କାହା ହାତରେ ରହିବ ରାଜ୍ୟର ଦାୟିତ୍ୱ? ମଧ୍ୟପ୍ରଦେଶ,ରାଜସ୍ଥାନ ଓ ଛତିଶଗଡରେ କିଏ ହେବ ମୁଖ୍ୟମନ୍ତ୍ରୀ, ସେ ନେଇ ବଢିଲା ସସପେନ୍ସ

କନକ ବ୍ୟୁରୋ: ୫ଟି ରାଜ୍ୟର ଫଳାଫଳ ଆସିବା ପରେ ସରକାର ଗଢିବାକୁ ପ୍ରସ୍ତୁତ ହେଉଛନ୍ତି ବିଜୟୀ ଦଳ । ଆଉ ଏହାରି ଭିତରେ ଜୋର ଧରିଛି ଚର୍ଚା, କାହା ହାତରେ ରହିବ ରାଜ୍ୟର ଦାୟିତ୍ୱ? ରାଜସ୍ଥାନ ଓ ଛତିଶଗଡରେ କିଏ ହେବ ମୁଖ୍ୟମନ୍ତ୍ରୀ ସେ ନେଇ ସସପେନ୍ସ ବଢିଯାଇଛି । ରାଜସ୍ଥାନରେ ସହଯୋଗୀଙ୍କ ସହ ବହୁମତ ପାଇଛି କଂଗ୍ରେସ । ଏଠାରେ ମୁଖ୍ୟମନ୍ତ୍ରୀ ବାଛିବାକୁ ଆଜି ଜୟପୁରରେ ବୈଠକ ବସୁଛି ।

ସନ୍ଧ୍ୟାସୁଦ୍ଧା ନୂଆ ମୁଖ୍ୟମନ୍ତ୍ରୀଙ୍କ ନାଁ ଘୋଷଣା ହେବା ସମ୍ଭାବନା ରହିଛି । ଦୌଡରେ ଅଛନ୍ତି ଅଶୋକ ଗେହଲଟ ଓ ସଚ୍ଚିନ ପାଇଲଟ । ରାଜସ୍ଥାନ କଂଗ୍ରେସ ଓ ସହଯୋଗୀଙ୍କୁ ୧୦୧ ଆସନ ମିଳିଛି । ସେହିଭଳି ଛତିଶଗଡରେ ବି ଆଜି କଂଗ୍ରେସ ବିଧାୟକ ଦଳ ବୈଠକ ବସୁଛି । ଏଠାରେ ନବନିର୍ବାଚିତ ବିଧାୟକ ନୂଆ ନେତାଙ୍କୁ ବାଛିବେ । ରାଜ୍ୟରେ କଂଗ୍ରେସକୁ ଦୁଇ-ତୃତୀୟାଂଶ ବହୁମତ ମିଳିଛି । କଂଗ୍ରେସ ମୁଖ୍ୟମନ୍ତ୍ରୀ ଦୌଡରେ ୩ ଜଣ ଅଛନ୍ତି ।

ରାଜସ୍ଥାନ

ବସୁନ୍ଧରା ରାଜେ ସରକାରକୁ ହଟାଇ ରାଜସ୍ଥାନରେ କ୍ଷମତାକୁ ଫେରିଥିବା କଂଗ୍ରେସର ମୁଖ୍ୟମନ୍ତ୍ରୀ ଦୌଡରେ ଦୁଇ ଜଣ ହେବିୱେଟ୍ ରହିଛନ୍ତି । ଅଶୋକ ଗେହଲଟ୍ ଏବଂ ସଚିନ୍ ପାଇଲଟ୍ । ରାଜସ୍ଥାନ କଂଗ୍ରେସର ବରିଷ୍ଠ ନେତା ତଥା ଦୁଇ ଦୁଇ ଥରର ମୁଖ୍ୟମନ୍ତ୍ରୀ ଅଶୋକ ଗେହଲଟ୍ । ହାଇକମାଣ୍ଡ ପୁଣିଥରେ ଏହି ୱାରହର୍ସଙ୍କୁ ମୁଖ୍ୟମନ୍ତ୍ରୀ ଗାଦିରେ ବସାଇବା ସମ୍ଭାବନା ରହିଛି । ଯାହା ପାଖରେ ରହିଛି ଦୀର୍ଘଦିନର ରାଜନୈତିକ ଅଭିଜ୍ଞତା  ଓ ଅନୁଭବ  । ତେଣୁ ଏହି ବିଶ୍ୱାସୀ ସିପାହୀଙ୍କ ହାତରେ ଶାସନ ଡୋରି ଦେଇପାରେ କଂଗ୍ରେସ ।

