କନକ ବ୍ୟୁରୋ : ନଭେମ୍ବର ମାସରୁ ଚାଷୀଙ୍କଠାରୁ ଆଗୁଆ ଧାନ କିଣିବେ ସରକାର । ଯୋଗାଣ ବିଭାଗ ତତ୍ପରତା ପ୍ରକାଶ କରିଥିବା ବେଳେ ସାମନାକୁ ଆସିଛି ଜିଲ୍ଲା ପ୍ରଶାସନର ଅଧା ପ୍ରସ୍ତୁତି ନେଇ ଚାଂଚଲ୍ୟକର ତଥ୍ୟ । ଜିଲ୍ଲାପାଳଙ୍କୁ ଯୋଗାଣ ସଚିବ ଦେଇଥିବା ଚିଠି ଦର୍ଶାଉଛି ପଂଜିକୃତ ହୋଇଥିବା ଚାଷୀ ଓ ଚିହ୍ନଟ ହୋଇଥିବା ଚାଷୀଙ୍କ ଭିତରେ ରହିଛି ବଡ଼ ଅନ୍ତର । ୨ ଲକ୍ଷରୁ ଅଧିକ ଚାଷୀଙ୍କୁ ଏପର୍ଯ୍ୟନ୍ତ ଚିହ୍ନଟ କରାଯାଇନାହିଁ । ଏହି ଅବ୍ୟବସ୍ଥା ପରେ କିପରି ଏହି ଚାଷୀମାନେ ଧାନ ବିକିବେ, ଏହାକୁ ନେଇ ଉଠିଛି ପ୍ରଶ୍ନ ।
Kanak News is now on WhatsApp
Join and get latest news updates delivered to you via WhatsApp
ଚାଷୀଙ୍କ ଠାରୁ ଧାନ କିଣିବା ପାଇଁ ପ୍ରକ୍ରିୟା ଆରମ୍ଭ ହୋଇଯାଇଥିବା ବେଳେ ଏଭଳି କିଛି ତଥ୍ୟ ପଦାକୁ ଆସିଛି ଯାହା ସରକାରଙ୍କ ଅଧା ପ୍ରସ୍ତୁତିକୁ ଦର୍ଶାଉଛି । ଏ ହେଉଛି ଧାନ ସଂଗ୍ରହ ନେଇ ସବୁ ଜିଲ୍ଲାପାଳଙ୍କୁ କମିସନର ତଥା ଯୋଗାଣ ସଚିବ ଭି ଭି ଯାଦବଙ୍କୁ ଚିଠି । ଗତ ୨୮ ତାରିଖରେ ଲେଖା ଯାଇଥିବା ଏହି ଚିଠି ସ୍ପଷ୍ଟ କରୁଛି ପଂଜିକୃତ ହୋଇଥିବା ଚାଷୀ ଓ ଚିହ୍ନଟ ହୋଇଥିବା ଚାଷୀଙ୍କ ଭିତରେ ରହିଛି ବଡ଼ ଅନ୍ତର । ୨ ଲକ୍ଷରୁ ଅଧିକ ଚାଷୀଙ୍କୁ ଚିହ୍ନଟ କରାଯାଇନାହିଁ । ଚାଷୀଙ୍କ ୯୬ ହଜାର ୭୧୪ ଲ୍ୟାଣ୍ଡ ରେକର୍ଡ ମଧ୍ୟ ଯାଂଚ ହୋଇନାହିଁ ।
ଆରଆଇ ଅଫିସରେ ଥିବା ରେକର୍ଡ ଅନୁଯାୟୀ ଏଗୁଡିକ ଯାଂଚ କରାଯିବା ପାଇଁ ତହସିଲଦାରଙ୍କୁ ନିର୍ଦ୍ଦେଶ ଦେବାକୁ କହିଛି ଯୋଗାଣ ବିଭାଗ । ସେହିପରି ୨ ଲକ୍ଷରୁ ଅଧିକ ଚାଷୀଙ୍କ ବ୍ୟାଙ୍କ ଆକାଉଂଟ ଯାଂଚ ହୋଇନାହିଁ । ୭ ଦିନ ମଧ୍ୟରେ ଯାଂଚ ପ୍ରକ୍ରିିୟା ଶେଷ କରିବାକୁ ନିର୍ଦ୍ଦେଶ ଦେଇଛି ଯୋଗାଣ ବିଭାଗ ।
ଯୋଗାଣ ବିଭାଗ ଦେଇଥିବା ଚିଠି ଅନୁସାରେ ଗତ ୨୮ ତାରିଖ ସୁଦ୍ଧା ୯ ଲକ୍ଷ ୨୧ ହଜାର ୯୧୪ ଚାଷୀ ପଂଜିକୃତ ହୋଇଛନ୍ତି । ହେଲେ ସେମାନଙ୍କ ମଧ୍ୟରୁ ୨ ଲକ୍ଷ ୧୪ ହଜାର ୩୦୦ ଚାଷୀଙ୍କୁ ଚିହ୍ନଟ କରାଯାଇନାହିଁ । ୨ ଲକ୍ଷ ୧୨ ହଜାର ୮୬୭ ବ୍ୟାଙ୍କ ଆକାଉଂଟ ଯାଂଚ ହୋଇନାହିଁ । ଗୋଟିଏ ପଟେ ମରୁଡି ଓ ଚକଡ଼ା ପୋକ, ଚାଷୀଙ୍କ ଅଂଟା ଭାଙ୍ଗି ଦେଇଥିବା ବେଳେ ଅନ୍ୟପଟେ ସରକାରୀ ଧାନ ସଂଗ୍ରହରେ ଏଭଳି ଅସୁବିଧା ପୁଣି ଏକ ଚିନ୍ତାର କାରଣ ପାଲଟିଛି ।