କନକ ବ୍ୟୁରୋ : ନେତାଙ୍କ ପାଇଁ କର୍ମୀଙ୍କ ଦରଦ । ବରିଷ୍ଠ ନେତା ବିଜୟ ମହାପାତ୍ର, କେନ୍ଦ୍ରାପଡ଼ା ଜିଲ୍ଲାର ସ୍ୱତନ୍ତ୍ର ନିମନ୍ତ୍ରିତ ସଦସ୍ୟ ପଦରୁ ବିଦା ହେବା ପରେ ରାସ୍ତାକୁ ଓହ୍ଲାଇଛନ୍ତି ତାଙ୍କ ସମର୍ଥକ । ପୁରା ଘଟଣା ପାଇଁ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କୁ ଦାୟୀ କରିବା ସହ ତାଙ୍କ କୁଶପୁତ୍ତଳିକା ଜଳାଇଛନ୍ତି । ଅନ୍ୟପଟେ ଧର୍ମେନ୍ଦ୍ରଙ୍କ ସମର୍ଥକ ବିଶୃଙ୍ଖଳିତ ଆଚରଣ କରିଥିବା ଅଭିଯୋଗ କରି ପାଲଟା ବିଜୟ ମହାପାତ୍ରଙ୍କ କୁଶପୁତଳିକା ଦାହ କରିଛନ୍ତି । ଯାହା ବିଜେପି ଭିତରେ ଥିବା ଫାଟକୁ ପଦାରେ ପକାଇଛି ।
Kanak News is now on WhatsApp
Join and get latest news updates delivered to you via WhatsApp
ବିଜୟ ମହପାତ୍ର ବନାମ ଧର୍ମେନ୍ଦ୍ର ପ୍ରଧାନ ।ନେତାଙ୍କ ପତିଆରା ପାଇଁ କର୍ମୀଙ୍କ ଲଢ଼େଇ ।ବିଜୟ ମହାପାତ୍ରଙ୍କ ସମର୍ଥନରେ ଧର୍ମେନ୍ଦ୍ରଙ୍କ କୁଶପୁତଳିକା ଜଳୁଛି, ଧର୍ମେନ୍ଦ୍ର ପ୍ରଧାନଙ୍କ ସମର୍ଥନରେ ବିଜୟଙ୍କ କୁଶପୁତଳିକା ଦାହ ହେଉଛି । ବିଜୟ ମହାପାତ୍ରଙ୍କ ଘର ଆଗରେ ତାଙ୍କ ସମର୍ଥକ ଧର୍ମେନ୍ଦ୍ରଙ୍କ ବିରୋଧରେ ନାରାବାଜି କରିବା ସହ ତାଙ୍କ କୁଶପୁତଳିକା ଦାହ କରିଥିବା ବେଳେ ସେହି କେନ୍ଦ୍ରାପଡ଼ା ଜିଲ୍ଲାରେ ଧର୍ମେନ୍ଦ୍ରଙ୍କ ସମର୍ଥକ ବିଜୟ ମହାପାତ୍ରଙ୍କ କୁଶପୁତଳିକା ଜାଳିଛନ୍ତି । ନେତାଙ୍କ ସମର୍ଥନରେ ବାହାରିଛନ୍ତି ସମର୍ଥକ ।
ବିଜେପିର ଦୁଇ ତୁଙ୍ଗ ନେତା, ବିଜୟ ମହପାତ୍ର ଏବଂ ଧର୍ମେନ୍ଦ୍ର ପ୍ରଧାନ । ଜଣେ କେନ୍ଦ୍ରମନ୍ତ୍ରୀ, ଯାହାଙ୍କୁ ଓଡ଼ିଶାରେ ବିଜେପିର ପୋଷ୍ଟର ବୟ ବୋଲି କୁହାଯାଉଛି । ଅନ୍ୟ ଜଣେ ବିଜେପିର ଜାତୀୟ କାର୍ଯ୍ୟକାରିଣୀ ସଦସ୍ୟ, ଯିଏ ଓଡ଼ିଶା ରାଜନୀତିର ଜଣେ ପୋଖତ ଖେଳାଳି । କିନ୍ତୁ ନେତାଙ୍କ ପାଇଁ ସମର୍ଥକଙ୍କ ସଂଘର୍ଷ ବିଜୟ ମହାପାତ୍ରଙ୍କୁ ମହଙ୍ଗା ପଡିଛି । ବିଜେପି ମିଶ୍ରଣ ପର୍ବରେ ବିଜୟଙ୍କ ସମର୍ଥକ ଗଣ୍ଡଗୋଳ ଘଟଣାକୁ କେନ୍ଦ୍ରକରି ତାଙ୍କୁ ଜିଲ୍ଲା ବିଜେପି କାର୍ଯ୍ୟ ସମିତିର ସ୍ୱତନ୍ତ୍ର ନିମନ୍ତ୍ରିତ ସଦସ୍ୟ ପଦରୁ ବହିଷ୍କୃତ ହେବାକୁ ପଡିଛି ।
ବିଜୟ ଏହି ପ୍ରସଙ୍ଗରେ ଗଣମାଧ୍ୟମକୁ କିଛି କହିବାକୁ ଚାହୁଁନଥିଲେ ବି ଫେସ୍ବୁକରେ ଯାହା ପୋଷ୍ଟ କରିଛନ୍ତି, ତାକୁ ପାଲଟା ବିଜେପିକୁ ହରଡ଼ଘଣାରେ ପକାଇଛି । ବିଜୟ ଲେଖିଛନ୍ତି:
-ଓଡ଼ିଶାର ଲୋକଙ୍କ ପାଇଁ ଯଦି ମହାନଦୀ ପ୍ରସଙ୍ଗ ଉଠାଇବା ଅପରାଧ, ମୁଁ ଅପରାଧୀ
-ଆଇଓସିଏଲରେ ଓଡ଼ିଶା ଯୁବକଙ୍କ ନିଯୁକ୍ତି ପ୍ରସଙ୍ଗ ଉଠାଇବା ଯଦି ଅପରାଧ, ମୁଁ ଅପରାଧୀ
-ଆତ୍ମରକ୍ଷା କରି ଯଦି ରାଜନୀତି କରାଯିବା ଅପରାଧ, ମୁଁ ଅପରାଧୀ
-ଦଳ ଭିତରେ ଚାଟୁକାର ଓ ଦଲାଲି ନକରିବା ଯଦି ଅପରାଧ, ମୁଁ ଅପରାଧୀ
ଆଉ ଏପଟେ ବିଜୟ ମହାପାତ୍ର ଓ ତାଙ୍କର କିଛି ସମର୍ଥକଙ୍କୁ ବିଜେପିରୁ ବହିଷ୍କାର ପାଇଁ ଜିଲ୍ଲା କମିଟି ସୁପାରିଶ କରିଛି । ହେଲେ ଦଳୀୟ ମୁଖପାତ୍ର କହୁଛନ୍ତି- ପୁରା ଘଟଣାର ତଦନ୍ତ ହେବ । ଏବେ ଦେଖିବାର କଥା, ବିଜୟଙ୍କୁ ନେଇ ବିଜେପିର ଆଭିମୁଖ୍ୟ କ’ଣ ହେଉଛି ଏବଂ ଏହାକୁ ନେଇ କିଭଳି ଆଭିମୁଖ୍ୟ ଗ୍ରହଣ କରୁଛନ୍ତି ବିଜୟ ମହାପାତ୍ର ।