ସୁପ୍ରିମକୋର୍ଟରେ ମୁମ୍ବାଇ ଗଛ କଟା ମାମଲା। ଆଜି ସ୍ୱତନ୍ତ୍ର ଖଣ୍ଡପୀଠରେ ହେବ ଜରୁରୀ ଶୁଣାଣି
ଗଛ କାଟିବା ଉପରେ ରୋକ ଲଗାଇବାକୁ ଛାତ୍ର ପ୍ରତିନିଧିମଣ୍ଡଳୀଙ୍କ ଆବେଦନ; ସେପଟେ ଗିରଫ ୨୯ ବିକ୍ଷୋଭକାରୀଙ୍କୁ ଛାଡିଲା ମହାରାଷ୍ଟ୍ର ପୁଲିସ
କନକ ବ୍ୟୁରୋ: ସୁପ୍ରିମକୋର୍ଟରେ ମୁମ୍ବାଇ ଆରେ କଲୋନୀର ଗଛ କଟା ମାମଲାର ଶୁଣାଣି ଆଜି ହେବ । ପୂର୍ବାହ୍ନ ୧୦ଟାରେ ସୁପ୍ରିମକୋର୍ଟର ସ୍ୱତନ୍ତ୍ର ଖଣ୍ଡପୀଠ ଏହି ମାମଲାର ଜରୁରୀ ଶୁଣାଣି କରିବ । ଛାତ୍ରଙ୍କ ଏକ ପ୍ରତିନିଧି ଦଳ ଗଛ କଟା ଉପରେ ରୋକ ଲଗାଇବା ପାଇଁ ଚିଫ୍ ଜଷ୍ଟିସ ରଂଜନ ଗୋଗେଇଙ୍କୁ ଚିଠି ଲେଖିଥିଲେ । ଛାତ୍ରଙ୍କ ଆବେଦନ ପରେ ଜରୁରୀ ଶୁଣାଣି ନିଷ୍ପତି ନେଇଛି ସୁପ୍ରିମକୋର୍ଟ । ଛାତ୍ରଙ୍କ ପ୍ରତିନିଧି ଦଳ ଆବେଦନରେ ଦର୍ଶାଇଛନ୍ତି, ଅକ୍ଟୋବର ୪ ତାରିଖରୁ ବେଆଇନ ଭାବେ ଗଛ କଟାଯାଉଛି । ଶାନ୍ତିପୂର୍ଣ୍ଣ ବିରୋଧ ପ୍ରଦର୍ଶନ କରୁଥିବା ବିକ୍ଷୋଭକାରୀଙ୍କୁ ଗିରଫ କରାଯାଉଛି । ତେଣୁ ଘଟଣାର ପ୍ରାଥମିକତାକୁ ଦୃଷ୍ଟିରେ ନେଇ ଜରୁରୀ ଶୁଣାଣି କରିବା ପାଇଁ ଆବେଦନରେ ଅନୁରୋଧ କରାଯାଇଥିଲା ।
Kanak News is now on WhatsApp
Join and get latest news updates delivered to you via WhatsApp
ସେପଟେ ବମ୍ବେ ହାଇକୋର୍ଟ ଆଦେଶ ପରେ ଗତ ଶୁକ୍ରବାର ଠାରୁ ଆରେ କଲୋନୀରେ ଗଛ କଟା ଆରମ୍ଭ ହୋଇଯାଇଥିଲା । ଆଉ ପରିବେଶବିତ, ସାମାଜିକ କର୍ମକର୍ତ୍ତା ଶୁକ୍ରବାର ରାତିରୁ ତୀବ୍ର ବିରୋଧ ଆରମ୍ଭ କରିଦେଇଥିଲେ । ଏହାକୁ ନେଇ ପୁଲିସ ଓ ବିକ୍ଷୋଭକାରୀ ମୁହାଁମହିଁ ହୋଇଥିଲେ । ଏହି ଘଟଣାରେ ଗିରଫ ହୋଇଥିବା ୬ ମହିଳାଙ୍କ ସମେତ ୨୯ ଜଣଙ୍କୁ ଗତକାଲି ଛାଡି ଦେଇଛି ପୁଲିସ । ଆରେ କଲୋନିରେ ଗଛକଟା ବନ୍ଦ ପାଇଁ ହୋଇଥିବା ଆବେଦନକୁ ହାଇକୋର୍ଟ ଖାରଜ କରିବା ପରେ ଶନିବାର ପରିବେଶବିତ୍ ଓ କର୍ମକର୍ତା ପୁଣି ଆବେଦନ କରିଥିଲେ । ଏହାପରେ ହାଇକୋର୍ଟ ଆବେଦନକାରୀଙ୍କୁ ସୁପ୍ରିମକୋର୍ଟ ଯିବାକୁ ପରାମର୍ଶ ଦେଇଥିଲେ । ମେଟ୍ରୋ ଫେଜ୍ ୩ର ସେଡ୍ ତିଆରି କରିବା ପାଇଁ ପ୍ରଶାସନ ଅରେ କଲୋନୀ ଅଂଚଳକୁ ବାଛିଛି । ପ୍ରକଳ୍ପ ପାଇଁ ସେଠାରେ ଥିବା ହଜାର ହଜାର ଗଛ କାଟିବାକୁ ସ୍ଥାନୀୟ ଅଂଚଳର ଲୋକେ ତୀବ୍ର ବିରୋଧ କରୁଛନ୍ତି ।