କନକ ବ୍ୟୁରୋ: ୧୩ ବିତିଲାଣି । ରାଜଧାନୀ ରାଜରାସ୍ତାରେ ଖରା ବର୍ଷାରେ କଟୁଛି ବ୍ଲକଗ୍ରାଣ୍ଟ ଶିକ୍ଷକ ଓ ଅଧ୍ୟାପକଙ୍କ ଦିନରାତି । ତଥାପି ସରକାରଙ୍କ ନିଦ ଭାଙ୍ଗୁନି । ଗୋଟିଏ ପଟେ ଶିକ୍ଷକମାନଙ୍କ ଆନ୍ଦୋଳନ ଚାଲିଥିଲା ବେଳେ ଅନ୍ୟପଟେ ସ୍କୁଲ, କଲେଜ ଛାତ୍ରଛାତ୍ରୀଙ୍କ ପାଠପଢ଼ା ଠପ୍ । ସ୍ଥିତି ଦିନକୁ ଦିନ ବିଗିଡ଼ିଯାଉଥିବା ବେଳେ ପୁଣିଥରେ ସମାବେଶ କରିବାକୁ ଅଣ୍ଟା ଭିଡ଼ିଛି ଓଡ଼ିଶା ସ୍କୁଲ କଲେଜ ଶିକ୍ଷକ କର୍ମଚାରୀ ମିଳିତ ମଞ୍ଚ । ବ୍ଲକଗ୍ରାଣ୍ଟ ଉଚ୍ଛେଦ, ଚାକିରି ସର୍ତ୍ତାବଳୀ ସହ ଯୋଗ୍ୟ ବିବେଚିତ ସମସ୍ତ ବିଦ୍ୟାଳୟ, ମହାବିଦ୍ୟାଳୟକୁ ପୂର୍ଣ୍ଣ ଅନୁଦାନ ପ୍ରଦାନ ଦାବିରେ ସୋମବାର ତଥା ଆଜି ହେବାକୁ ଥିବା ସମାବେଶରେ ଶିକ୍ଷକ, ଅଧ୍ୟାପକ, କର୍ମଚାରୀ ସାମିଲ ହେବେ।
Kanak News is now on WhatsApp
Join and get latest news updates delivered to you via WhatsApp
ବ୍ଲକଗ୍ରାଣ୍ଟ ପାଉଥିବା ଓ ପାଇବା ଅପେକ୍ଷାରେ ଥିବା ଶିକ୍ଷାନୁଷ୍ଠାନର ଅଧ୍ୟକ୍ଷ, ପ୍ରଧାନଶିକ୍ଷକ, ଜିଲ୍ଲା ଓ ବ୍ଲକ ସଙ୍ଗଠନ ଦାୟିତ୍ୱରେ ଥିବା ସାଥୀମାନଙ୍କୁ ସମାବେଶ ଲାଗି ନିମନ୍ତ୍ରଣ କରାଯାଇଛି । ପୂର୍ବାହ୍ନ ୧୧ଟାରେ ଏହି ସମାବେଶ ଅନୁଷ୍ଠିତ ହେବ । ଏଥିପାଇଁ ମିଳିତ ମଞ୍ଚ ପକ୍ଷରୁ ପ୍ରସ୍ତୁତି ଆରମ୍ଭ ହୋଇଥିବା ବେଳେ ଗତ ୨୪ ତାରିଖରେ ଅସମାପ୍ତ ରହିଥିବା ସରକାର-ଶିକ୍ଷକ ସଂଘର ଆଲୋଚନା ଉପରେ ସମସ୍ତଙ୍କ ନଜର ରହିଛି । ବୈଠକ ନେଇ ରବିବାର ରାତି ପର୍ଯ୍ୟନ୍ତ ରାଜ୍ୟ ସରକାରଙ୍କ ପକ୍ଷରୁ କୌଣସି ପ୍ରକାର ଡାକରା ଆସିନାହିଁ । ବୈଠକ ହେବ କି ନାହିଁ ତାହାକୁ ନେଇ ମଧ୍ୟ ଆଶଙ୍କା ପ୍ରକାଶ ପାଇଛି ।
