ଇମ୍ରାନଙ୍କ ବୟାନକୁ ନେଇ ଚର୍ଚ୍ଚା । କହିଲେ, ଗୁଳିମାଡ ପଛରେ ୩ ବ୍ୟକ୍ତିଙ୍କ ହାତ ! ଗୁଇନ୍ଦା ମୁଖ୍ୟଙ୍କ ସମ୍ପୃକ୍ତି ଅଭିଯୋଗ
କନକ ବ୍ୟୁରୋ : ଗୁଳିମାଡ଼ରେ ଗୁରୁତର ହେବା ପରେ ପାକିସ୍ତାନର ପୂର୍ବତନ ପ୍ରଧାନମନ୍ତ୍ରୀ ଇମ୍ରାନ ଖାନ୍ ଆକ୍ରମଣ ନେଇ ଯେଉଁ ବୟାନ ଦେଇଛନ୍ତି ତାକୁ ନେଇ କେବଳ ପାକିସ୍ତାନ ନୁହେଁ ଭାରତରେ ମଧ୍ୟ ଚର୍ଚ୍ଚା ହେଉଛି । ସେ ଜାଣିଥିଲେ ତାଙ୍କ ଉପରେ ଆକ୍ରମଣ ହେବାକୁ ଯାଉଛି । ଏବଂ ଏହି ଆକ୍ରମଣ ପଛରେ ପାକିସ୍ତାନର ପ୍ରଧାନମନ୍ତ୍ରୀ ସେହବାଜ୍ ସରିଫ, ଆଭ୍ୟନ୍ତରୀଣ ସୁରକ୍ଷା ମନ୍ତ୍ରୀ ରାଣା ସନାଉଲ୍ଲା ଏବଂ ପାକିସ୍ତାନର ଗୁଇନ୍ଦା ସଂସ୍ଥା ଆଇଏସ୍ଆଇ ମୁଖ୍ୟ ଫୈଜଲ ନାସୀରଙ୍କ ହାତ ଥିବା ନେଇ ଅଭିଯୋଗ ଆଣିଛନ୍ତି ଇମ୍ରାନ୍ । ତାଙ୍କ ଦଳର ଏକାଧିକ ନେତାଙ୍କୁ ଧମକପୂର୍ଣ୍ଣ ଫୋନ ଆସିଥିବା ବେଳେ ତାଙ୍କୁ ଜୀବନରୁ ମାରିଦେବା ପାଇଁ ଉଦ୍ୟମ କରାଯାଇଥିଲା ବୋଲି ସେ କହିଛନ୍ତି । ଆଉ ଇମ୍ରାନଙ୍କ ଏହି ବୟାନ ପରେ ପାକିସ୍ତାନରେ ପରିସ୍ଥତି ଉତେଜନାପୂର୍ଣ୍ଣ ରହିଛି । ଇମ୍ରାନଙ୍କ ହଜାର ହଜାର ସମର୍ଥକ ରାସ୍ତାକୁ ଓହ୍ଲାଇବା ସହ ପୋଲିସ ସହ ମୁହାଁମୁହିଁ ହୋଇଛନ୍ତି । ସ୍ଥିତି ଅଣାୟତ ହେବାରୁ ଇସଲାମାବାଦରେ ଅନିର୍ଦ୍ଦିଷ୍ଟ କାଳ ପାଇଁ ଲକ୍ଡାଉନ ଜାରି କରାଯାଇଛି ।
Kanak News is now on WhatsApp
Join and get latest news updates delivered to you via WhatsApp
ଇମ୍ରାନ ଖାନ୍ ଶୁକ୍ରବାର ଲାହୋରରେ ଚିକିତ୍ସିତ ହେଉଥିବା ହସ୍ପିଟାଲରୁ ସାମ୍ବାଦିକ ସମ୍ମିଳନୀ କରି ତାଙ୍କୁ ଜୀବନରୁ ମାରି ଦେବାକୁ ୪ ଜଣ ବ୍ୟକ୍ତିଙ୍କୁ ନିୟୋଜିତ କରାଯାଇଥିବା କହିଥିଲେ । ଏବଂ ସେହି ୪ ଜଣ ବ୍ୟକ୍ତି ନାମ କହି ଏକ ଭିଡିଓ କରିବା ସହ ଆକ୍ରମଣର ଯୋଜନା ବିଦେଶରୁ ହୋଇଥିବା କହିଥିଲେ । ଯଦି ତାଙ୍କ ପ୍ରତି ବିପଦ ଆସେ ତେବେ ସେ ଉକ୍ତ ଭିଡିଓ ରିଲିଜ କରିଦେବେ ବୋଲି କହିଥିଲେ ପିଟିଆଇ ଅଧ୍ୟକ୍ଷ । ତେବେ ଆକ୍ରମଣ ପଛରେ ଆଇଏସଆଇ ଜେନେରାଲ ଫେଜଲଙ୍କ ହାତ ଥିବା ଅଭିଯୋଗକୁ ଖଣ୍ଡନ କରି ପାକିସ୍ତାନ ସେନା କହିଛି, ଇମ୍ରାନଙ୍କ ଏଭଳି ବୟାନ ସମ୍ପୁର୍ଣ୍ଣ ଭିତ୍ତିିହୀନ ଏବଂ ବେପରୁଆ । ବିନା ପ୍ରମାଣରେ ବରିଷ୍ଠ ସେନା ଅଧିକାରୀଙ୍କ ସମ୍ପୃକ୍ତି ଥିବା ଅଭିଯୋଗ ଆଣିବା ଆଦୌ ଗ୍ରହଣୀୟ ନୁହେଁ ।
ପାକିସ୍ତାନର ରାଜଧାନୀ ଇସଲାମବାଦ, ବେଲୁଚିସ୍ତାନ, ପେଶାୱର ଆଦି ପ୍ରଦେଶରେ ପିଟିଆଇ କର୍ମୀ ବିକ୍ଷୋଭ ଜାରି ରଖିଥିବା ବେଳେ ପରିସ୍ଥିତି ଜଟିଳ ହେବାରେ ଲାଗିଛି । ବାସ୍ତବରେ ଇମ୍ରାନଙ୍କ ଆକ୍ରମଣ ପଛରେ କାହାର ହାତ ତାହା ନିରପେକ୍ଷ ତଦନ୍ତ ହେଲେହିଁ ଜଣାପଡିବ ।