ମାଡୁଛି କରୋନା । ହେଲେ ଲକଡାଉନ୍ ସପକ୍ଷରେ ନାହାଁନ୍ତି ଦୁଇ ରାଜ୍ୟର ମୁଖ୍ୟମନ୍ତ୍ରୀ ।
କନକ ବ୍ୟୁରୋ: ଦିଲ୍ଳୀ ଓ ମହାରାଷ୍ଟ୍ରରେ କରୋନା ସଂକ୍ରମଣ ଦ୍ରୁତ ଗତିରେ ମାଡି ଚାଲିଛି । ମହାରାଷ୍ଟ୍ରରେ ଦୈନିକ ୪୦ ହଜାରରୁ ଅଧିକ ଆକ୍ରାନ୍ତ ଚିହ୍ନଟ ହେଉଥିବାବେଳେ ଦିଲ୍ଲୀରେ ଦୈନିକ ୨୦ ହଜାରରୁ ଅଧିକ ସଂକ୍ରମିତ ଚିହ୍ନଟ ହେଉଛନ୍ତି । ହେଲେ, ଦୁଇ ରାଜ୍ୟର ମୁଖ୍ୟମନ୍ତ୍ରୀ ଲକଡାଉନ ସପକ୍ଷରେ ନାହାଁନ୍ତି, କେବଳ ସତର୍କ ରହିବାକୁ ପରାମର୍ଶ ଦେଇଛନ୍ତି । ତେବେ କଣ ରହିଛି ଦୁଇ ରାଜ୍ୟ ମୁଖ୍ୟଙ୍କ ଆଭିମୁଖ୍ୟ…
Kanak News is now on WhatsApp
Join and get latest news updates delivered to you via WhatsApp
କରୋନାରେ ସଂକ୍ରମିତ ହୋଇ ସୁସ୍ଥ ହେବା ପରେ ଦିଲ୍ଳୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲଙ୍କ କେଇପଦ କଥା ଆଶ୍ୱସ୍ତି ଆଣିଦେଇଛି । ତୃତୀୟ ଲହରର ଭୟ, ଲକଡାଉନ ସଟଡାଉନର ଆଶଙ୍କାରେ ଥିବା ଜନସାଧାରଣଙ୍କ ପାଇଁ କେଜ୍ରିୱାଲଙ୍କ ବୟାନ ଅନେକ ବାର୍ତା ରଖୁଛି । ସେ ସତର୍କ କରିଛନ୍ତି, କିନ୍ତୁ ଭୟଭୀତ ନହେବାକୁ ପରାମର୍ଶ ଦେଇଛନ୍ତି । ଦ୍ୱିତୀୟ ଲହର ସହ ବର୍ତମାନର ସ୍ଥିତିକୁ ତୁଳନା କରି କହିଛନ୍ତି, କରୋନାର ଦ୍ୱିତୀୟ ଲହର ସମୟରେ ମେ ୭ରେ ଦିଲ୍ଳୀରେ ଯେତିକି ସଂକ୍ରମିତ ଚିହ୍ନଟ ହୋଇଥିଲେ, ଏବେ ଦିଲ୍ଳୀରେ ଦିନକୁ ପ୍ରୟ ସେତିକି ସଂକ୍ରମିତ ଚିହ୍ନଟ ହେଉଛନ୍ତି । କିନ୍ତୁ ପାର୍ଥକ୍ୟ ହେଉଛି ମେ ୭ରେ ସେତେବେଳେ ୩୪୧ଜଣଙ୍କର ମୃତ୍ୟୁ ହୋଇଥିଲା ଏବେ ମାତ୍ର ୭ଜଣଙ୍କର ଜୀବନ ଯାଇଛି ।
