ଏସିଆରେ ଭାରତ ସବୁଠୁ ଦୁର୍ନୀତିଗ୍ରସ୍ତ
କନକ ବ୍ୟୁରୋ: ମୋଦି ସରକାର ଦୁର୍ନୀତି ରୋକିବାରେ ସଫଳ ହୋଇଥିବା ଦାବି କରୁଥିବା ବେଳେ ଫୋର୍ବସ ପକ୍ଷରୁ ଜାରି କରାଯାଇଥିବା ତାଲିକାରେ ଏସୀୟ ରାଷ୍ଟ୍ରମାନଙ୍କ ମଧ୍ୟରେ ଭାରତ ଦୁର୍ନୀତିରେ ଏକନମ୍ବର ସ୍ଥାନରେ ରହିଛି । ଟ୍ରାନସପାରେନ୍ସି ଇଣ୍ଟରନ୍ୟାସନାଲ ନାମକ ଏକ ବିଶ୍ୱ ଦୁର୍ନୀତି ନିବାରଣ ସାମାଜିକ ସଂଗଠନ ସଂସ୍ଥାର ସର୍ବେକ୍ଷଣ ଆଧାରରେ ଫୋର୍ବସ ଏହି ତାଲିକା ପ୍ରକାଶ କରିଛି । ଫୋର୍ବସ ପକ୍ଷରୁ ଏସିଆର ପାଞ୍ଚଟି ଦୁର୍ନୀତିଗ୍ରସ୍ତ ରାଷ୍ଟ୍ର ତାଲିକାରେ ଭାରତ, ଭିଏତନାମ, ଥାଇଲାଣ୍ଡ, ପାକିସ୍ତାନ ଓ ମିଆଁମାର ରହିଛନ୍ତି । ଲାଞ୍ଚ ମାମଲାରେ ଭାରତ ୬୯ପ୍ରତିଶତ ସହ ପ୍ରଥମ ସ୍ଥାନରେ ରହିଛି ।
Kanak News is now on WhatsApp
Join and get latest news updates delivered to you via WhatsApp
ସ୍କୁଲ, ଡାକ୍ତରଖାନା, ପରିଚୟପତ୍ର, ପୁଲିସ ଏବଂ ଅତ୍ୟାବଶ୍ୟକ ସେବା ଭଳି ୬ଟି ମୌଳିକ ସେବା କ୍ଷେତ୍ରରେ ସର୍ବାଧିକ ଲାଞ୍ଚ ଦେବାକୁ ପଡ଼ିଥାଏ ବୋଲି ସର୍ବେକ୍ଷଣରେ ଭାଗ ନେଇଥିବା ଅର୍ଦ୍ଧାଧିକ ବ୍ୟକ୍ତି ପ୍ରକାଶ କରିଛନ୍ତି । ସ୍ୱାସ୍ଥ୍ୟସେବା କ୍ଷେତ୍ରରେ ସର୍ବାଧିକ ୫୯ପ୍ରତିଶତ, ସ୍କୁଲମାନଙ୍କରେ ୫୮ ପ୍ରତିଶତ ଓ ପୁଲିସରେ ୫୪ ପ୍ରତିଶତ କ୍ଷେତ୍ରରେ ଲାଞ୍ଚ ଦେବାକୁ ପଡ଼ିଥାଏ ବୋଲି ଉଲ୍ଲେଖ ହୋଇଛି । ତେବେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଦୁର୍ନୀତି ବିରୋଧରେ ସଂଗ୍ରାମ ନେଇ ଏଥଇରେ ପ୍ରଶଂସା କରାଯାଇଛି । ଏହି ଅଭିଯାନ ଠିକ୍ ଭାବେ ଗତି କରୁଥିବା ୫୩ପ୍ରତିଶତ ବ୍ୟକ୍ତି ଜଣାଇଛନ୍ତି ।
ଏହା ଲୋକଙ୍କ ମଧ୍ୟରେ ଚେତନା ସୃଷ୍ଟି କରିଥିବା ବେଳେ ସାଧାରଣ ଜନତା ବ୍ୟାପକ ପରିବର୍ତ୍ତନ ଆଣି ପାରିବେ ବୋଲି ୬୩ପ୍ରତିଶତ ବ୍ୟକ୍ତି ମତବ୍ୟକ୍ତ କରିଛନ୍ତି । ଲାଞ୍ଚ ମାମଲାରେ ୬୫ ପ୍ରତିଶତ ସହ ଭିଏତନାମ ଦ୍ୱିତୀୟ ସ୍ଥାନରେ ରହିଛି । ସେହିପରି ୪ନଂ ସ୍ଥାନରେ ରହିଥିବା ପାକିସ୍ତାନରେ ୪୦ପ୍ରତିଶତ ଲାଞ୍ଚ କାରବାର ହୋଇଥିବା କୁହାଯାଇଛି । ସେଠାରେ ପୁଲିସ ସବୁଠାରୁ ଦୁର୍ନୀତିଗ୍ରସ୍ତ ବୋଲି କୁହାଯାଇଛି ।
ଏସିଆ-ପ୍ରଶାନ୍ତ ମହାସାଗରୀୟ ଅଞ୍ଚଳର ୧୬ଟି ଦେଶର ବିଭିନ୍ନ ସ୍ଥାନରେ ଦୀର୍ଘ ୧୮ମାସ ଧରି ୨୦ହଜାରରୁ ଅଧିକ ଲୋକଙ୍କ ମତାମତକୁ ନେଇ ସର୍ବେକ୍ଷଣ କରାଯାଇଥିଲା । ଜାରି ହୋଇଥିବା ତାଲିକା ୨୦୧୭ ମାର୍ଚ ପର୍ଯ୍ୟନ୍ତ ସଂଗୃହୀତ ତଥ୍ୟ ଆଧାରରେ ପ୍ରସ୍ତୁତ କରାଯାଇଛି। ବର୍ଲିନର ଏହି ସଂସ୍ଥା ଦ୍ୱାରା ଦୁର୍ନୀତି ଧାରଣା ସୂଚକାଙ୍କ ତାଲିକାରେ ଥିବା ବିଶ୍ୱର ୧୬୮ଟି ଦୁର୍ନୀତିଗ୍ରସ୍ତ ରାଷ୍ଟ୍ର ତାଲିକାରେ ଗତବର୍ଷ ଭାରତ ୭୬ତମ ସ୍ଥାନରେ ରହିଥିଲା ।