ଜିଦରେ ଅଟଳ ଗୁରୁ ! ମନ୍ତ୍ରୀ କହିଲେ, ମୂଲ୍ୟାୟନରେ ପଡିବ ନାହିଁ କୌଣସି ପ୍ରଭାବ, ସେପଟେ ସରକାରୀ କଲେଜକୁ ଶିକ୍ଷକଙ୍କ ତାଲିକାଦେବାକୁ ଚିଠି ଲେଖିଲା ଶିକ୍ଷା ପରିଷଦ
କନକ ବ୍ୟୁରୋ: ଜିଦରେ ଅଡି ବସିଛନ୍ତି ଶିକ୍ଷକ । ୪ ଦଫା ଦାବି ନେଇ ଅଧ୍ୟାପକ ଓ ଶିକ୍ଷକ ମିଳିତ ମଂଚ ବିଶାଳ ସମାବେଶ କରିବ । ସରକାରଙ୍କୁ ଦାବିପତ୍ର ପ୍ରଦାନ କରିବ । ମାଟ୍ରିକ୍ ଓ ଯୁକ୍ତ ଦୁଇ ମୂଲ୍ୟାୟନରୁ ଦୂରେଇ ରହିଥିବା ଶିକ୍ଷକ ମଂଚ ଆଜି ସରକାରଙ୍କୁ ଘେରିବା ସହ ଶକ୍ତି ପ୍ରଦର୍ଶନ କରିବ । ବିଧାନସଭା ଚାଲିଥିବା ବେଳେ ଶିକ୍ଷକଙ୍କ ଆନ୍ଦୋଳନ ସରକାରଙ୍କ ପାଇଁ ଅଡୁଆ ସୃଷ୍ଟି କରିପାରେ ।
Kanak News is now on WhatsApp
Join and get latest news updates delivered to you via WhatsApp
ମାଟ୍ରିକ ପରୀକ୍ଷା ଖାତା ଦେଖାକୁ ବର୍ଜନ କରି ଆନ୍ଦୋଳନ ଜାରି ରଖିଥିବା ଶିକ୍ଷକମାନେ ୪ତାରିଖରେ ଆରମ୍ଭ ହେବାକୁ ଥିବା ଯୁକ୍ତ ଦୁଇ ଖାତା ଦେଖାକୁ ବର୍ଜନ କରିବାକୁ ଧମକ ଦେଇଛନ୍ତି । ୪ଦଫା ଦାବି ନେଇ ଆନ୍ଦୋଳନ କରୁଛନ୍ତି ଅଧ୍ୟାପକ ଓ ଶିକ୍ଷକ ମିଳିତ ମଂଚ । ତେବେ ଶିକ୍ଷକ ଆନ୍ଦୋଳନ ଖାତା ଦେଖାକୁ ପ୍ରଭାବିତ କରିବ ନାହିଁ ଏବଂ ମାଟ୍ରିକ ପରୀକ୍ଷା ଖାତା ଦେଖିବା ଭଳି ସରକାରୀ ଅଧ୍ୟାପକଙ୍କ ଦ୍ୱାରା ଯୁକ୍ତ ଦୁଇ ଖାତା ଦେଖାଯିବ ବୋଲି କହିଛନ୍ତି ମନ୍ତ୍ରୀ ।
ଅଧ୍ୟାପକ ଓ ଶିକ୍ଷକ ମିଳିତ ମଂଚ ଆନ୍ଦୋଳନରେ ବସିଥିବା ବେଳେ ଉଚ୍ଚ ମାଧ୍ୟମିକ ଶିକ୍ଷା ପରିଷଦ ପକ୍ଷରୁ ସମସ୍ତ କଲେଜକୁ ଚିଠି ଲେଖାଯାଇଛି । କଲେଜରେ କାର୍ଯ୍ୟରତ ଶିକ୍ଷକଙ୍କ ତାଲିକା ପଠାଇବାକୁ ଚିଠିରେ ଉଲ୍ଲେଖ ରହିଛି । ୨୭ ତାରିଖ ସୁଦ୍ଧା ଏହି ତାଲିକା ପଠାଇବାକୁ ନିର୍ଦ୍ଦେଶ ରହିଛି । ପଠାଯାଇଥିବା ତାଲିକାରୁ ମୂଲ୍ୟାୟନ ପାଇଁ ଅଧ୍ୟାପକଙ୍କ ନାମ ସୂଚୀ ପ୍ରସ୍ତୁତ କରାଯିବ ବୋଲି ଉଚ୍ଚ ଶିକ୍ଷା ପରିଷଦର ପରୀକ୍ଷା ନିୟନ୍ତ୍ରକ ଚିଠିରେ ଉଲ୍ଲେଖ କରିଛନ୍ତି ।