ଅର୍ଥମନ୍ତ୍ରୀଙ୍କ ଜିଏସଟି ଛାଟ, ସୋମବାରରୁ ଖାଦ୍ୟ ପାନୀୟ ସହ ଚିକିତ୍ସା ଖର୍ଚ୍ଚ ବି ହେବ ମହଙ୍ଗା
କନକ ବ୍ୟୁରୋ : ଗୋଟିଏ ପଟେ କରୋନା ମହାମାରୀ ପାଇଁ ସାଧାରଣ ଲୋକଙ୍କ ଜୀବନ ଜୀବିକା ଅସହଜ ହୋଇପଡିଥିବା ବେଳେ ଠିକ୍ ସେତିକି ବେଳେ ସରକାରଙ୍କ ଟ୍ୟାକ୍ସ ଛାଟ ପୁଣି ଲୋକଙ୍କ ମେରୁଦଣ୍ଡ ଉପରେ ସିଧା ସଳଖ ପ୍ରହାର କରିବାକୁ ଯାଉଛି । ପ୍ରଥମେ ଇନ୍ଧନର ଅହେତୁକ ମୂଲ୍ୟ ବୃଦ୍ଧି ପରେ ଖାଦ୍ୟା ସାମଗ୍ରୀର ମୂଲ୍ୟ ଆକାଶଛୁଆଁ ହୋଇଥିବା ବେଳେ ଏବେ ଅର୍ଥମନ୍ତ୍ରୀଙ୍କ ଜିଏସଟି ଆଦାୟ କରିବାର ନିଶା ସାଧାରଣ ଲୋକଙ୍କୁ ଉପାଶରେ ରଖାଇବ ।
Kanak News is now on WhatsApp
Join and get latest news updates delivered to you via WhatsApp
କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀତାରମଣଙ୍କ ଘୋଷଣା ମୁତାବକ ଚଳିତମାସ ୧୮ ତାରିଖ ଠାରୁ ଦେଶରେ ଖାଦ୍ୟ ପାନୀୟ ଠାରୁ ମେଡିକାଲ ଚିକିତ୍ସା ପର୍ଯ୍ୟନ୍ତ ପୁଣି ମହଙ୍ଗା ହେବାକୁ ଯାଉଛି । ଏହା ସିଧା ସଳଖ ଆପଣଙ୍କ ପକେଟ ଉପରେ ପ୍ରଭାବ ପକାଇବ । ଅର୍ଥମନ୍ତ୍ରୀଙ୍କ ଘୋଷଣା ମୁତାବକ ସୋମବାର ଠାରୁ ଦହି, ଲସି ଠାରୁ ଆରମ୍ଭ କରି ମେଡିକାଲ ଚିକିିତ୍ସା ପର୍ଯ୍ୟନ୍ତ ଆପଣଙ୍କୁ ଅଧିକ ଦେୟ ଦେବାକୁ ପଡିବ । କିଛି ଅତ୍ୟାବଶକୀୟ ସାମଗ୍ରୀ ଉପରେ ସରକାର ଦ୍ରର୍ବ୍ୟ ସେବାକର ଲଗାଇଛନ୍ତି ।
ଅର୍ଥମନ୍ତ୍ରୀ ନିର୍ମଳା ସୀତାରମଣଙ୍କ ଅଧ୍ୟକ୍ଷତାରେ ବସିଥିବା ଜିଏସଟି କାଉଁସିଲ ବୈଠକରେ ପ୍ରଥମଥର ପାଇଁ ଦୁଗ୍ଧ ଜାତୀୟ ଉତ୍ପାଦକୁ ଜିଏସଟି ପରିସରଭୂକ୍ତ କରାଯାଇଛି । ଏହି କ୍ରମରେ ଏବେ ଟେଟ୍ରା ପ୍ୟାକ ହୋଇଥିବା ଦହି, ଲସି, ବଟର ମିଲ୍କ ଉପରେ ଆପଣଙ୍କୁ ୫ ପ୍ରତିଶତ ଜିଏସଟି ଦେବାକୁ ପଡିବ । ସେହିଭଳି ବ୍ଲେଡ, ପେପର କଇଁଚି, ପେନସିଲ, ରବର, ଚାମଚ, ଓ କେକ୍ ସର୍ଭିସ ଉପରେ ଥିବା ଜିଏସଟି ଦର ୫ ପ୍ରତିଶତରୁ ୧୮ ପ୍ରତିଶତ ପର୍ଯ୍ୟନ୍ତ ବୃଦ୍ଧି କରାଯାଇଛି ।