ସେତେବେଳେ ହସ୍ପିଟାଲର ପ୍ରାୟ ୨୦ ହଜାର ବେଡ୍ ଭର୍ତି ହୋଇଯାଇଥିଲା । ଏବେ ମାତ୍ର ଦେଢ଼ ହଜାର ବେଡ୍ ଭର୍ତି ହୋଇ ରହିଛି । ଲୋକ ମାସ୍କ ପିନ୍ଧିଲେ ଦିଲ୍ଳୀରେ ଲକଡାଉନର ଆବଶ୍ୟକତା ପଡିବ ନାହିଁ । ଅର୍ଥାତ ମୃତ୍ୟୁ କମ ହେଉଛି ଓ କମ ଲୋକଙ୍କୁ ଡାକ୍ତରଖାନାକୁ ଯିବାକୁ ପଡୁଛି ବୋଲି ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ କହିଛନ୍ତି ।
ଅନ୍ୟପଟେ ଦେଶରୁ ଦୈନିକ ଯେତିକି ସଂକ୍ରମିତ ଚିହ୍ନଟ ହେଉଛନ୍ତି ସବୁଠାରୁ ଅଧିକ ଆକ୍ରାନ୍ତ ମହାରାଷ୍ଟ୍ରରୁ ଚିହ୍ନଟ ହେଉଛନ୍ତି । ଏହାକୁ ନିୟନ୍ତ୍ରଣ ପାଇଁ ରାଜ୍ୟରେ ସୋମବାରଠାରୁ ନାଇଟ କର୍ଫ୍ୟୁ ଲାଗୁ ହେବ । ହୋଟେଲ, ସପିଂ ମଲ, ଅଡିଟୋରିୟମ ୫୦ ପ୍ରତିଶତ କ୍ଷମତାରେ ଚାଲିବ । ଜିମ୍ ଓ ସେଲୁନ ବନ୍ଦ ରହିବ । ଚିଡ଼ିଆଖାନା ଓ ସଂଗ୍ରହାଳୟ ବନ୍ଦ ରହିବ । ୫ ଜଣରୁ ଅଧିକଙ୍କୁ ଏକାଠି ହେବା ଉପରେ କଟକଣା ଲଗାଯାଇଛି । କିନ୍ତୁ ଲକଡାଉନ ସପକ୍ଷରେ ନାହାଁନ୍ତି ମହାରାଷ୍ଟ୍ର ସରକାର ।
ଏନେଇ ଟୁଇଟ୍ କରି ସ୍ପଷ୍ଟ କରିଛନ୍ତି ମହାରାଷ୍ଟ୍ର ମୁଖ୍ୟମନ୍ତ୍ରୀ ଉଦ୍ଧବ ଠାକରେ । କହିଛନ୍ତି, ସରକାର ଲକଡାଉନ କରିବାକୁ ଚାହୁଁନାହାନ୍ତି । କିନ୍ତୁ ଅନାବଶ୍ୟକ ଭାବେ ଭିଡ଼ ନକରିବା ଉଚିତ୍ । କୋଭିଡ୍ ନିୟମ କଡ଼ାକଡ଼ି ପାଳନ ନକଲେ କୌଣସି କଟକଣା ଫଳପ୍ରଦ ହେବ ନାହିଁ । ତେବେ ଲକ୍ଷଣ ଆସିଲେ ତୁରନ୍ତ ଡାକ୍ତରଙ୍କ ପରାମର୍ଶ ନିଅନ୍ତୁ ବୋଲି ସେ କହିଛନ୍ତି । ତେବେ ଦେଶର ଅନ୍ୟ ଯେଉଁ ରାଜ୍ୟମାନେ ଲକଡାଉନ ଲଗାଇବା ପାଇଁ ଚିନ୍ତା କରୁଛନ୍ତି ସେମାନଙ୍କ ପାଇଁ ଉଦ୍ଧବ ଓ କେଜ୍ରିୱାଲଙ୍କ ମତ ବେଶ ଗୁରୁତ୍ୱ ରଖୁଛି ।