କନକ ବ୍ୟୁରୋ: ବହୁଚର୍ଚ୍ଚିତ ବିଲକିସ୍ ବାନୋ ଗଣଦୁଷ୍କର୍ମ ମାମଲାର ଦୋଷୀଙ୍କୁ ଜାମିନ ଦେବା ନେଇ କେନ୍ଦ୍ର ସରକାରଙ୍କ ଉପରେ ବର୍ଷିଛି କଂଗ୍ରେସ । କଂଗ୍ରେସ ଏ ପ୍ରସଙ୍ଗରେ ଲଗାତର କେନ୍ଦ୍ର ସରକାରକୁ ଟାର୍ଗେଟ୍ କରିଆସୁଛି । ସାଂସଦ ରାହୁଲ ଗାନ୍ଧୀ ମଧ୍ୟ ସରକାରଙ୍କ ଉପରେ ଜୋରଦାର ହମଲା କରିଛନ୍ତି । ରାହୁଲ ଗାନ୍ଧୀ ସିଧାସଳଖ ଏ ପ୍ରସଙ୍ଗରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ଟାର୍ଗେଟ୍ କରିଛନ୍ତି । ‘୫ମାସର ଗର୍ଭବତୀ ମହିଳାଙ୍କୁ ଦୁଷ୍କର୍ମ ଓ ତାଙ୍କର ୩ ବର୍ଷର ଶିଶୁକୁ ହତ୍ୟା କରିଥିବା ଅଭିଯୁକ୍ତଙ୍କୁ ‘ଆଜାଦୀ କେ ଅମୃତ ମହୋତ୍ସବ’ ଅବସରରେ ଖଲାସ କରାଗଲା । ନାରୀ ସଶକ୍ତିକରଣର ମିଥ୍ୟା ପ୍ରଚାର କରୁଥିବା ଦେଶର ମହିଳାଙ୍କୁ କ’ଣ ବାର୍ତ୍ତା ଦେଉଛନ୍ତି? ଦେଶବାସୀ ପ୍ରଧାନମନ୍ତ୍ରୀଙ୍କ କହିବା ଓ କରିବା ମଧ୍ୟରେ ଫରକ ଦେଖୁଛନ୍ତି’
Kanak News is now on WhatsApp
Join and get latest news updates delivered to you via WhatsApp
ବିଲକିସ୍ ବାନୋ ଗଣଦୁଷ୍କର୍ମ ମାମଲାରେ ଆଜୀବନ ଦଣ୍ଡାଦେଶ କାଟୁଥିବା ୧୧ ଦୋଷୀଙ୍କୁ ସୋମବାର ସ୍ୱାଧୀନତା ଦିବସ ଅବସରରେ ଖଲାସ କରିଦିଆଯାଇଥିଲା । ଗୁଜରାଟ ସରକାର କ୍ଷମା ରାଜିନାମା ଆଧାରରେ ଏମାନଙ୍କୁ ଖଲାସ ପାଇଁ ଅନୁମତି ଦେଇଥିଲେ । ମୁମ୍ବାଇରେ ସିବିଆଇର ସ୍ୱତନ୍ତ୍ର କୋର୍ଟ ୧୧ ଦୋଷୀଙ୍କୁ ବିଲକିସ୍ ବାନୋଙ୍କ ସହ ହୋଇଥିବା ଗଣଦୁଷ୍କର୍ମ ଓ ତାଙ୍କ ପରିବାରର ୭ ଜଣ ସଦସ୍ୟଙ୍କୁ ହତ୍ୟା କରିବା ଅପରାଧରେ ୨୦୦୮ ମସିହା, ଜାନୁଆରୀ ୨୧ ତାରିଖରେ ଆଜୀବନ କାରାଦଣ୍ଡାଦେଶ ଶୁଣାଇଥିଲେ । ପରେ ବମ୍ବେ ହାଇକୋର୍ଟ ସେମାନଙ୍କ ଦଣ୍ଡାଦେଶ କାଏମ ରଖିଥିଲେ । ଏତେ ସଙ୍ଗୀନ ଅପରାଧ କରିଥିବା ଦୋଷୀଙ୍କୁ ଖଲାସ କରିବା ପରେ ବିରୋଧୀ ମଧ୍ୟ କେନ୍ଦ୍ର ସରକାରଙ୍କ ଉପରେ ବର୍ଷିଛନ୍ତି ।
ବିଲକିସ୍ ବାନୋ କିଏ?
