କନକ ବ୍ୟୁରୋ : ଆଫଗାନିସ୍ତାନ ଓ ତାଲିବାନ ମଧ୍ୟରେ ଯୁଦ୍ଧ ଏବେ ନୂଆ ମୋଡ ନେଇଛି । ଆଫଗାନିସ୍ତାନକୁ ଅଧିକାର କରିବାକୁ ତାଲିବାନ ଉଦ୍ୟମ ଜାରି ରଖିଥିବା ବେଳେ ଆଫଗାନ ସେନା ଏବେ ତାଲିବାନ ଶିବିର ଉପରେ ବିମାନ ଆକ୍ରମଣ ଆରମ୍ଭ କରିଛି । ଆଫଗାନ ସେନାର ଏଭଳି ଆକ୍ରମଣ ଆଗରେ ହାରମାନି ତାଲିବାନ ଏବେ ପଛଘୁଞ୍ଚା ଦେବାକୁ ବାଧ୍ୟ ହୋଇଛି ।
Kanak News is now on WhatsApp
Join and get latest news updates delivered to you via WhatsApp
ଆଫଗାନ ସେନା ଏନେଇ ଏକ ପ୍ରେସ ବିଜ୍ଞପ୍ତି ଜାରି କରି କହିଛି କି ଦେଶର ବିଭିନ୍ନ ଅଞ୍ଚଳରେ ଥିବା ତାଲିବାନ ଶିବିର ଉପରେ ଆକ୍ରମଣ ଜାରି ରହିଛି । ବିଶେଷକରି ଦକ୍ଷିଣ-ପଶ୍ଚିମ ଆଫଗାନିସ୍ତାନରେ ଥିବା ହେଲମଣ୍ଡ ରାଜ୍ୟର ରାଜଧାନୀ ଲସକର ଗା’ ସହର ଉପରେ ପ୍ରବଳ ବୋମାମାଡ଼ କରାଯାଇଛି । ଏହି ସହରର ଏକ ବଡ଼ ଅଂଚଳକୁ ତାଲିବାନ ଅଧିକାର କରିସାରିଥିବାରୁ ତାହାକୁ ମୁକ୍ତ କରିବାକୁ ଏହି ବୋମା ମାଡ଼ କରାଯାଇଛି । ସହରର ରେଡ଼ିଓ ଓ ଟେଲିଭିଜନ କେନ୍ଦ୍ର ତାଲିବାନ କବଜାରେ ଥିବାରୁ ଏସବୁ ପ୍ରତିଷ୍ଠାନ ଉପରେ ବିମାନ ଆକ୍ରମଣ କରାଯାଇଛି । ଅନ୍ୟପକ୍ଷରେ ଉତ୍ତର ଆଫଗାନିସ୍ତାନର ସର-ଏ-ପୁଲ ସହରକୁ ତାଲିବାନ ଅଧିକାର କରିନେଇଛି ।
ଗତ ଏପ୍ରିଲ ମାସରୁ ଆମେରିକୀୟ ସେନା ପ୍ରତ୍ୟାହାର ପ୍ରକ୍ରିୟା ଆରମ୍ଭ ହେବା ପରେ ତାଲିବାନ ଆଫଗାନିସ୍ତାନର ଅଧିକାଂଶ ରାଜ୍ୟକୁ ଅଧିକାର କରି ନେଇଛି । ତେବେ କାବୁଲ ଏବେ ବି ଆଫଗାନ ସରକାରଙ୍କ ନିୟନ୍ତ୍ରଣରେ ରହିଛି ।