ପଦ ଏକ, ଦାବିଦାର ଅନେକ । ପିସିସି ସଭାପତି ଭାବେ କାହା ନାଁରେ ମୋହର ମାରିବେ ରାହୁଲ, ତାରା କହିଲେ, ଦାବି କରିନି ହେଲେ ମିଳିଲେ ଛାଡିବେନି ।
କନକ ବ୍ୟୁରୋ : ପିସିସି ପରିବର୍ତ୍ତନ ନେଇ କଂଗ୍ରେସରେ କସରତ ଚାଲିଥିବାବେଳେ ବରିଷ୍ଠ ନେତା ସୁର ରାଉତରାୟଙ୍କ ବୟାନ ଚର୍ଚ୍ଚାର ଖୋରାକ ଯୋଗାଇଛି । ସୁର କହିଛନ୍ତି, ରାହୁଲଙ୍କୁ ଦେଖା କରିଥିବା ୧୭ ଜଣଙ୍କ ମଧ୍ୟରୁ ୧୦ ଜଣ ପିସିସି ସଭାପତି ଦାବିଦାର ଥିବା ଜଣାଇଛନ୍ତି । ସେପଟେ ବିଧାୟକ ତାରା ବାହିନୀପତି କହିଛନ୍ତି, ସେ ସଭାପତି ପଦ ପାଇଁ ଆଶାୟୀ ନୁହନ୍ତି, କିନ୍ତୁ ପଦ ମିଳିଲେ ଛାଡିବେ ନାହିଁ ।
Kanak News is now on WhatsApp
Join and get latest news updates delivered to you via WhatsApp
ଦିଲ୍ଲୀରେ ରାହୁଲଙ୍କ ସହ ପିିସିସି ପରିବର୍ତନ ନେଇ ଆଲୋଚନା କରି ଫେରିବା ପରେ ଜଟଣୀ ବିଧାୟକଙ୍କ ଏହି ବୟାନ ଏବେ ବେଶ ରୋଚକ ହୋଇଛି । ସୁରଙ୍କ କହିବା କଥା ହେଲା, ୧୭ ଜଣ ରାହୁଲଙ୍କ ସାକ୍ଷାତ କରିଥିଲେ । ଆଉ ଏମାନଙ୍କ ମଧ୍ୟରୁ ପ୍ରାୟ ୧୦ରୁ ଅଧିକ ନେତା ପିସିସି ସଭାପତି ପାଇଁ ଆଶାୟୀ ଥିବା ଜଣାଇଛନ୍ତି । ଆଉ ଏହି ବୟାନ ରାଜନୈତିକ ମହଲରେ ଚର୍ଚ୍ଚାର ଖୋରାକ ଯୋଗାଇଛି ।
ସୁର ରାଉତରାୟଙ୍କ ବୟାନ ସ୍ପଷ୍ଟ କରୁଛି ଯେ, ସଭାପତି ପଦ ନେଇ ରାଜ୍ୟରେ କଂଗ୍ରେସରେ ଏବେ ବି କନ୍ଦଳ କେତେ ମାତ୍ରାରେ ରହିଛି । ରାହୁଲଙ୍କ ଆଗରେ ସବୁ ନେତା ନିଜ ନିଜ ଦାବି ଉପସ୍ଥାପନ କରିଛନ୍ତି । କିନ୍ତୁ ଅଧିକାଂଶ ଚାହିଁଛନ୍ତି ନିଜେ ହିଁ ସଭାପତି ହେବେ ।
ସେପଟେ ରାହୁଲ ଗାନ୍ଧି ଶୃଙ୍ଖଳାର ପାଠ ପଢାଇଥିଲେ ବ ପିସିସି ପଦ ନେଇ ତାରାଙ୍କ ବୟାନ ଚର୍ଚ୍ଚାର ବିଷୟ ହୋଇଛି । ସେ କହିଛନ୍ତି, ରାହୁଲ ଯାହାକୁ ସଭାପତି କରିବେ ସେ ତାଙ୍କ ସହ କାମ କରିବେ । ରାହୁଲଙ୍କୁ ପିସିସି ସଭାପତି ହେବେ ବୋଲି ସେ କହିନାହନ୍ତି । ପିସିସି ସଭାପତି ପାଇଁ ସେ ଆଶାୟୀ ନୁହନ୍ତି , କିନ୍ତୁ ପଦ ମିଳିଲେ ଛାଡିବେନି ବୋଲି କହିଛନ୍ତି ଜୟପୁର ବିଧାୟକ ।
ରାଜ୍ୟ ନେତାଙ୍କ ବୟାନବାଜି ମଧ୍ୟରେ ଯାହା ଜଣାପଡୁଛି ରାଜ୍ୟରେ ପିସିସି ସଭାପତିଙ୍କ ନାଁ ଘୋଷଣା ବିଳମ୍ବ ହୋଇପାରେ । ଚଳିତ ସପ୍ତାହରେ ରାଜସ୍ଥାନର ଉଦୟପୁରରେ କଂଗ୍ରେସର ୩ ଦିନିଆ ଚିନ୍ତନ ଶିବିର ଆରମ୍ଭ ହେବ । ଏଥିରେ ସବୁ ରାଜ୍ୟର ପ୍ରାୟ ୪ ଶହରୁ ଅଧିକ ନେତା ଯୋଗଦେଇ ନିଜର ମତ ରଖିବେ । ଆଉ ତା ପରେ ଯାଇ ପିସିସି ସଭାପତି ପଦ ଘୋଷଣା ହୋଇପାରେ ।