ସେହିଭଳି ଆଇସିୟୁ ବାହାରେ ଯଦି ଆପଣ ଚିକିତ୍ସିତ ହେଉଛନ୍ତି ଓ ଦୈନିକ ଆପଣଙ୍କୁ ୫ ହଜାର ଟଙ୍କା ଦେବାକୁ ପଡୁଛି ତେବେ ଏହା ବାବଦରେ ବି ଆପଣଙ୍କୁ ଏବେ ୫ ପ୍ରତିଶତ ଜିଏସଟି ଆଦାୟ କରିବେ ସରକାର । ପ୍ରଥମେ ଏହା ଜିଏସଟି ପରିସରଭୂକ୍ତ ନଥିଲା । ସେହିଭଳି ଏଲଇଡି ଲାଇଟ ଓ ଲ୍ୟାମ୍ପର ମୂଲ୍ୟ ମଧ୍ୟ ବୃଦ୍ଧି ହେବାକୁ ଯାଉଛି । ପ୍ରଥମେ ଏସବୁ ସାମଗ୍ରୀ ଉପରେ ୧୨ ପ୍ରତିଶତ ଜିଏସଟି ଲାଗୁଥିବା ବେଳେ ଏବେ ଏହା ଉପରେ ସରକାର ୧୮ ପ୍ରତିଶତ ଜିଏସଟି ଆଦାୟ କରିବେ ।
କେବଳ ଏତିକିରେ ସରକାର ସନ୍ତୁଷ୍ଟ ହୋଇ ନାହାଁନ୍ତି । ସାଧାରଣ ଲୋକ ଏବେ ବ୍ୟାଙ୍କ କାରବାରରେ ବି ଶୋଷଣର ଶିକାର ହେବାକୁ ଯାଉଛନ୍ତି । ଏବେ ଯଦି କେହି ବ୍ୟାଙ୍କ ପାସବୁକ ଏଗନେଷ୍ଟରେ ଯଦି ଆପଣ ଚେକ୍ ବୁକ୍ ଆଣିବାକୁ ଚାହାଁନ୍ତି ପ୍ରଥମେ ବ୍ୟାଙ୍କ ତ ସେ ବାବଦରେ କିଛି ଅର୍ଥ ଆପଣଙ୍କ ଠାରୁ ଆଦାୟ କରିବ ଏହାପରେ ସରକାର ବି ଚେକ୍ ବୁକ୍ ଇସ୍ୟୁ ଉପରେ ଆପଣଙ୍କ ଠାରୁ ୧୮ ପ୍ରତିଶତ ଜିଏସଟି ଆଦାୟ କରିବାକୁ ନିଷ୍ପତ୍ତି ନେଇଛନ୍ତି ।
ପ୍ରଥମେ ସରକାର ଦାମୀ ହୋଟେଲରେ ରହିଲେ ଆପଣଙ୍କ ଠାରୁ ଜିଏସଟି ଆଦାୟ କରୁଥିଲେ । ହେଲେ ଚଳିତ ଜିଏସଟି କାଉଁସିଲ ବୈଠକର ନିଷ୍ପତ୍ତି ମୁତାବକ ଏବେ ଯଦି ଆପଣ ୧୦୦୦ ଟଙ୍କା ଭଡା ଦେଇ କୌଣସି ହୋଟେଲର ରୁମ ବୁକ କରୁଛନ୍ତି ତେବେ ଆପଣଙ୍କୁ ୧୨ ପ୍ରତିଶତ ଜିଏସଟି ଦେବାକୁ ପଡିବ । ଅର୍ଥାତ ହୋଟେଲ ବାଲା ଆପଣଙ୍କ ଠାରୁ ୧ ହଜାର ଟଙ୍କା ଭଡା ସ୍ଥାନରେ ୧୧୨୦ ଟଙ୍କା ଆଦାୟ କରିବ ।
ସେହିଭଳି ଆପଣ ଦୈନିକ ଖାଦ୍ୟରେ ସାମିଲ କରୁଥିବା ପ୍ୟାକେଟ ଦହି, ଲସି ଓ ଛେନା ଉପରେ ମଧ୍ୟ ସରକାରଙ୍କ ନଜର ପଡିଛି । ପ୍ରଥମେ ଏହା ଜିଏସଟି ପରିସରଭୂକ୍ତ ନଥିଲା । ହେଲେ ଏବେ ସରକାର ଏହା ଉପରେ ଜିଏସଟି ଲଗାଇବାକୁ ଯାଉଥିବା ବେଳେ ଏସବୁ ସାମଗ୍ରୀ ବିକ୍ରି କରୁଥିବା କମ୍ପାନୀମାନେ ଦରବୃଦ୍ଧି କରିବା ନିଶ୍ଚିନ୍ତ ହୋଇଛି ।