କନକ ବ୍ୟୁରୋ: ପିଇବା ପାଣି ପାଇଁ ଡହଳବିକଳ ହେଉଛନ୍ତି ଗାଁର ଲୋକେ । ପାହାଡର ପାଦ ଦେଶରେ ରହୁଥିବା ଲୋକଙ୍କ ପାଇଁ ପାଣି ମୁନ୍ଦାଏ ଯେମିତି ମ୍ବପ୍ନ ପାଲଟିଛି । ଲୋକେ ବାଧ୍ୟ ହେଇ ଚୂଆ ଖୋଳି ପାଣି ପିଉଛନ୍ତି । ବାଲେଶ୍ୱର ସୋର ଦେବଗିରି ପର୍ବତ ପାଦ ଦେଶରେ ରହୁଥିବା ଲୋକେ ପାଣି ମୁନ୍ଦାଏ ପାଇଁ ମାଇଲ ମାଇଲ ବାଟ ଯାଉଛନ୍ତି । ଖରାଦିନ ଆସିଲେ ଜଳସ୍ତର ନିମ୍ନକୁ ଖସିଯାଏ । ଆଉ ଲୋକେ ବାଧ୍ୟ ହୋଇ ଗଡିଆ ଆଦିର ଦୂଷିତ ପାଣି ପିଇବାକୁ ବାଧ୍ୟ ହୋଇଥାନ୍ତି । କିଛି ସ୍ଥାନରେ ଗଚ୍ଛିତ ପାଣିରୁ ପୋକ ବାହାରୁଥିବା ବେଳେ ଲୋକେ ବାଧ୍ୟ ହୋଇ ସେହି ପାଣିକୁ ବ୍ୟବହାର କରୁଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଭଅଁରା ଗାଁରୁ ନେଇ ଜାତପଡା, ବାଉଁଶପାଳ ବନ୍ଧସାହି ଆଦି ପାହାଡତଳିଆ ଗାଁର ଲୋକେ ପାଣି ଯୋଗୁ ଡହଳବିକଳ ହୋଇ ମାଇଲ ମାଇଲ ବାଟ ଯାଉଛନ୍ତି ପାଣି ସଂଗ୍ରହ କରିବାକୁ । କିଛି ସ୍ଥାନରେ ପାନୀୟ ଜଳ ପ୍ରକଳ୍ପ ହୋଇଥିଲେ ବି ଅଧିକାଂଶ ପ୍ରକଳ୍ପ କାର୍ଯ୍ୟକାରୀ ନହୋଇ ବନ୍ଦ ପଡିଛି । ଆଉ କିଛି ସ୍ଥାନରେ ବୋରିଂ ଖୋଳାଯାଇଥିଲେ ବି ପାଣି ନମିଳିବାରୁ ତାହା ମଧ୍ୟ ବନ୍ଦ ରହିଛି । ଗାଁ ଲୋକେ ମେଗା ପ୍ରକଳ୍ପ ପାଇଁ ଦାବି କରୁଥିବା ବେଳେ ଯେଉଁ ଗାଁରେ ନଳକୂଅ ବି ନାହିଁ ସେଠାରେ ଟ୍ୟାଙ୍କର ଯୋଗେ ପାଣି ଯୋଗାଇବାକୁ ଦାବି କରିଛନ୍ତି ।