ହାଣ୍ଡିଶାଳରୁ ପିଆଜ ଉଭାନ ! ଓଡିଶା ବଜାରରେ ୮୦ ଟପିଲାଣି ପିଆଜ ଦର: ଖାଉଟି ହନ୍ତସନ୍ତ, ଯୋଗାଣ ମନ୍ତ୍ରୀ କହିଲେ, ଅନ୍ୟ ରାଜ୍ୟଠାରୁ କମ୍ ଅଛି ଦର
ସରକାରୀ ଦୋକାନରେ ରିହାତିରେ ମିଳୁଛି ପିଆଜ
କନକ ବ୍ୟୁରୋ: ଓଡିଶା ବଜାରରେ ୮୦ ଟପିଲାଣି ପିଆଜ ଦର । ଫଳରେ ହାଣ୍ଡିଶାଳରୁ ଏବେ ପିଆଜ ଉଭାନ ହେବାକୁ ବସିଲାଣି । ଅତ୍ୟଧିକ ଦର ବୃଦ୍ଧିକୁ ନେଇ ଖାଉଟି ହନ୍ତସନ୍ତ ହେଉଛନ୍ତି । ଯେଉଁ ପିଆଜ ଦର କିଲୋପିଛା ମାସକ ତଳେ ୨୦ରୁ ୨୫ ଟଙ୍କା ଥିଲା । ଏବେ ସେହି ପିଆଜ ଦରରେ ନିଆଁ ଲାଗିବା ପରେ ପିଆଜ କିଣିବାକୁ ଡରୁଛନ୍ତି ଗ୍ରାହକ ।
Kanak News is now on WhatsApp
Join and get latest news updates delivered to you via WhatsApp
ଅନ୍ୟପଟେ ପିଆଜ ଦର ବୃଦ୍ଧିକୁ ନେଇ ଯୋଗାଣ ମନ୍ତ୍ରୀ କହିଛନ୍ତି ଏହା କେବଳ ଓଡିଶା ନୁହେଁ ସାରା ଦେଶର ସ୍ଥିତି । ଗତମାସ ୨୩,୨୪ ଓ ୨୫ ତାରିଖରେ ହୋଇଥିବା ଲଘୁଚାପ ଜନିତ ବର୍ଷା ଯୋଗୁଁ ସ୍ଥାନୀୟ ପିଆଜ ଅମଳ ହୋଇପାରିନାହିଁ । ଫଳରେ ବାହାର ରାଜ୍ୟରୁ ପିଆଜ ଆମଦାନି କରି ବିକ୍ରି କରିବାକୁ ପଡୁଛି ।
ତେବେ ଖାଉଟିଙ୍କ ଅସୁବିଧାକୁ ଦୃଷ୍ଟିରେ ରଖି ରାଜ୍ୟ ୨୮୪ଟି ସୁଲଭ ବିକ୍ରୟ କେନ୍ଦ୍ରରେ ପିଆଜ ବିକ୍ରି କରୁଛନ୍ତି । ଅସାଧୁ ବ୍ୟବସାୟୀ ଓ କଳାବଜାରୀ ଉପରେ ସରକାର କଡା ନଜର ରଖିଛନ୍ତି । ଏବଂ ଆବଶ୍ୟକତା ଅନୁସାରେ କଡା ପଦକ୍ଷେପ ନେବେ ବୋଲି କହିଛନ୍ତି ଯୋଗାଣ ମନ୍ତ୍ରୀ ।