ଦୁର୍ନୀତିର ଗନ୍ତାଘର ପାଲଟିଛି ରାଜନଗର ବ୍ଲକର କୋଇଲପୁର ପଂଚାୟତ । ପଂଚାୟତ ନିର୍ବାହୀ ଅଧିକାରୀଙ୍କ କ୍ୱାର୍ଟର୍ସ ନିର୍ମାଣ ନକରି ଅନୁଦାନ ଚଳୁ କରି ଦେଇଥିବା ଅଭିଯୋଗ
କନକ ବ୍ୟୁରୋ : କୋଠାଘର ବା ବିଲ୍ଡିଂ ଗାଏବ । କଥାଟା ଅଡୁଆ ଅଡୁଆ ଲାଗୁଥିଲେ ବି କେନ୍ଦ୍ରାପଡା ଜିଲ୍ଲା ରାଜନଗର ବ୍ଲକରେ ଏପରି ଦୁର୍ନୀତି ସମ୍ଭବ ହୋଇପାରୁଛି । ପଂଚାୟତ କାର୍ଯ୍ୟାଳୟ ପରିସରରେ ନିର୍ମାଣ ହୋଇଥିବା ପଂଚାୟତ ନିର୍ବାହୀ ଅଧିକାରୀଙ୍କ କ୍ୱାର୍ଟରର ପତା ମିଳୁନି । ସରକାରୀ ରେକର୍ଡରେ ନୂତନ କୋଠା ପାଇଁ ୬ ଲକ୍ଷ ୨୨ ହଜାର ଟଙ୍କା ଅନୁଦାନ ଆସିଥିବା ସରକାରୀ ତଥ୍ୟରେ ଦର୍ଶା ଯାଇଛି । କିନ୍ତୁ ପ୍ରକୃତରେ ପ୍ରଶ୍ନ ପଂଚାୟତ କାର୍ଯ୍ୟାଳୟ ପରିସର କି ପଂଚାୟତର ଅନ୍ୟ କୌଣସି ସ୍ଥାନରେ ନିର୍ବାହୀ ଅଧିକାରୀଙ୍କ କ୍ୱାର୍ଟରର ଚିହ୍ନବର୍ଣ୍ଣ ନାହିଁ ।
Kanak News is now on WhatsApp
Join and get latest news updates delivered to you via WhatsApp
କୋଇଲିପୁର ପଂଚାୟତ କାର୍ଯ୍ୟାଳୟ ପରିସରରେ ପଂଚାୟତ ନିର୍ବାହୀ ଅଧିକାରୀଙ୍କ କ୍ୱାର୍ଟର ନିର୍ମାଣ ଲାଗି ଷ୍ଟେଟ ଫାଇନାନ୍ସ କମିଶନ ଅର୍ଥରୁ ୬ ଲକ୍ଷ ୫୦ ହଜାର ଟଙ୍କାର ଫାଇଲ ଖୋଲା ଯାଇଛି । ସେଥିରୁ ୬ ଲକ୍ଷ ୨୨ ହଜାର ୮୧ ଟଙ୍କା ଦିଆଯାଇଛି । ପଂଚାୟତ କାର୍ଯ୍ୟାଳୟ ପରିସରରେ ୨୦୦୧ରେ ପଂଚାୟତ ବିଲ୍ଡିଂ ନିର୍ମାଣ ହୋଇଥିଲା । ଏଥିସହ ୨୦୦୩ରେ ଗୋଦାମ ଗୃହ, ୨୦୧୫ରେ ରାଜୀବ ଗାନ୍ଧୀ ସେବା କେନ୍ଦ୍ର ଓ ୨୦୧୯ରେ ରାଜୀବ ଗାନ୍ଧୀ ସେବା କେନ୍ଦ୍ର ଗୃହ ଉପରେ ପଂଚାୟତ ସଭାଗୃହ ନିର୍ମାଣ ହୋଇଛି । ହେଲେ ନିର୍ବାହୀ ଅଧିକାରୀଙ୍କ କ୍ୱାର୍ଟରର ପତା ମିଳୁନି । ଏନେଇ ରାଜନଗର ବିଡିଓ ତଦନ୍ତ କରି ସମ୍ପୃକ୍ତ ଫାଇଲକୁ ଜବତ କରିଛନ୍ତି । ତୁରନ୍ତ ଏସଂପର୍କରେ ଗ୍ରାମ ଉନ୍ନୟନ ସଂସ୍ଥାର ପ୍ରକଳ୍ପ ନିର୍ଦ୍ଦେଶକଙ୍କୁ ଜଣାଇ କାର୍ଯ୍ୟାନୁଷ୍ଠାନ ନିଆଯିବ ବୋଲି କହିଛନ୍ତି ।
ସରକାରୀ କର୍ମଚାରୀଙ୍କ ରହିବା ପାଇଁ ନିର୍ମାଣ ହୋଇଥିବା କ୍ୱାର୍ଟର କେଉଁଆଡେ ଉଭାନ ହୋଇଗଲା, ତାହାକୁ ନେଇ ଏବେ ଉଠିଛି ପ୍ରଶ୍ନ ।