ଯାଜପୁରର ବିସ୍ମୟ ମଣିଷ ଶ୍ରୀକାନ୍ତ ସାହୁ: ପିଲାଦିନୁ ଗୋଟିଏ ପାପୁଲି ନାହିଁ, ହେଲେ ସେ ସବୁକାମରେ ପାରଙ୍ଗମ
କନକ ବ୍ୟୁରୋ: ଯାଜପୁରର ବିସ୍ମୟ ମଣିଷ ଶ୍ରୀକାନ୍ତ । ପିଲାଦିନୁ ଡାହାଣହାତର ପାପୁଲି ନାହିଁ, ହେଲେ ଚିତ୍ର ଅଙ୍କିବା, ଗାଡ଼ି ନମ୍ବର ପ୍ଲେଟ୍, ଷ୍ଟିକରିଂ, ମାର୍ବଲ ଆର୍ଟ ଓ ସୋଲରେ ବିଭିନ୍ନ ପ୍ରକାରର ଡିଜାଇନ କରିବା ଏବେ ତାଙ୍କର ପେଶା ଓ ନିଶା ପାଲଟିଛି । ଏହା ସହ ବାଇକରେ ଷ୍ଟଂଟ କରିବା, କାଚ ଚୋବାଇବା ଭଳି ଦୁଃସାହାହସିକ କାମ କରୁଛନ୍ତି ଶ୍ରୀକାନ୍ତ । ତାଙ୍କର ଏଭଳି ଅସାଧାରଣ କଳା ଏବେ ଅନ୍ୟମାନଙ୍କ ପାଇଁ ପାଲଟିଛି ପ୍ରେରଣା । ନିଜର ପ୍ରକୃତ ଘର କଟକ ଜିଲ୍ଳାରେ ହୋଇଥିବା ବେଳେ ଏବେ ସେ ବଡଚଣା ଖଇରାଠାରେ ସ୍ଥାୟୀ ବାସିନ୍ଦାଭାବେ ରହି ଆସୁଛନ୍ତି । ପିଲାଦିନୁ ଶ୍ରୀକାନ୍ତଙ୍କର ଡାହାଣ ହାତପାପୁଲିଟି ନଥିବାରୁ ଅନେକ ତାଙ୍କୁ ଅକ୍ଷମ ବୋଲି ମନେକରୁଥିଲେ । ମାତ୍ର ତାହାକୁ ସେ ଭୁଲ ବୋଲି ପ୍ରମାଣ କରି ଏବେ ଚର୍ଚାରେ ଅଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ପରିବାରର ଆର୍ଥିକ ଅନଟନ ଯୋଗୁଁ ଅଧାରୁ ପାଠପଢା ଛାଡି ଶ୍ରୀକାନ୍ତ ସ୍ଥାନୀୟ ପୁରୁଷୋତମ ଆର୍ଟରୁ ଷ୍ଟିକରିଂର ପ୍ରଶିକ୍ଷଣ ନେଇ ବଡଚଣା ବଜାରରେ ଛୋଟିଆ କ୍ୟାବିନଟିଏ ପକାଇ ଗାଡି ଷ୍ଟିକରିଂ କରିଆସୁଛନ୍ତି । ଏଥିସହ ଗ୍ରାନାଇଟ ମାର୍ବଲରେ ଫଳକ ଲେଖିବା, ସୋଲରେ ବିଭିନ୍ନ ଡିଜାଇନ ପ୍ରସ୍ତୁତ କରି ତାକୁ ବିକ୍ରି କରିବା, ବିଭିନ୍ନ ଅଂଚଳର ରଙ୍ଗୀନ ମ୍ୟାପ କରିବା, ୫ଟି ଯୋଜନାରେ ରଙ୍ଗବେରଙ୍ଗ ହେଉଥିବା ବିଦ୍ୟାଳୟର କାରୁକାର୍ଯ୍ୟ କରି ବେଶ୍ ଆରାମରେ ପରିବାର ଚଳାଇ ଆସୁଛନ୍ତି । ଏତଦବ୍ୟତୀତ ନିଜର ଅଲଗା କିଛି ଅନ୍ଦାଜ ପାଇଁ ଚର୍ଚାରେ ଅଛନ୍ତି ଶ୍ରୀକାନ୍ତ । ନିଜର ଭିନ୍ନକ୍ଷମତା ସତ୍ୱେ ବାଇକରେ ଷ୍ଟଂଟ ଦେଖାଇବା, ବାରଲାଇଟ କାଚ, ବଲବ କାଚକୁ ଚୋବାଇବା ତାଙ୍କର ଅନ୍ୟତମ ସଉକ । ଏସବୁ କାର୍ଯ୍ୟ ବିପଦଜନକ ହୋଇଥିଲେ ମଧ୍ୟ ନିଜର ଅଧ୍ୟବସାୟ ବଳରେ ସେ ଏପରି କାର୍ଯ୍ୟ କରି ବେଶ୍ ସାବାସି ପାଉଛନ୍ତି ।