ଅନ୍ୟପଟେ ମୁଖ୍ୟମନ୍ତ୍ରୀ  ରେସରେ ଅଶୋକଙ୍କ ପାଇଁ ପ୍ରମୁଖ ପ୍ରତିଦ୍ୱନ୍ଦୀ ଭାବେ ଉଭା ହୋଇଛନ୍ତି ରାଜସ୍ଥାନ କଂଗ୍ରେସ ମୁଖ୍ୟ ସଚିନ ପାଇଲଟ୍ । କଂଗ୍ରେସ ଅଧ୍ୟକ୍ଷ ରାହୁଲ ଗାନ୍ଧୀଙ୍କ ଯୁବ ସହଯୋଗୀ । ରାଜ୍ୟରେ କଂଗ୍ରେସର ପୁନରୁଦ୍ଧାର ଓ ଦଳକୁ ଶକ୍ତିଶାଳୀ କରିବାରେ ସଚିନ ପାଇଲଟଙ୍କ ଭୂମିକା ଗୁରୁତ୍ୱପୂଣ୍ଣ ରହିଛି । ୨୦୧୯ ସାଧାରଣ ନିର୍ବାଚନକୁ ଆଖିରେ ରଖି ଜଣେ ଯୁବନେତାଙ୍କ ହାତରେ ମୁଖ୍ୟମନ୍ତ୍ରୀ ଦାୟିତ୍ୱ ଦେଇପାରେ କଂଗ୍ରେସ ହାଇକମାଣ୍ଡ ।

ଛତିଶଗଡ

ଛତିଶଗଡରେ ୧୫ ବର୍ଷର ବିଜେପି ସରକାରକୁ ମାତ୍ ଦେଇ ସରକାରକୁ ଆସିଥିବା କଂଗ୍ରେସର ମୁଖ୍ୟମନ୍ତ୍ରୀ ରେସରେ ଚାରି ଜଣଙ୍କ ନାଁ ଶୁଣିବାକୁ ମିଳୁଛି । ଛତିଶଗଡ ପିସିସି ସଭାପତି ଭୁପେଶ ବାଘେଲ,  ବିରୋଧୀ ଦଳ ନେତା ଟି.ଏସ୍ ସିଂଦେଓ, ରାଜ୍ୟରୁ ଏକମାତ୍ର ସାଂସଦ ତମରାଧୱାଜ ସାହୁ ଏବଂ ପୂର୍ବତନ ମନ୍ତ୍ରୀ ତଥା ଲୋକପ୍ରିୟ ନେତା ଚରଣ ଦାସ ମହନ୍ତ । ଚାରି ଜଣ ଯାକ ବରିଷ୍ଠ ଏବଂ ଅଭିଜ୍ଞ ନେତା । ମନ୍ତ୍ରୀ ପଦ ବି ତୁଲାଇଛନ୍ତି । ତେଣୁ ଛତିଶଗଡରେ ଜଣେ ବରିଷ୍ଠ ନେତାଙ୍କୁ ହାଇକମାଣ୍ଡ ମୁଖ୍ୟମନ୍ତ୍ରୀ ଆସନରେ ବସାଇବା ସମ୍ଭାବନା ରହିଛି ।

