ରୋଗୀ ମୃତ୍ୟୁକୁ ନେଇ ନର୍ସଙ୍କୁ ମାଡ ମାରିଲେ ରୋଗୀଙ୍କ ସମ୍ପର୍କୀୟ। କାର୍ଯ୍ୟାନୁଷ୍ଠାନ ଦାବିରେ ଅଡି ବସିଲେ ନର୍ସ ଓ ଡାକ୍ତର
ବ୍ୟକ୍ତିଙ୍କ ବିରୋଧରେ କାର୍ଯ୍ୟାନୁଷ୍ଠାନ ନେଇ ଆଇଆଇସିଙ୍କ ପ୍ରତିଶ୍ରୁତି ପରେ ହଟିଲା ଧାରଣ
କନକ ବ୍ୟୁରୋ: ପଶ୍ଚିମବଙ୍ଗରେ ଡାକ୍ତରଙ୍କୁ ରୋଗୀ ସମ୍ପର୍କୀୟଙ୍କ ମାଡ ଏବଂ ପରେ ପରେ ସାରା ଦେଶରେ ତାର ଜୋରଦାର ପ୍ରତିବାଦ ଓ ବନ୍ଦ ପାଳନ ମନରୁ ନଯାଉଣୁ ଆଜି ବାରିପଦାରେ ପୁଣି ଘଟିଛି ସେଭଳି ଏକ ଘଟଣା । ରୋଗୀ ମୃତ୍ୟୁକୁ ନେଇ ନର୍ସଙ୍କୁ ମାଡ ମାରିଛନ୍ତି ରୋଗୀଙ୍କ ସମ୍ପର୍କୀୟ । ଏହାପରେ କାର୍ଯ୍ୟାନୁଷ୍ଠାନ ଦାବିରେ ଅଡିବସିଥିଲେ ନର୍ସ ଓ ଡାକ୍ତର । ନର୍ସ ଓ ଡାକ୍ତର, ଧାରଣା ଦେବାରୁ ବନ୍ଦ ହୋଇଯାଇଥିଲା ରୋଗୀସେବା । ସ୍ଥିତି ସେତେବେଳେ ସାମାନ୍ୟ ହୋଇଥିଲା ଯେତେବେଳେ ମାଡ ମାରିଥିବା ଲୋକଙ୍କ ବିରୋଧରେ କାର୍ଯ୍ୟାନୁଷ୍ଠାନ ପାଇଁ ପ୍ରତିଶ୍ରୁତି ମିଳିଥିଲା ।
Kanak News is now on WhatsApp
Join and get latest news updates delivered to you via WhatsApp
ବାରିପଦା ପଣ୍ଡିତ ରଘୁନାଥ ମୁର୍ମୁ ମେଡିକାଲ କଲେଜରେ ଚିକିତ୍ସା ସେବା ସେତେବେଳେ ବାଧାପ୍ରାପ୍ତ ହୋଇଥିଲା ଯେତେବେଳେ ଧାରଣାରେ ବସିଯାଇଥିଲେ ଡାକ୍ତର ଓ ନର୍ସ । ଜଣେ ନର୍ସକୁ ମାଡ ମରାଯିବାକୁ କେନ୍ଦ୍ରକରି ଆରମ୍ଭ ହୋଇଥିଲା ଏହି ବିବାଦ । ପୋଲିସର ସୂଚନା ଅନୁସାରେ, ଝାରପୋଖରିଆ ଅଂଚଳର ଜଣେ ୪୭ବର୍ଷିୟ ମହିଳାଙ୍କ ଚିକିତ୍ସା ଚାଲିଥିବା ବେଳେ ମୃତ୍ୟୁ ହୋଇଥିଲା । ଏହି ମୃତ୍ୟୁକୁ ନେଇ ରୋଗୀଙ୍କ ସମ୍ପର୍କିୟ ଓ ଡାକ୍ତର , ନର୍ସଙ୍କ ମଧ୍ୟରେ ଆରମ୍ଭ ହୋଇଥିଲା ଯୁକ୍ତିତର୍କ , ଠେଲାପେଲା । ଏହି ସମୟରେ ଆସିଗଲେ ଆଉ ଜଣେ ଗୁରୁତର ରୋଗୀ । ଏହି ରୋଗୀଙ୍କ ନିକଟକୁ ଯିବା ବେଳେ ଡାକ୍ତର ଓ ନର୍ସଙ୍କ ସାମାନ୍ୟ ବିଳମ୍ବ ହେବାରୁ ନର୍ସଙ୍କୁ ମାଡ ମାରିଥିଲେ ଲୋକେ ।
କାର୍ଯ୍ୟରତ ନର୍ସଙ୍କୁ ରୋଗୀ ସଂପର୍କୀୟ ମାଡ ମାରିଥିବା ଅଭିଯୋଗରେ କାର୍ଯ୍ୟବନ୍ଦ ଆନ୍ଦୋଳନ କରିଥିଲେ ଡାକ୍ତର ଓ ନର୍ସ । ସମସ୍ତ ଡାକ୍ତର ଓ ନର୍ସଙ୍କୁ ସୁରକ୍ଷା ଯୋଗାଇ ଦେବା ସହ ଅଭିଯୁକ୍ତଙ୍କୁ ଗିରଫ କରିବା ଦାବିରେ ସେମାନେ ପ୍ରତିବାଦ କରିଥିଲେ । ଠପ ହୋଇଯାଇଥିଲା ରୋଗୀ ସେବା । ଘଟଣାସ୍ଥଳରେ ସିଡିଏମଓ ପହଂଚି ପରିସ୍ଥିତି ନିୟନ୍ତ୍ରଣ କରିବାକୁ ଚେଷ୍ଟା କରିଥିଲେ । ନର୍ସଙ୍କୁ ମାଡ ମାରିଥିବା ବ୍ୟକ୍ତିଙ୍କ ବିରୋଧରେ କାର୍ଯ୍ୟାନୁଷ୍ଠାନ ପ୍ରତିଶ୍ରୁତି ମିଳିବା ପରେ କାର୍ଯ୍ୟରେ ଯୋଗ ଦେଇଥିଲେ ଧାରଣାରତ ଡାକ୍ତର ଓ ନର୍ସ ।
ନିକଟରେ ପଶ୍ଚିମବଙ୍ଗରେ ଡାକ୍ତରଙ୍କ ଉପରେ ମାଡ ହେବାକୁ କେନ୍ଦ୍ରକରି ସୃଷ୍ଟି ହୋଇଥିଲା ଅଚଳାବସ୍ଥା । ଡାକ୍ତରଙ୍କ ଆନ୍ଦୋଳନକୁ ସମର୍ଥନ କରି ସାରା ଦେଶରେ ଏକାଠି ହୋଇଥିଲେ ଡାକ୍ତର । ପୁଣିଥରେ ବାରିପଦାରେ ସମାନଧରଣର ଘଟଣା, ଡାକ୍ତରଖାନାରେ ନର୍ସ ଓ ଡାକ୍ତରଙ୍କ ସୁରକ୍ଷାକୁ ନେଇ ପ୍ରଶ୍ନବାଚୀ ସୃଷ୍ଟି କରିଛି ।