କନକ ବ୍ୟୁରୋ : ଆସନ୍ତା ମାସରେ ହେବାକୁ ଥିବା କଂଗ୍ରେସ ସଭାପତି ନିର୍ବାଚନ ପାଇଁ ଆଗ ଧାଡିରେ ଥିବା ରାଜସ୍ଥାନ ମୁଖ୍ୟମନ୍ତ୍ରୀ ଅଶୋକ ଗେହଲଟ ଏବେ ପଛ ଘୁଂଚା ଦେବା ଆରମ୍ଭ କରିଛନ୍ତି । ନିଜ ରାଜ୍ୟରେ ପ୍ରତିଦ୍ୱନ୍ଦୀ ସଚିନ ପାଇଲଟଙ୍କ ସହ ଥିବା ବିବାଦ ଏବେ ଗେହଲଟଙ୍କୁ ଚିନ୍ତାରେ ପକାଇଦେଇଛି । କଂଗ୍ରେସର ସଭାପତି ହେଲେ ରାଜସ୍ଥାନ ମୁଖ୍ୟମନ୍ତ୍ରୀ ପଦବୀ ଛାଡିବାକୁ ପଡିବ ବୋଲି ଗେହଲଟଙ୍କ ଉପରେ ଚାପ ପଡୁଥିବାରୁ ସେ ହୁଏତ କଂଗ୍ରେସ ସଭାପତି ନିର୍ବାଚନ ଲଢିନପାରନ୍ତି ବୋଲି କୁହାଯାଉଛି । ଯାହା ସେ ବୁଧବାର ଦେଇଥିବା ବୟାନରୁ ଜଣାପଡୁଛି ।
Kanak News is now on WhatsApp
Join and get latest news updates delivered to you via WhatsApp
ଏଭଳି ଦ୍ୱନ୍ଦ ଭିତରେ ବୁଧବାର ଦିଲ୍ଲୀ ଆସି କଂଗ୍ରେସର ଅନ୍ତରୀଣ ଅଧ୍ୟକ୍ଷା ସୋନିଆ ଗାନ୍ଧୀଙ୍କୁ ଭେଟିଛନ୍ତି କଂଗ୍ରେସର ଏହି ବରିଷ୍ଠ ନେତା । ଯଦି କଂଗ୍ରେସ ସଭାପତି ପାଇଁ ମୁଖ୍ୟମନ୍ତ୍ରୀ ପଦବୀ ଛାଡିବାକୁ ପଡିବ ତେବେ ସେ ନିର୍ବାଚନ ଲଢିବେ ନାହିଁ ବୋଲି ସୋନିଆଙ୍କୁ କହିଥିବା ସୂଚନା ମିଳିଛି । ଯଦିଓ ନିଜ ମୁହଁରେ ଏକଥା ସେ ପ୍ରକାଶ କରିବାକୁ ଚାହୁଁନାହାଁନ୍ତି କିନ୍ତୁ ତାଙ୍କର ବୟାନରୁ ଏହା ସ୍ପଷ୍ଟ ବାରି ହୋଇପଡୁଛି । ଏପଟେ ସଚିନ ପାଇଲଟଙ୍କୁ ଏବିଷୟରେ ପଚାରିବାକୁ ସେ କଥାକୁ ଏଡାଇ ଯାଇ ନିର୍ବାଚନ ହେବା ପର୍ଯ୍ୟନ୍ତ ଅପେକ୍ଷା କରିବାକୁ କହିଛନ୍ତି ।
କଂଗ୍ରେସ ସଭାପତି ନିର୍ବାଚନ ପାଇଁ ଗୁରୁବାର ବିଜ୍ଞପ୍ତି ପ୍ରକାଶ ପାଇବାକୁ ଥିବା ବେଳେ ନିର୍ବାଚନ ଲଢିବା ପାଇଁ ଇଛୁକ ଥିବା ଦୁଇ ନେତାଙ୍କ ମଧ୍ୟରୁ ଜଣେ ପଛଘୁଂଚା ଦେଉଥିବା ଜଣାପଡୁଛି । ଏବେ ସଭାପତି ପାଇଁ ଏକା କଂଗ୍ରେସ ସାଂସଦ ଶଶି ଥରୁର ଇଛୁକ ଅଛନ୍ତି । ଅକ୍ଟୋବର ୨୪ରେ ନିର୍ବାଚନ ପାଇଁ ନୋମିନେସନ୍ ହେବାକୁ ଥିବା ବେଳେ ଆଉ କିଏ ମଇଦାନକୁ ଓହ୍ଲାଉଛନ୍ତି ତାହା ଉପରେ ସମସ୍ତଙ୍କ ନଜର ରହିଛି ।