ବାବୁ ! ଡଙ୍ଗା ନିଅ, ତମେ ଡଙ୍ଗା କିଣିଲେ ଆମ ପରିବାର ଚଳିବ । ଆମ ପାଠପଢା ଖର୍ଚ୍ଚ ହେବ । ଚିତ୍ର ବଖାଣୁଛି ଗରିବୀର କାହାଣୀ…
କନକ ବ୍ୟୁରୋ: ବାପା ଝାଲମୁଢି ବିକୁଛନ୍ତି, ଘର ଚଳାଉଛନ୍ତି । ପିଲା ଛୁଆଙ୍କ ପଢା ଖର୍ଚ୍ଚ ବି ବହନ କରୁଛନ୍ତି । ଆଉ ଏସବୁରେ ବାପାଙ୍କୁ ଟିକେ ସାହାଯ୍ୟ କରିବାକୁ ଡଙ୍ଗା ନେଇ ବଜାରରେ ବିକୁଛନ୍ତି ଦୁଇ ଭଉଣୀ । ଡଙ୍ଗା ବିକିଲେ ବା କେତେ ଟଙ୍କା ହେବ ? ତଥାପି ଯାହାବି ମିଳିବ ସେତିକିରେ ବାପାଙ୍କ କାନ୍ଧର ବୋଝ ତ ଟିକେ ହାଲକା ହେବ । ଅନ୍ତତ ସେମାନେ ସେମାନଙ୍କ ନିଜ ଖର୍ଚ୍ଚ ତ ଉଠାଇପାରିବେ । ଏଇ କଥା ଭାବି ଡଙ୍ଗା ବିକୁଛନ୍ତି ଦୁଇ କୁନି ଝିଅ ।
Kanak News is now on WhatsApp
Join and get latest news updates delivered to you via WhatsApp
ଗରିବ ଘରର ପିଲାମାନେ ଜାଣନ୍ତି ସେମାନଙ୍କ ବାପା କେତେ କଷ୍ଟରେ ପରିବାର ଚଳାନ୍ତି, ବାପାମାଆ ପିଲାଙ୍କୁ ଖୁଆଇ କେତେ ଉପାସ ରୁହନ୍ତି । ସେମାନେ ବି ଭଲରେ ଜାଣନ୍ତି ବାପାଙ୍କ ପାଖରେ ନିଜ ଜାମାପଟା, ଖୁସିହାସି ପାଇଁ ଯେଉଁ ଅଳି ଅଝଟ କରାଯାଏ ତାହା କେତେ ଡେରିରେ ପୂରଣ ହୁଏ ତାଙ୍କ ପରିବାରର ଅଭାବ ପାଇଁ । ଆଉ ସେ ଅଭାବକୁ ଟିକେ କମେଇବାକୁ ବୟସ ହୋଇନଥିଲେ ବି ବାପାଙ୍କ କାନ୍ଧରେ କାନ୍ଧ ମିଳାଇ ପରିବାରକୁ ସାହାଯ୍ୟ କରିବାକୁ ଏ କୁନି ପାଦ ଘରୁ ବାହାରିଛି । ଆଉ ଏ ଡଙ୍ଗା ବିକା ପଇସାରେ ତା ଘରର ସବୁ ଅଭାବକୁ ସେ ଦୂରେଇ ଦେବାର ଆଶା ଜୁଟାଇଛି ଯାହା ଏ ଝିଅର ଛଳଛଳ ଆଖିର ଢଳଢଳ ଜକେଇ ଆସିଥିବା ଲୁହ ଲେଖି ଦେଉଛି ।
ଗାଁ ଗହଳିରେ ପିଲାବେଳେ ଡଙ୍ଗା ତିଆରି ବିକିବାର ସଉକ ସମସ୍ତଙ୍କର ଥାଏ । ଆପଣ ହୁଅନ୍ତୁ କି ମୁଁ ଯେଉଁମାନେ ଗାଁରୁ ଆସିଥିବେ ସେମାନେ ଡଙ୍ଗା ତିଆରି କରି ବଜାରରେ ବିକ୍ରି କରିବାର ମଜା ନେଇଥିବେ । କିନ୍ତୁ ସହର ମଝିରେ, ରାସ୍ତା କଡରେ ବସି ଡଙ୍ଗା ବିକୁଥିବା ଏ ପିଲାମାନେ ସଉକ ପାଇଁ ନୁହେଁ ବରଂ ସମସ୍ୟା ପାଇଁ ଅଭାବ ପାଇଁ ଡଙ୍ଗା ବିକୁଛନ୍ତି ।
କାହା ବାପା ଟ୍ରଲି ଟାଣି ପରିବାର ଚଳାଉଛନ୍ତି ତ ଆଉ କାହା ବାପା ଠେଲା ଲଗାଇ ସେମାନଙ୍କ ଘର ଚଳାଉଛନ୍ତି । ଅଭାବର ଏରୁଣ୍ଡି ବନ୍ଧ ଭିତରେ ପରିବାରର ଅସହାୟତା ଦେଖିଥିବା ପିଲାଏ ଆବଶ୍ୟକତା ପୂରଣ ପାଇଁ ଭଳି କି ଭଳି ଡଙ୍ଗା ବିକ୍ରି କରୁଛନ୍ତି । ଲୋକେ ବି ସେମାନଙ୍କ ଠାରୁ ବୋଇତ କିଣୁଛନ୍ତି ହେଲେ ସେମାନଙ୍କ ଡଙ୍ଗା ବିକ୍ରି ପଛର ବେଦନାକୁ ବୁଝିପାରୁ ନାହାନ୍ତି । ପାଣିରେ ଡଙ୍ଗା ଭାସି ଯିବା ପରି ଏ କୋମଳମତି ଶିଶୁମାନଙ୍କ କଷ୍ଟ ସମୟର ସ୍ରୋତରେ ଭାସିଯାଉ । ଆଉ ସେମାନଙ୍କ ଭବିଷ୍ୟତ ଉଜ୍ଜ୍ୱଳମୟ ହେଉ ।