ଦେଶରେ ବଢୁଛି କରୋନା : ୩୫ ହଜାର ଟପିଲାଣି ସକ୍ରିୟ ସଂକ୍ରମଣ ମାମଲା; ଆଜି ଦ୍ୱିତୀୟ ଦିନରେ କୋଭିଡ୍ ହସ୍ପିଟାଲରେ ଚାଲିବ ମକଡ୍ରିଲ
କନକ ବ୍ୟୁରୋ : ପୁଣି ଡରାଇଲାଣି କରୋନା । ଦେଶରେ କରୋନା ସଂକ୍ରମଣ ଦିନକୁ ଦିନ ବୃଦ୍ଧି ପାଇବାରେ ଲାଗିଥିବାରୁ ହସପିଟାଲରେ ଆରମ୍ଭ ହୋଇଛି ଦୁଇଦିନିଆ ମକଡ୍ରିଲ୍ । ଆଜି ମଧ୍ୟ କୋଭିଡ୍ ହସ୍ପିଟାଲରେ ମକଡିଲ କରାଯିବ । କରୋନା ମୁକାବିଲା ଓ ପରିଚାଳନା ନେଇ ହସ୍ପିଟାଲ କେତେ ପ୍ରସ୍ତୁତ ଅଛି, ତା’ ଉପରେ ଜୋର ଦିଆଯାଇଛି ।
Kanak News is now on WhatsApp
Join and get latest news updates delivered to you via WhatsApp
କୋଭିଡ ବେଡ୍ ଠାରୁ ଆରମ୍ଭ କରି, ଔଷଧ, ଅକ୍ସିଜେନ୍ କେତେ ମହଜୁଦ ରହିଛି, ସେ ନେଇ ସମୀକ୍ଷା କରାଯାଉଛି । କୋଭିଡ ୱାର୍ଡ ଦାୟିତ୍ୱରେ ଥିବା ନର୍ସ ଓ ଡାକ୍ତର କେତେ ପ୍ରସ୍ତୁତ ଅଛନ୍ତି ତା’ ଉପରେ ନଜର ରଖାଯାଇଛି । ସେହିପରି ଟେଷ୍ଟିଂ କିପରି ଚାଲିଛି, କିଟ୍ ଉପଲବ୍ଧ ଅଛି କି ନାହିଁ, ନିରୀକ୍ଷଣ କରାଯାଉଛି । କୋଭିଡ଼ ପରିଚାଳନା ଓ ଭବିଷ୍ୟତ ଯୋଜନା ଉପରେ ବିଶେଷ ଧ୍ୟାନ ଦେଇ କ୍ଷେତ୍ର ପ୍ରସ୍ତୁତ ହେବ ।
ଗତ କିଛି ଦିନ ଧରି ଦେଶରେ ଦୈନିକ ସଂକ୍ରମଣ ୫ ହଜାର ଉପରେ ଚିହ୍ନଟ ହେଉଛି । ଯାହାକୁ ଦେଖି ବିଶ୍ୱ ସ୍ୱାସ୍ଥ୍ୟ ସଙ୍ଗଠନ ସତର୍କବାଣୀ ଜାରି କରିଛି । ଭାରତରେ ବଢୁଥିବା ସଂକ୍ରମଣକୁ ନେଇ ଯଦି ଉଚିତ୍ ପଦକ୍ଷେପ ନ ନିଆ ଯାଏ ତାହାଲେ ଚତୁର୍ଥ ଲହର ଆସିବାର ସମ୍ଭାବନା ରହିଛି । ବିଶ୍ୱ ସ୍ୱାସ୍ଥ୍ୟ ସଙ୍ଗଠନର ଦକ୍ଷିଣ ପୂର୍ବ ଏସିଆ ଆଂଚଳିକ ନିର୍ଦ୍ଦେଶିକା ଡାକ୍ତର ପୁନମ କ୍ଷେତ୍ରପାଲ ସିଂହ କହିଛନ୍ତି, ଭାରତରେ ଲୋକଙ୍କ ଠାରେ ରୋଗ ପ୍ରତିରୋଧକ ଶକ୍ତି କମିବାରେ ଲାଗିଛି । ତେଣୁ କରୋନାର ଚତୁର୍ଥ ଲହର ଆସିବାର ସମ୍ଭାବନା ଅଧିକ ରହିଛି ।