ଭାରତକୁ ଏକ ନମ୍ବର ନ କରିବା ଯାଏଁ ଚୁପ୍ ବସିବୁ ନାହିଁ । ୭୫ ବର୍ଷ ହେବ କୌଣସି ସରକାର କିଛି କରିନାହାନ୍ତି, କେଜ୍ରିୱାଲ ମାରିଲେ ରାଜନୀତି ବାଣ ।
କନକ ବ୍ୟୁରୋ : ଦିଲ୍ଲୀ ମୁଖ୍ୟମନ୍ତ୍ରୀ ତଥା ଆପ୍ ନେତା ଅରବିନ୍ଦ କେଜ୍ରିୱାଲ ମେକ ଇଣ୍ଡିଆ ନମ୍ବର ୱାନ’ କ୍ୟାମ୍ପେନ ଆରମ୍ଭ କରିଛନ୍ତି । ଆଉ କହିଛନ୍ତି, ଯେତେବେଳ ଯାଏଁ ଭାରତକୁ ଏକ ନମ୍ବର ଦେଶ ଭାବେ ଗଢି ନ ତୋଳିବା ସେତେବେଳ ଯାଏଁ ଆରାମ କରିବାନି । ଏହା ଆମକୁ ପଣ କରିବାକୁ ପଡିବ । ଏଥିପାଇଁ ମୁଁ ପୂରା ଦେଶ ବୁଲିବି, ଲୋକଙ୍କ ସହ ମିଶିବି । ଆଉ ଏଥିପାଇଁ ୧୩୦ କୋଟି ଲୋକଙ୍କୁ ଯୋଡିବାକୁ ଚେଷ୍ଟା କରିବି, ଆଉ ୧୩୦ କୋଟି ଦେଶବାସୀ ଏକାଠି ହେଲେ ଭାରତକୁ ଏକ ନମ୍ବର ହେବାରୁ କେହି ଅଟକାଇ ପାରିବେନି । ଏହାସହ କ୍ରେଜିୱାଲ କହିଛନ୍ତି, ସ୍ୱାଧୀନତାକୁ ୭୫ ବର୍ଷ ପୂରିଛି, ଏହି ୭୫ ବର୍ଷ ଭିତରେ ଭାରତ ଅନେକ କିଛି ହାସଲ କରିଛି । କିନ୍ତୁ ଲୋକଙ୍କ ମନରେ ଏବେ ବି କ୍ଷୋଭ ଓ ପ୍ରଶ୍ନ ରହିଛି, ଆମ ପରେ ସ୍ୱାଧୀନତା ହାସଲ କରିଥିବା ଦେଶ କିଭଳି ଆଗେଇ ଗଲେ । ଭାରତ କାହିଁକି ପଛରେ ରହିଲା, ଏହା ଏବେ ପ୍ରତି ଭାରତୀୟଙ୍କ ପ୍ରଶ୍ନ ।
Kanak News is now on WhatsApp
Join and get latest news updates delivered to you via WhatsApp
କେଜ୍ରିୱାଲ କହିଛନ୍ତି, ସିଙ୍ଗାପୁର ଆମ ଠାରୁ ୧୫ ବର୍ଷ ପରେ ସ୍ୱାଧୀନ ହେଲା କିନ୍ତୁ ଏହାସତ୍ତେ୍ୱ ମଧ୍ୟ ଆମ ଠାରୁ ଆଗରେ ରହିଛି । ଦ୍ୱିତୀୟ ବିଶ୍ୱଯୁଦ୍ଧ ସମୟରେ ଜାପାନ ପୂରା ଧ୍ୱସ୍ତବିଧ୍ୱସ୍ତ ହୋଇଥିଲା କିନ୍ତୁ ଏବେ ଭାରତ ଠାରୁ ବେଶ ବିକଶିତ ଜାପାନ । ଭାରତରେ ବିଶ୍ୱର ସବୁଠୁ ପରିଶ୍ରମୀ ଓ ଜ୍ଞାନୀ ଲୋକ ରହିଛନ୍ତି ତଥାପି ଆମେ ପଛରେ କାହିଁକି?
ଭଗବାନ ଭାରତକୁ ବହୁତ କିଛି ପ୍ରଦାନ କରିଛନ୍ତି । ପ୍ରାକୃତିକ ସମ୍ପଦରେ ଭାରତ ଭରପୂର । ଦୀର୍ଘ ଜଳରାଶି ସାଙ୍ଗକୁ ପ୍ରାକୃତିକ ସମ୍ପଦ ଭାରତର ସବୁଠୁ ବଡ ଶକ୍ତି । ଏପରିକି ଭାରତରେ ସବୁଠୁ ଜ୍ଞାନୀ ଲୋକ ଜନ୍ମ ନେଇଛନ୍ତିି । କିନ୍ତୁ ଯଦି ଏହି ନେତାଙ୍କ ଭରସାରେ ଦେଶକୁ ଛାଡିଦିଆଯିବ ତେବେ ଭାରତ ଆହୁରି ୭୫ ବର୍ଷ ପଛରେ ରହିବ । କାରଣ ଏହି ନେତାଙ୍କ ପାଇଁ ପରିବାର ଦେଶଠୁ ବି ଉପରେ । ଦେଶକୁ ଲୁଟିବାକୁ ଭଷ୍ଟ୍ରାଚାର କରିବାକୁ ପଛାନ୍ତି ନାହିଁ ଏମାନେ । ଏହି ୭୫ ବର୍ଷରେ ଏହି ନେତା ମାନେ ନିଜର ଓ ନିଜ ବନ୍ଧୁଙ୍କ ପକେଟ ଗରମ କରିବା ଛଡା କିଛି ବି କରିନାହାନ୍ତି । ଆମ ଦେଶରେ ଦକ୍ଷ ଇଞ୍ଜିନିୟରଳ ଦକ୍ଷ ଡାକ୍ତର, ଦକ୍ଷ ବୈଜ୍ଞାନିକ, ଦକ୍ଷ ଚାଷୀ ଅଛନ୍ତି ତେଣୁ ଆମ ଦେଶ କାହିଁକି ପଛରେ ରହିବ? ତେଣୁ ଆମ ଦେଶକୁ ଆଗକୁ ନେବାକୁ ହେଲେ ୧୩୦ କୋଟି ଲୋକଙ୍କୁ ଏକାଠି ହେବାକୁ ପଡିବ ।