ରାଜଧାନୀ ରାସ୍ତାରେ ଅଘୋଷିତ ଅଚଳାବସ୍ଥା । ଟ୍ରାଫିକ ବିଭ୍ରାଟ ପାଇଁ ଦାୟୀ କିଏ ?
ଚାଷୀ ଆନ୍ଦୋଳନ ପାଇଁ ପ୍ରସ୍ତୁତ ନଥିଲା କି ପୁଲିସ ବିଭାଗ ? ଘଂଟା ଘଂଟା ଧରି ରାସ୍ତା ଜାମ୍ ରହିଲା, ଟ୍ରାଫିକ ବିଭ୍ରାଟ ଥିଲା ଗୁରୁତର ।
କନକ ବ୍ୟୁରୋ: ପ୍ରଥମ ଥର ପାଇଁ ଚାଷୀ ଆନ୍ଦୋଳନ କରୁନାହିଁ କିମ୍ବା ପ୍ରଥମ ଥର ପାଇଁ ହକ୍ ପାଇଁ ରାସ୍ତାକୁ ଓହ୍ଲାଇନାହିଁ । ୫ ତାରିଖରେ ଭୁବନେଶ୍ୱର ଚାଲ ଡାକରା ଦିଆଯାଇଥିଲା । ବିଭିନ୍ନ ଆଡୁ ଚାଷୀ ପଦଯାତ୍ରାରେ ମୁହାଁଇଥିଲେ ରାଜଧାନୀ । ପୋଲିସ ସବୁ ଜାଣିଥିଲା । ହେଲେ ଚରମ ଅବ୍ୟବସ୍ଥା ଆଜି ରାଜଧାନୀରେ ଅଘୋଷିତ ଅଚଳାବସ୍ଥା ସୃଷ୍ଟି କରିଛି । ସାରା ଭୁବନେଶ୍ୱରରେ ଆଜି ଟ୍ରାଫିକ୍ ଅଚଳ ହୋଇ ପଡିଥିଲା । କଟକ ଆଡୁ ରାଜଧାନୀରେ ପଶିବା ଥିଲା ମୁସ୍କିଲ । ଆଉ ଖୋର୍ଦ୍ଧା ପଟୁ ମଧ୍ୟ ସମାନ ଅବସ୍ଥା । ଏନଏଚ ଅବରୋଧ କରି ଚାଷୀ ଆନ୍ଦୋଳନ କରୁଥିଲେ ଆଉ ପୋଲିସ ଥିଲା ନୀରବଦ୍ରଷ୍ଟା । ଖାଲି ଏତିକି ନୁହେଁ, ଟ୍ରାଫିକ ବାବଦ କୈାଣସି ପୂର୍ବ ସୂଚନା ପୋଲିସ ବିଭାଗ ପକ୍ଷରୁ ଦିଆଯାଇନଥିବା ବେଳେ, ଅଯଥାରେ ଗାଡି ଗୁଡିକୁ ବିଭିନ୍ନ ରାସ୍ତାକୁ ଡାଇଭର୍ଟ କରିବା ଫଳରେ ଜୟଦେବ ବିହାର ରାସ୍ତା ଏବଂ ହଂସପାଳ ରାସ୍ତାରେ ଅଚଳାବସ୍ଥା ଦେଖିବାକୁ ମିଳିଥିଲା ।
Kanak News is now on WhatsApp
Join and get latest news updates delivered to you via WhatsApp
ଏଠି ପ୍ରଶ୍ନ ଉଠୁଛି, ହଜାର ହଜାର ଚାଷୀ ଯେତେବେଳେ ରାଜଧାନୀକୁ ଆସିବେ ବୋଲି ଘୋଷଣା କରିଥିଲେ, ତାକୁ ଆଖି ଆଗରେ ରଖି ପୁଲିସ ପ୍ରଶାସନ ସଜାଗ ହେବାର ଆବଶ୍ୟକତା ନଥିଲା କି ? ସାଧାରଣ ଲୋକଙ୍କ ପାଇଁ କାହିଁକି ପୂର୍ବରୁ ଟ୍ରାଫିକ ବାବଦ ସୂଚନା ଜାରି କରାଗଲା ନାହିଁ? ଏହାକୁ ନେଇ ଏବେ ପ୍ରଶ୍ନବାଚୀ ତିଆରି ହୋଇଛି । ଆନ୍ଦୋଳନ ସମୟରେ ରାସ୍ତା ଅବରୋଧ ଫଳରେ ନାନା ଅସୁବିଧାର ସାମ୍ନା କରୁଥିବା ଲୋକଙ୍କୁ ସଠିକ ଭାବେ ଗାଇଡ୍ କରିବାରେ ମଧ୍ୟ ପୁଲିସ ବିଭାଗର ବିଫଳତା ଜଳଜଳ ହୋଇ ଦେଖା ଯାଉଥିଲା । ଲାଗୁଥିଲା, ସ୍ଥିତିର ମୁକାବିଲା ପାଇଁ ଯେଉଭଳି କୈାଣସି ପ୍ରସ୍ତୁତି କରାଯାଇନାହିଁ ।
