୨୦୨୪ ପାଇଁ ରାଜ୍ୟ ବିଜେପିର ନିର୍ବାଚନ ପ୍ରସ୍ତୁତି: କାଲି କାର୍ଯ୍ୟକାରିଣୀରେ ଆସିବ ଚିଠା ପ୍ରସ୍ତାବ
କନକ ବ୍ୟୁରୋ: ବିଗତ ଉପନିର୍ବାଚନ ହେଉ କି ପଂଚାୟତ ହେଉ କିମ୍ବା ପୌର ନିର୍ବାଚନ ହେଉ , ସବୁଥିରେ ବିଜେଡି ବାଜିମାତ କରୁଛି । ଏଭଳି ସ୍ଥିତିରେ ମୁଖ୍ୟ ବିରୋଧୀ ଦଳ ବିଜେପି ପାଇଁ ଚ୍ୟାଲେଞ୍ଜ ଆହୁରି ବଢିଯାଉଛି । ଏହାରି ଭିତରେ ୨୦୨୪ ନିର୍ବାଚନକୁ ଦଳ କେମିତି ଯିବ ସେନେଇ ବ୍ଲୁ-ପ୍ରିଂଟ ପ୍ରସ୍ତୁତ କରୁଛି ବିଜେପି ।
Kanak News is now on WhatsApp
Join and get latest news updates delivered to you via WhatsApp
ମଙ୍ଗଳବାର ରାଜ୍ୟ ପଦାଧିକାରୀ, ଜିଲ୍ଲା ସଭାପତି ଏବଂ ପ୍ରଭାରୀମାନଙ୍କ ବୈଠକରେ ମାନଓ ମନ୍ଥନ ଚାଲିଛି କେମିତି ନବୀନ ସରକାରର ବିଜୟରଥକୁ ଅଟକାଇ ହେବ । ନେତାମାନେ ପ୍ରସ୍ତାବ ରଖୁଛନ୍ତି, କେମିତି ବିଜେଡିର ମୁକାବିଲା କରିବେ । ଏଥିପାଇଁ ବୁଧବାର ରାଜ୍ୟ କାର୍ଯ୍ୟକାରିଣୀ ଲାଗି ପ୍ରସ୍ତୁତ କରିଛି ପ୍ରସ୍ତାବ । ଯାହାକୁ ନେଇ ଆଗାମୀ ଦିନରେ ରାଜନୈତିକ ଚିଠା ପ୍ରସ୍ତାବ ଜରିଆରେ ଖସଡା ପ୍ରସ୍ତୁତ କରାଯିବ । ଏହାବାଦ ତାକୁ ନେଇ ଆଗାମୀ ତିନି ମାସ ତାର ବିଭିନ୍ନ ଆନ୍ଦୋଳନାତ୍ମକ କାର୍ଯ୍ୟପନ୍ଥା ନିର୍ଦ୍ଧାରଣ କରିବ ରାଜ୍ୟ ବିଜେପି ।
୨୨ବର୍ଷର ଶାସନରେ ଘରେ ଘରେ ବିଜୁଳି ପହଂଚି ପାରିନି, ବେରୋଜଗାରୀ, ମହିଳାଙ୍କ ଉପରେ ଅତ୍ୟାଚାର , ରାଜ୍ୟରେ ଆଇନ ଶୃଂଖଳା ବିପର୍ଯ୍ୟସ୍ତ ବ୍ୟବସ୍ତାକୁ ପ୍ରସଙ୍ଗ କରିବ ବିଜେପି । ଏହାଛଡା ବିଜୁ ସ୍ୱାସ୍ଥ୍ୟ କଲ୍ୟାଣ ଯୋଜନାର ବିଫଳତା, ବିନା ଟେଣ୍ଡରରେ ଠିକା କାମ ମିଳିବା ,ମହାନଦୀ ଶୁଖିବା ସମସ୍ୟା ଓ କେନ୍ଦ୍ରୀୟ ଯୋଜନାର ହରିଲୁଟ ଭଳି ପ୍ରସଙ୍ଗକୁ ଆଧାର କରି ଲୋକମାନଙ୍କ ପାଖକୁ ଯିବ ବିଜେପି ।
୨୦୧୯ରେ ୧୨୦ ମିଶନ ନେଇ ନିର୍ବାଚନକୁ ଓହ୍ଲାଇଥିବା ବିଜେପି ମାତ୍ର ୨୨ଟି ସିଟରେ ସୀମୀତ ରହିଯାଇଥିଲା । ଗତ ପଂଚାୟତ ଏବଂ ପୌର ନିର୍ବାଚନରେ ଦଳର ପ୍ରଦର୍ଶନ ଦୟନୀୟ ଥିଲା । ପୁଣିଥରେ ଅଂଟା ସଳଖି ଠିଆ ହେବାକୁ ଚେଷ୍ଟା କରୁଥିବା ରାଜ୍ୟ ବିଜେପିକୁ କେମିତି ଓଡିଶାବାସୀ ଗ୍ରହଣ କରୁଛନ୍ତି ତାହା ୨୦୨୪ ସାଧାରଣ ନିର୍ବାଚନ ଫଳାଫଳରେ ଜଣାପଡିବ ।