ଶିଶିର ସରସ ମେଳାରେ ମେଳିଛି ଖାଦ୍ୟର ପସରା, ପତ୍ର ପୋଡା ମାଂସ ଖାଇବା ପାଇଁ ପ୍ରବଳ ଗହଳି !
କନକ ବ୍ୟୁରୋ : ସ୍ମାର୍ଟସିଟି ଭୁବନେଶ୍ୱରରେ ଏବେ ମେଳାର ଆସର । ତୋଷାଳି ଓ ଶିଶିର ସରସ ମେଳାକୁ ନେଇ ଭୁବନେଶ୍ୱରରେ ବେଶ ଗହଳି ଚହଳି ଦେଖିବାକୁ ମିଳିଛି । ଖାସକରି ସନ୍ଧ୍ୟା ହେବା ମାତ୍ରେ ରାଜଧାନୀବାସୀ ଟାଣି ହୋଇ ଆସୁଛନ୍ତି ଏହି ମେଳାକୁ । ଭଳିକି ଭଳି ଘରକରଣା ସାମଗ୍ରୀ କିଣିବା ସହ ଶୀତୁଆ ସନ୍ଧ୍ୟାର ମଜା ନେଉଛନ୍ତି ସ୍ମାର୍ଟ ସିଟିର ସ୍ମାର୍ଟ ବାସିନ୍ଦା ।
Kanak News is now on WhatsApp
Join and get latest news updates delivered to you via WhatsApp
କେବଳ ମେଳା ବୁଲା ନୁହେଁ ଚଟାପଟା ଖାଇବା ଆଇଟମକୁ ମଧ୍ୟ ମିସ୍ କରୁୂନାହାନ୍ତି ମେଳାକୁ ବୁଲି ଆସିଥିବା ଲୋକେ । ଶିଶିର ସରସ ହେଉ ଅବା ତୋଷାଳି ମେଳା, ଏଠାରେ ପଡିଥିବା ଖାଇବା ଷ୍ଟଲ ଆଗରେ ଲୋକଙ୍କର ଲମ୍ବା ଭିଡ ଦେଖିବାକୁ ମିଳୁଛି । ଖାସକରି ଶିଶିର ସରସରେ ପଡିଥିବା ଖାଇବା ଷ୍ଟଲ ଗୁଡିକରେ ପତ୍ର ପୋଡା ମାଂସ ଖାଇବାକୁ ଲୋକଙ୍କର ପ୍ରବଳ ଗହଳି ଦେଖିବାକୁ ମିଳୁଛି ।
ପତ୍ରରେ ଖାସି ମାଂସ ଠାରୁ ଆରମ୍ଭ କରି ମାଛ, ଚିଙ୍ଗୁଡି, ପନିର, ଛତୁ ଏଭଳି ବିଭିନ୍ନ ଆଇଟମ ପୋଡିକି ଗ୍ରାହକଙ୍କୁ ପରଷୁଛନ୍ତି ଦୋକାନୀ । ଆଉ ଏହି ପତ୍ର ପୋଡା ମାଂସର ସ୍ୱାଦ ମଧ୍ୟ ଗ୍ରାହକଙ୍କୁ ବେଶ ପସନ୍ଦ ଆସୁଛି । ଏହି ଚଟାପଟା ଆଇଟମ ଗୁଡିକର ମୂଲ୍ୟ ମଧ୍ୟ ସାଧାରଣ ଲୋକଙ୍କୁ ସୁହାଇଲା ଭଳି ରହିଛି ।
ଦୋକାନୀଙ୍କ କହିବା ଅନୁଯାୟୀ, ୧୧ ଦିନ ଧରି ତାଙ୍କର ଏହି ଷ୍ଟଲରେ ପ୍ରବଳ ଭିଡ ଲାଗି ରହୁଛି । ପ୍ରତିଦିନ ଲକ୍ଷାଧିକ ଟଙ୍କାର ବେପାର କରୁଥିବା କହିଛନ୍ତି କେଉଁଝରରୁ ଆସିଥିବା ଦୋକାନୀ । ଖାସକରି ଆମିଷ ବାର ଦିନ ଲୋକଙ୍କର ପତ୍ର ପୋଡା ମାଂସ ଉପରେ ଡିମାଣ୍ଡ ରହୁଛି । ଆସନ୍ତାକାଲି ଏହି ଶିଶିର ସରସ ମେଳାର ଶେଷଦିନ ଥିବା ହେତୁ ଆଜି ଲୋକଙ୍କର ପ୍ରବଳ ଭିଡ ଦେଖିବାକୁ ମିଳିଛି ।