କନକ ବ୍ୟୁରୋ: ଆବାସ ଯୋଜନାରେ ପ୍ରକାଶ ପାଇଥିବା ସମ୍ଭାବ୍ୟ ହିତାଧିକାରୀ ତାଲିକାକୁ ନେଇ, ଯେତେବେଳେ ଗାଁ ଗାଁରେ ଅସନ୍ତୋଷ ବଢ଼ୁଛି । ଘର ପାଇବାକୁ ଆଶାୟୀଙ୍କ ନାଁ କାହିଁକି ତାଲିକାରେ ନାହିଁ, ସେ ନେଇ ବିଜେଡି – ବିଜେପି ଦୋଷ ଲଦାଲଦି ହେଉଛନ୍ତି । ସେତିକିବେଳେ ଏହି ପ୍ରସଙ୍ଗରେ ପ୍ରତିକ୍ରିୟା ରଖିଛନ୍ତି କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ । କହିଛନ୍ତି, କେନ୍ଦ୍ର ସରକାର ରାଜ୍ୟକୁ ପର୍ଯ୍ୟାପ୍ତ ପରିମାଣରେ ଘର ଦେଇଛନ୍ତି । ଆଗରୁ ୧୮ଲକ୍ଷ ଘର ଆସିବା ପରେ ସମାନ ଅଭିଯୋଗ ଆସିଥିଲା । ଏବେ ସାଢ଼େ ୯ଲକ୍ଷ ଘର ମିଳିବା ପରେ ଯୋଗ୍ୟ ଲୋକଙ୍କ ଘର ମିଳୁ ବୋଲି କେନ୍ଦ୍ର ଅପେକ୍ଷା ରଖିବା ସ୍ୱାଭାବିକ । ଆଉ ଏବେ ଟଙ୍କା ଆସିବା ପରେ ଯଦି ଯୋଗ୍ୟ ଲୋକ ଘର ପାଇବ ନାହିଁ ଏହା ଗମ୍ଭୀର ବିଷୟ । ଏ ଦାୟିତ୍ୱ ରାଜ୍ୟ ସରକାରଙ୍କୁ ନେବାକୁ ପଡିବ।
Kanak News is now on WhatsApp
Join and get latest news updates delivered to you via WhatsApp
ହିତାଧିକାରୀ ତାଲିକାକୁ ନେଇ ରାଜ୍ୟ ସରକାରଙ୍କୁ ବିଜେପି ଘେରି ଆସୁଥିବାବେଳେ, ଜବାବ ରଖିଛି ବିଜେଡି । ଖଣ୍ଡପଡା ବିଧାୟକ ସୌମ୍ୟରଞ୍ଜନ ପଟ୍ଟନାୟକ କହିଛନ୍ତି, କେନ୍ଦ୍ର ସରକାରଙ୍କ ଯୋଗ୍ୟତା ମାପକାଠି ବଦଳିବା ଫଳରେ ଆବାସ ଯୋଜନାରେ ଅସୁବିଧା ହେଉଛି । ପ୍ରତ୍ୟେକ ଯୋଗ୍ୟ ବ୍ୟକ୍ତି ଘର ପାଆନ୍ତୁ ଏହା ସରକାର ଚାହେଁ । ତାଲିକା ପ୍ରକାଶ ପାଇଛି, ଅଭିଯୋଗ ଆସିଲେ ତଦନ୍ତ କରାଯିବ । କାଁ ଭାଁ କେଉଁଠି ଭୁଲ ଭଟକା ରହିଛି, ତାର ପ୍ରତିକାର କରାଯିବ । ରାଜ୍ୟ ସରକାରଙ୍କ ତଥ୍ୟ ଅନୁସାରେ ପୂର୍ବରୁ ପ୍ରଧାନମନ୍ତ୍ରୀ ଆବାସ ଯୋଜନାରେ ୧୮ଲକ୍ଷ ୩୦ ହଜାର ଘର ବଣ୍ଟାଯାଇଛି । ଏବେ ୯ଲକ୍ଷରୁ ଅଧିକ ଘର ଯୋଗାଇଦେବାକୁ ସମ୍ଭାବ୍ୟ ହିତାଧିକାରୀଙ୍କ ତାଲିକା ପ୍ରକାଶ ପାଇଛି । କିନ୍ତୁ ତାଲିକା ପ୍ରକାଶ ପାଇବା ପରେ ଆହୁରି ବହୁ ଲୋକ ଘର ପାଇବାକୁ ଅପେକ୍ଷା କରିଥିବା ସାମନାକୁ ଆସିଛି । ତେବେ କେନ୍ଦ୍ର ଆଉ ୩ଲକ୍ଷ ଘର ଦେଲେ ସମସ୍ୟାର ସାମୟିକ ସମାଧାନ ହୋଇପାରିବ ବୋଲି କିଛି ଦିନ ପୂର୍ବରୁ କହିଥିଲେ ପଞ୍ଚାୟତିରାଜ ବିଭାଗ ସଚିବ ।
ତେବେ ପ୍ରଶ୍ନ ଉଠୁଛି, ପ୍ରକୃତରେ ଆଉ କେତେ ଘର ଦରକାର । କେତେ ଘର ଆସିଲେ ସବୁ ଲୋକଙ୍କୁ ପକା ଘର ମିଳିବ । ଆଉ ୨୦୨୨ ସୁଦ୍ଧା ସମସ୍ତଙ୍କ ମୁଣ୍ଡ ଉପରେ ଛାତ ଘର ଥିବା ନେଇ ପ୍ରଧାନମନ୍ତ୍ରୀ ଓ ମୁଖ୍ୟମନ୍ତ୍ରୀଙ୍କ ଲକ୍ଷ୍ୟ ପୂରଣ ହେବ ।