ମଧ୍ୟପ୍ରଦେଶ

ମଧ୍ୟପ୍ରଦେଶରେ ବି ସମାନ ସ୍ଥିତି । ମୁଖ୍ୟମନ୍ତ୍ରୀ ଭାବେ ଏଠାରେ ବି କଂଗ୍ରେସର ଦୁଇଟି ହେବିୱେଟ୍ ଚେହେରା ରହିଛନ୍ତି । କମଲ ନାଥ ଏବଂ ଜ୍ୟୋତିରାଦିତ୍ୟ ସିନ୍ଧିଆ । ଜଣେ ଯୁବ ନେତା ଏବଂ ଅନ୍ୟଜଣେ ବରିଷ୍ଠ ରାଜନେତା । ବିଧାନସଭା ନିର୍ବାଚନ ପାଇଁ ରାଜ୍ୟରେ ପ୍ରଚାରର ମଙ୍ଗ ଧରିଥିଲେ ଦଳର ବରିଷ୍ଠ ନେତା ତଥା ପୂର୍ବତନ ମନ୍ତ୍ରୀ କମଲ ନାଥ । ତାଙ୍କ ପାଖରେ ରହିଛି ସମସ୍ତ ବିଧାୟକ ଏବଂ ପୂର୍ବତନ ମୁଖ୍ୟମନ୍ତ୍ରୀ ତଥା ଦଳର ବରିଷ୍ଠ ନେତା ଦିଗବିଜୟ ସିଂହ ସମର୍ଥନ । କମଲ ନାଥଙ୍କ ଗୋଟିଚାଳନାରେ ଏଥର ନିର୍ବାଚନକୁ ଓହ୍ଲାଇଥିଲା କଂଗ୍ରେସ । ସେହିଭଳି କମଲନାଥଙ୍କ ମୁଖ୍ୟମନ୍ତ୍ରୀ ପଥରେ ବଡ ପ୍ରତିଦ୍ୱନ୍ଦୀ ଭାବେ ଉଭା ହୋଇଛନ୍ତି କଂଗ୍ରେସ ଅଧ୍ୟକ୍ଷ ରାହୁଲ ଗାନ୍ଧିଙ୍କ ଯୁବ ସହଯୋଗୀ ଜ୍ୟୋତିରାଦିତ୍ୟ ସିନ୍ଧିଆ । ଗ୍ୱାଲିଅର ସିନ୍ଧିଆ ପରିବାରରୁ ଆସିଥିବା ଏହି ନେତା ହେଉଛନ୍ତି ଦଳର ଯୁବ ଚେହେରା । ତିନି ତିନି ଥର ସଂସଦକୁ ନିର୍ବାଚିତ ହେବା ସହ ମନ୍ତ୍ରୀ ପଦ ବି ତୁଲାଇଛନ୍ତି ଜ୍ୟୋତିରାଦିତ୍ୟ ।

ତିନୋଟି ରାଜ୍ୟରେ ବିପୁଳ ସମର୍ଥନ ପାଇବା ପରେ କଂଗ୍ରେସ ଅଧ୍ୟକ୍ଷ ରାହୁଲ ଗାନ୍ଧି ଜନତାଙ୍କୁ ଧନ୍ୟବାଦ ଦେଇଛନ୍ତି । ଏହାସହ ରାହୁଲ କହିଛନ୍ତି ପରିବର୍ତନର ସମୟ ଆସିଛି । କେନ୍ଦ୍ର ସରକାରଙ୍କ କୃଷି ବିରୋଧୀ ନୀତି ବିଫଳ ହୋଇଥିବା ବେଳେ ନିଯୁକ୍ତି ଦେବାରେ ବିଜେପି ସରକାର ଫେଲ ମାରିଥିବାରୁ ଲୋକେ ବିଜେପି ଉପରେ ଆସ୍ଥା ହରାଇଛନ୍ତି ବୋଲି କହିଛନ୍ତି ରାହୁଲ ଗାନ୍ଧୀ ।

Congratulations to the Congress for their victories.

Congratulations to KCR Garu for the thumping win in Telangana and to the Mizo National Front (MNF) for their impressive victory in Mizoram.

— Narendra Modi (@narendramodi) December 11, 2018

ଫଳାଫଳ ପ୍ରକାଶ ପାଇବା ପରେ କଂଗ୍ରେସକୁ ଶୁଭେଚ୍ଛା ଜଣାଇଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ସେହିପରି ତେଲେଙ୍ଗାନାରେ କେସିଆର ଏବଂ ମିଜୋରାମରେ ମିଜୋ ନାସନାଲ ଫ୍ରଂଟକୁ ବି ଶୁଭେଚ୍ଛା ଜଣାଇଛନ୍ତି । ମୋଦି ଟ୍ୱିଟ୍ କରି ଲେଖିଛନ୍ତି, ସହୃଦୟତାର ସହ ଆମେ ଜନତାଙ୍କ ମତାମତକୁ ଗ୍ରହଣ କରୁଛୁ । ସେହିପରି ଛତିଶଗଡ, ମଧ୍ୟପ୍ରଦେଶ ଏବଂ ରାଜସ୍ଥାନରେ ସେବାକରିବା ପାଇଁ ପୂର୍ବରୁ ସୁଯୋଗ ଦେଇଥିବାରୁ ଧନ୍ୟବାଦ ଜଣାଇଛନ୍ତି ।