ପାକିସ୍ତାନ ସେନାକୁ ଭାରତୀୟ ସେନାର ସନ୍ଦେଶ : ଧଳା ପତାକା ଧରିକି ଆସ, ମୃତଦେହ ପଡିଛି ଉଠାଇ ନିଅ ।
ଜମ୍ମୁ-କାଶ୍ମୀରର କେରନ ସେକ୍ଟରରେ ଅନୁପ୍ରବେଶ ଉଦ୍ୟମ କରୁଥିବା ବେଳେ ପାକିସ୍ତାନ ବର୍ଡର ଆକ୍ସନ ଟିମକୁ ବଡ ଝଟକା ଲାଗିଛି । ଏହି ଅନୁପ୍ରବେଶ ଉଦ୍ୟମକୁ ପଣ୍ଡ କରିଛି ଭାରତୀୟ ସେନା । ତେବେ ଗୁଳି ବିନିମୟ ସମୟରେ ଭାରତୀୟ ସେନାର ଗୁଳିରେ ୫ରୁ ୭ ଜଣ ବ୍ୟାଟ୍ କମାଣ୍ଡୋ ପ୍ରାଣ ହରାଇଛନ୍ତି । ଏହି ଅନୁପ୍ରବେଶକାରୀଙ୍କ ମୃତଦେହ ପଡି ରହିଥିଲେ ମଧ୍ୟ ଏହାକୁ ପାକିସ୍ତାନ ଏଯାଏଁ ନେଇନାହିଁ ।
Kanak News is now on WhatsApp
Join and get latest news updates delivered to you via WhatsApp
ଆଉ ଏଭଳି ସ୍ଥିତିରେ ଭାରତୀୟ ସେନା ପକ୍ଷରୁ କୁହାଯାଇଛି ଯେ, ପାକିସ୍ତାନ ସେନା ଶାନ୍ତିର ପ୍ରତୀକ ଧଳା ପତାକା ଧରି ଆସନ୍ତୁ ଓ ଏହି ମୃତଦେହକୁ ନେଇ ଯାଆନ୍ତୁ । କିନ୍ତୁ ପାକିସ୍ତାନ ପକ୍ଷରୁ ଏନେଇ କୌଣସି ଉତ୍ତର ମଧ୍ୟ ମିଳିନାହିଁ । ମିଳିଥିବା ସୂଚନା ମୁତାବକ, ପାକିସ୍ତାନ ସେନା ସହାୟତାରେ ଆତଙ୍କବାଦୀ ମାନେ ଭାରତରେ ଅନୁପ୍ରବେଶ କରିବାକୁ ଲକ୍ଷ୍ୟ ରଖିଥିଲେ । କିନ୍ତୁ ପୂର୍ବରୁ ସୂଚନା ପାଇବା ସହ ଏହି ଅନୁପ୍ରବେଶ ଉଦ୍ୟମକୁ ପଣ୍ଡ କରିଥିଲା ଭାରତୀୟ ସେନା ।
ଗତ ୩୬ ଘଣ୍ଟା ମଧ୍ୟରେ କାଶ୍ମୀର ଘାଟିରେ ଜୈସର ୪ ଆତଙ୍କବାଦୀଙ୍କୁ ନିପାତ କରିଛି ସେନା । ଏହି ଆତଙ୍କବାଦୀଙ୍କ ପାଖରୁ ସ୍ନାଇପର ରାଇଫଲ, ଆଇଡି, ପାକିସ୍ତାନରେ ନିର୍ମିତ ବାରୁଦ ସୁରଙ୍ଗ ଜବତ କରିଥିଲା ସେନା । ଯାହା ସ୍ପଷ୍ଟ ଦର୍ଶାଉଛି ଯେ, ପାକିସ୍ତାନ ସେନା ନା କେବଳ ଆତଙ୍କବାଦୀଙ୍କୁ ଅନୁପ୍ରବେଶ କରିବାରେ ସହାୟତା କରୁଛନ୍ତି ବରଂ ଅତ୍ୟାଧୁନିକ ଅସ୍ତ୍ରଶସ୍ତ୍ର ମଧ୍ୟ ଯୋଗାଇ ଦେଉଛନ୍ତି । କାଶ୍ମୀର ଘାଟିରେ ବଡ ଧରଣର ଆକ୍ରମଣ କରିବାକୁ ଆତଙ୍କବାଦୀ ମାନେ ଯୋଜନା କରୁଥିବା ସ୍ପଷ୍ଟ ହୋଇଛି ।
ଏଭଳି ସ୍ଥିତିରେ ପୂରା ଦେଶର ନଜର ଏବେ ଜମ୍ମୁ-କାଶ୍ମୀର ଉପରେ । କାଶ୍ମୀର ଘାଟିରେ ଅଧିକ ସଂଖ୍ୟକ ସୁରକ୍ଷାକର୍ମୀ ଠୁଳ ହେବା ସ୍ଥାନୀୟ ଅଞ୍ଚଳରେ ହଇଚଇ ସୃଷ୍ଟି କରିଛି । କାଶ୍ମୀରରେ ସେନାର ବ୍ୟାପକ ପ୍ରସ୍ତୁତି ଦେଖି ଧାରା ୩୫-ଏ କିମ୍ବା ଧାରା ୩୭୦ରେ କୌଣସି ପରିବର୍ତ୍ତନ ଆଶଙ୍କା କରାଯାଉଛି । ଯେଉଁଥିପାଇଁ କାଶ୍ମୀରର ଅଧିକାଂଶ ନେତାଙ୍କ ନିଦ ହଜିଯାଇଛି । ସେନାର ଏହି ପ୍ରସ୍ତୁତି ପଛର କାରଣ ବାରମ୍ବାର ଜାଣିବାକୁ ଚାହୁଁଛନ୍ତି ଜମ୍ମୁ-କାଶ୍ମୀରର କିଛି ନେତା । ତେବେ ରାଜ୍ୟପାଳ ସତ୍ୟପାଲ ମଲ୍ଲିକ କହିଛନ୍ତି, ସୁରକ୍ଷା କାରଣରୁ ଜମ୍ମୁ-କାଶ୍ମୀରରେ ଯବାନଙ୍କୁ ମୁତୟନ କରାଯାଇଛି, କୌଣସି ସାମ୍ବିଧାନିକ ପରିବର୍ତ୍ତନ ପାଇଁ ନୁହେଁ ।