କଟକ ଆଡୁ ଭୁବନେଶ୍ୱର ଆସୁଥିବା ଅନେକ ଗାଡି ମଟର ରାସ୍ତାରେ ଅଟକି ରହିଥିବା ବେଳେ ତମାଣ୍ଡୋ ପଟୁ ମଧ୍ୟ ସମାନ ଅସସ୍ଥା ଦେଖିବାକୁ ମିଳିଥିଲା । ଆଉ ସବୁକିଛିକୁ ବଳି ଯାଇଥିଲା ରାଜଧାନୀ ଭିତରେ ଟ୍ରାାଫିକ ପୁଲିସ ପକ୍ଷରୁ କରାଯାଇଥିବା ରୁଟ୍ ଡାଇଭର୍ସନ । ଯାହା ଫଳରେ ରାସ୍ତା ଉପରେ ଘଂଟା ଘଂଟା ଧରି ଗାଡି ମଟର ଅଟକି ରହିଥିଲା । ଜୟଦେବ ବିହାର ଓଭରବ୍ରିଜ ଦେଇ କୈାଣସି ଚାରି ଚକିଆ ଯାନକୁ ଛଡାଯାଉନଥିଲା । କାଳେ କୈଣସି ଗାଡିରେ ଚାଷୀ ଭୁବନେଶ୍ୱର ପଳେଇ ଆସିବେ, ହୁଏତ ଏହି ଡର ଘାରିଥିଲା ପୁଲିସ ବିଭାଗକୁ । ଏହି ରୁଟ ଡାଇଭର୍ସନ ଫଳରେ ଗୁରୁତର ବିଭ୍ରାଟ ରାସ୍ତାରେ ଦେଖୀବାକୁ ମିଳିଥିଲା ।
ଖଣ୍ଡଗିରି ପଟୁ ରସୁଲଗଡ ଆସୁଥିବା ଲୋକଙ୍କ ସାମ୍ନାରେ ଟ୍ରାଫିକ ଭିଡ ଆଉ ରୁଟ ଡାଇଭର୍ସନ ବିବାଦୀୟ ସ୍ଥିତି ସୃଷ୍ଟି କରିଥିଲା । ପ୍ରତିକ୍ରିୟା ମଧ୍ୟ ପ୍ରକାଶ ପାଇଥିଲା । ସାଧାରଣ ଲୋକଙ୍କ କହିବା ଅନୁସାରେ, ଯଦି ପୁଲିସ ଏତେ ସଜାଗ ଥିଲା ତେବେ ପୂର୍ବରୁ ଏବାବଦରେ ଲୋକଙ୍କୁ କାହିଁକି ସଚେତନ କଲାନାହିଁ ? ଚାଷୀ ଆଉ ସରକାରଙ୍କ ଭିତରେ ଚାଲିଥିବା ଟଣାଓଟରାରେ କିନ୍ତୁ ରାଜ୍ୟ ପୁଲିସ ବିଭାଗର ପାରିବା ପଣିଆ ଉପରେ ଆଜି ବଡ ପ୍ରଶ୍ନବାଚୀ ସୃଷ୍ଟି ହେଲା କାରଣ ସ୍ଥିତିର ମୁକାବିଲା କରିବାରେ ଏକ ବିଫଳତା ସାମ୍ନାକୁ ଆସିଲା । ହଜାର ହଜାର ଚାଷୀ ରାଜଧାନୀକୁ ଆସିବେ ବୋଲି ଘୋଷଣା କରିଥିଲେ, ତାକୁ ଆଖି ଆଗରେ ରଖି ପୁଲିସ ପ୍ରଶାସନ ସଜାଗ ହେବାର ଆବଶ୍ୟକତା ନଥିଲା କି? ସାଧାରଣ ଲୋକଙ୍କ ପାଇଁ କାହିଁକି ପୂର୍ବରୁ ଟ୍ରାଫିକ ବାବଦ ସୂଚନା ଜାରି କରାଗଲା ନାହିଁ ?