– ଗୁଜରାଟରେ ରହୁଥିବା ଜଣେ ମୁସଲିମ୍ ମହିଳା ହେଉଛନ୍ତି ବିଲକିସ୍ ବାନୋ
– ୨୦୦୨ରେ ଗୁଜରାଟ ଦଙ୍ଗା ପରେ ରାଜ୍ୟ ଛାଡ଼ିବାକୁ ଚାହୁଁଥିଲେ
– ତାଙ୍କ ସହ ତାଙ୍କର କୁନି ଝିଅ ଓ ପରିବାରର ୧୫ ଜଣ ଅନ୍ୟ ସଦସ୍ୟ ଥିଲେ
– ସେତେବେଳେ ଗୁଜରାଟରେ ହିଂସା ଜୋର ଧରିଥିଲା
– ୫ମାସର ଗର୍ଭବତୀ ଥିବା ବିଲକିସ ମାର୍ଚ୍ଚ ୩ ତାରିଖରେ ନିଜ ପରିବାର ସହ ଏକ ସୁରକ୍ଷିତ ସ୍ଥାନରେ ଲୁଚି ରହିଥିଲେ
– ହଠାତ ୨୦ରୁ ୩୦ ଜଣ ଅଜଣା ବ୍ୟକ୍ତି ମାରଣାସ୍ତ୍ର ସହ ସେମାନଙ୍କ ଉପରକୁ ଆକ୍ରମଣ କଲେ
– ଏହି ଦଙ୍ଗାରେ ବାନୋଙ୍କ ପରିବାରର ୭ ଜଣ ପ୍ରାଣ ହରାଇଥିଲେ
– ଆଉ ବାନୋଙ୍କ ସହ ଗଣଦୁଷ୍କର୍ମ କରାଯାଇଥିଲା
– ଏପରିକି ତାଙ୍କର ୩ ବର୍ଷର ଝିଅକୁ ମଧ୍ୟ ମାରିଦେଇଥିଲେ
– ଏହି ଜଘନ୍ୟ ଅପରାଧ ପାଇଁ ସୁପ୍ରିମକୋର୍ଟ ସିବିଆଇ ତଦନ୍ତ ପାଇଁ ନିର୍ଦ୍ଦେଶ ଦେଇଥିଲେ
– ମୁମ୍ବାଇରେ ସିବିଆଇର ଏକ ସ୍ୱତନ୍ତ୍ର କୋର୍ଟ ୧୧ ଦୋଷୀଙ୍କୁ ୨୧ ଜାନୁଆରୀ, ୨୦୦୮ରେ ଆଜୀବନ କାରାଦଣ୍ଡାଦେଶ ଶୁଣାଇଥିଲେ
– ପରେ ବମ୍ବେ ହାଇକୋର୍ଟ ଦଣ୍ଡାଦେଶ କାଏମ ରଖିଥିଲେ
– ୧୫ ବର୍ଷର ଦଣ୍ଡାଦେଶ କାଟିବା ପରେ ଜଣେ ଦୋଷୀ ସମୟ ପୂର୍ବରୁ ସୁପ୍ରିମକୋର୍ଟଙ୍କ ଦ୍ୱାରସ୍ଥ ହୋଇଥିଲା
– ସୁପ୍ରିମକୋର୍ଟ ଗୁଜରାଟ ସରକାରଙ୍କୁ ଦଣ୍ଡାଦେଶ ଉପରେ ପୁନଃନିଷ୍ପତ୍ତି ନେବା ପାଇଁ ନିର୍ଦ୍ଦେଶ ଦେଇଥିଲେ
– ପରେ ଗୁଜରାଟ ସରକାର ସମସ୍ତ ଦୋଷୀଙ୍କୁ ଖଲାସ କରିବାକୁ ନିର୍ଦ୍ଦେଶ ଦେଲେ
ସମସ୍ତ ଦୋଷୀଙ୍କୁ ଖଲାସ କରିବା ଘଟଣା ସମସ୍ତଙ୍କୁ ଆଶ୍ଚର୍ଯ୍ୟଚକିତ କରିଛି । ଦୋଷୀଙ୍କ ମୁକ୍ତ ହେବା ନେଇ କୌଣସି ଖବର ନଥିବା ବାନୋଙ୍କ ସ୍ୱାମୀ ୟାକୁବ ରସୁଲ କହିଛନ୍ତି ।