ମିଳିତ ମଞ୍ଚର ଆବାହକ ମଣ୍ଡଳୀ ସଦସ୍ୟ ପ୍ରକାଶ ଚନ୍ଦ୍ର ମହାନ୍ତି, ଗୋଲକ ନାୟକ, ପବିତ୍ର ମହାଲା ମିଳିତ ବିବୃତ୍ତିରେ କହିଛନ୍ତି ଯେ, ଶିକ୍ଷକଙ୍କ ହକ୍ ଲାଗି ଆମେ ଲଢ଼େଇ କରୁଛୁ । ଯେ ପର୍ଯ୍ୟନ୍ତ ପୂର୍ଣ୍ଣ ଅନୁଦାନ ସହ ଚାକିରି ସର୍ତ୍ତାବଳୀ ଲାଗୁ କରା ନ ଯାଇଛି ସେ ପର୍ଯ୍ୟନ୍ତ ଆନ୍ଦୋଳନରୁ ହଟିବାର ପ୍ରଶ୍ନ ଉଠୁ ନାହିଁ । ଆଜି ହେବାକୁ ଥିବା ସମାବେଶରେ ୩୦ଟି ଯାକ ଜିଲ୍ଲାରୁ ପ୍ରାୟ ୫୦ ହଜାର ଶିକ୍ଷକ, ଅଧ୍ୟାପକ, କର୍ମଚାରୀ ସାମିଲ ହେବେ । ୧୩ ଦିନର ଏହି ଆନ୍ଦୋଳନକୁ ବିଭିନ୍ନ ମହଲରୁ ସମର୍ଥନ ମିଳିଛି । ବୁଦ୍ଧିଜୀବୀ, ଯୁବ, ଛାତ୍ର, ଶ୍ରମିକ, କୃଷକ ସଙ୍ଗଠନ, ଶିକ୍ଷକ ସଙ୍ଗଠନ, ବିଭିନ୍ନ ରାଜନୈତିକ ଦଳ ସାମିଲ ହୋଇଛନ୍ତି । ତଥାପି ସରକାରଙ୍କ କୁମ୍ଭକର୍ଣ୍ଣ ନିଦ ଭାଙ୍ଗୁନି । ଏକ ମାତ୍ର ଦାବି ପୂରଣ କରିବାରେ ଟାଳଟୁଳ ନୀତି ଅବଲମ୍ବନ କରାଯାଉଛି । ୨୪ ତାରିଖରେ ଯେଉଁ ଆଲୋଚନା ହୋଇଥିଲା ତାହା ଚୂଡ଼ାନ୍ତ ହୋଇ ନାହିଁ । ଅସମାପ୍ତ ରହିଥିବା ଆଲୋଚନା ଲାଗି ଆଜି ବୈଠକ ହେବ ବୋଲି କୁହାଯାଇଥିଲା । ହେଲେ ଏ ପର୍ଯ୍ୟନ୍ତ ସରକାରଙ୍କ ପକ୍ଷରୁ କୌଣସି ସବୁଜ ସଙ୍କେତ ମିଳିନି । ତେଣୁ ଆମେ ଆନ୍ଦୋଳନ ଜାରି ରଖିବୁ ।
ଅନ୍ୟପକ୍ଷରେ ଧାରଣାରେ ବସିଥିବା ଶିକ୍ଷକ, ଶିକ୍ଷୟିତ୍ରୀଙ୍କ ସ୍ୱାସ୍ଥ୍ୟ ଅବସ୍ଥା ଖରାପ ହେବାରେ ଲାଗିଛି । ଗତକାଲି ଦୁଇ ଜଣ ଶିକ୍ଷକ ମେଡିକାଲରେ ଭର୍ତ୍ତି ହୋଇଛନ୍ତି । ପ୍ରବଳ ବର୍ଷାରେ ଲୋୟର ପିଏମଜିରେ ଗତକାଲି ବି ଧାରଣା ଜାରି ରହିଛି । ପାଲ ତଳେ ଛିଡ଼ା ହୋଇ ଶିକ୍ଷକମାନେ ହକ୍ ପାଇଁ ଲଢ଼େଇ କରୁଛନ୍ତି । ରାତିରେ ଶିକ୍ଷକ, ଶିକ୍ଷୟିତ୍ରୀ ନାହିଁ ନ ଥିବା ଅସୁବିଧାର ସମ୍ମୁଖୀନ ହୋଇଛନ୍ତି।