କନକ ବ୍ୟୁରୋ : ଓଡିଶା ପାଇଁ ଗୌରବର ଦିନ । ସୁପ୍ରିମକୋର୍ଟର ପ୍ରଧାନ ବିଚାରପତି ଭାବେ ଆଜି ଶପଥ ନେଇଛନ୍ତି ଜଷ୍ଟିସ ଦୀପକ ମିଶ୍ର । ତୃତୀୟ ଓଡିଆ ଭାବେ ଏହି ସମ୍ମାନଜନକ ପଦରେ ବସିଛନ୍ତି ଜଷ୍ଟିସ ମିଶ୍ର । ଦେଶର ୪୫ ତମ ପ୍ରଧାନ ବିଚାରପତି ଭାବେ ଦାୟିତ୍ୱ ଗ୍ରହଣ କରିଥିବା ଜଷ୍ଟିସ ମିଶ୍ର ଅକ୍ଟୋବର ୨, ୨୦୧୮ ଯାଏଁ ଦୀପକ ମିଶ୍ର ଏହି ପଦରେ ରହିବେ ।
Kanak News is now on WhatsApp
Join and get latest news updates delivered to you via WhatsApp
ଓଡିଶା ଜନ୍ମିତ ଜଷ୍ଟିସ ଦୀପକ ମିଶ୍ର, ଓଡିଶା ହାଇକୋର୍ଟରେ ଅତିରିକ୍ତ ଜଜ୍ ଭାବେ ନିଜ କ୍ୟାରିୟର୍ ଆରମ୍ଭ କରିଥିଲେ । ପରେ ପଟନା ହାଇକୋର୍ଟ ଏବଂ ଦିଲ୍ଲୀ ହାଇକୋର୍ଟର ମୁଖ୍ୟ ବିଚାରପତି ଭାବେ ମଧ୍ୟ ଦାୟିତ୍ୱ । ଏକାଧିକ ଐତିହାସିକ ଶୁଣାଣୀ ପାଇଁ ଚର୍ଚ୍ଚାରେ ରହିଥିବା ଜଷ୍ଟିସ ମିଶ୍ର ୩, ଅକ୍ଟୋବର ୨୦୧୮ରେ ଅବସର ନେବେ । ୧୩ ମାସର ତାଙ୍କ କାର୍ଯ୍ୟକାଳ ଉପରେ ଓଡିଶା ସମେତ ସମଗ୍ର ଦେଶର ରହିବ ନଜର ।
ଜଷ୍ଟିସ୍ ରଙ୍ଗନାଥ ମିଶ୍ର, ଜଷ୍ଟିସ୍ ଗୋପାଳବଲ୍ଲଭ ପଟ୍ଟନାୟକଙ୍କ ପରେ ତୃତୀୟ ଓଡିଆଭାବେ ଜଷ୍ଟିସ ଦୀପକ ମିଶ୍ର ସୁପ୍ରିମକୋର୍ଟର ପ୍ରଧାନ ବିଚାରପତି ଭାବେ ଶପଥ ନେଇଛନ୍ତି । ପାଟନା ହାଇକୋର୍ଟ ଓ ଦିଲ୍ଲୀ ହାଇକୋର୍ଟ ପୂର୍ବତନ ବିଚାରପତି ଥିବା ଜଷ୍ଟିସ୍ ମିଶ୍ର ବହୁ ଐତିହାସିକ ରାୟରେ ତାଙ୍କର ପାରଦର୍ଶିତା ଦେଖାଇଛନ୍ତି ।
୨୦୧୫ ଜୁଲାଇରେ ୟାକୁବ ମେମନ ଫାଶୀ ଦଣ୍ଡାଦେଶ ସମୟରେ ରାତି ଅଧରେ ଲେଖାଯାଇଥିବା ଫାଶୀ ଦଣ୍ଡାଦେଶ ଘଟଣାରେ ପ୍ରମୁଖ ଥିଲେ ଜଷ୍ଟିଶ୍ ଦୀପକ ମିଶ୍ର । ସେହିପରି ୨୦୧୬ ନଭେମ୍ବରରେ ଜଷ୍ଟିସ ଦୀପକ ମିଶ୍ର ମୁଖ୍ୟ ରହିଥିବା ଖଣ୍ଡପୀଠ ଆଦେଶ ଦେଲେ, ଦେଶର ସମସ୍ତ ସିନେମା ହଲ୍ରେ ସିନେମା ପୂର୍ବରୁ ଜାତୀୟ ସଙ୍ଗୀତ ପ୍ରସାରିତ ହେବ । ଏହିଭଳି କିଛି ଐତିହାସିକ ରାୟ ଦେଇ ଭାରତୀୟ ନ୍ୟାୟିକ ବ୍ୟବସ୍ଥାର ଗୌରବକୁ ଅକ୍ଷୁର୍ଣ୍ଣ ରଖିଛନ୍ତି ଜଷ୍ଟିସ୍ ଦୀପକ ମିଶ୍ର ।
ରବିବାର ସୁପ୍ରିମକୋର୍ଟର ମୁଖ୍ୟ ବିଚାରପତି ଜଷ୍ଟିସ୍ ଜେ.ଏସ୍. ଖେହରଙ୍କ କାର୍ଯ୍ୟକାଳ ପୂରିବା ପରେ ସୋମବାର ଦିନ ଏହି ୬୪ ବର୍ଷିୟ ସବୁଠାରୁ ବରିଷ୍ଠ ବିଚାରପତିଙ୍କୁ ରାଷ୍ଟ୍ରପତି ରାମନାଥ କୋବିନ୍ଦ ଶପଥ ପାଠ କରାଇଛନ୍ତି । ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ତାଙ୍କୁ ଶୁଭେଚ୍ଛା ଜଣାଇଛନ୍ତି ଏବଂ କହିଛନ୍ତି ତାଙ୍କର କାର୍ଯ୍ୟକାଳ ଫଳପ୍ରଦ ହେଉ ।
୨୦୧୮ ଅକ୍ଟୋବର ୨ରେ କାର୍ଯ୍ୟକାଳ ସରୁଥିବା ଜଷ୍ଟିସ୍ ଦୀପକ ମିଶ୍ରଙ୍କୁ ଏକ ଗୁରୁତ୍ୱପୂର୍ଣ୍ଣ ସମୟ ଅପେକ୍ଷା କରିଛି । କାରଣ ତାଙ୍କର କାର୍ଯ୍ୟକାଳ ଭିତରେ ବାବରୀ ମସଜିଦ୍, ଆଧାର କାର୍ଡରେ ଗୋପନୀୟତାର ମାମଲା, କାବେରୀ ଜଳ ବିବାଦ, ପାନାମା ପେପର ଲିକ ଏବଂ ବିସିସିଆଇରେ ସଂସ୍କାର ପରି ଗୁରୁତ୍ୱପୂର୍ଣ୍ଣ ମାମଲାର ରାୟ ଆସିବାର ଅଛି ।