କନକ ବ୍ୟୁରୋ: କନ୍ୟାକୁମାରୀରୁ ଆରମ୍ଭ ହୋଇଥିବା କଂଗ୍ରେସର ଭାରତ ଯୋଡ ଯାତ୍ରା ଏବେ ଜମ୍ମୁ-କାଶ୍ମୀରରେ ପହଁଚିଛି । ଆଉ ଏଠାରେ ବି ନିଜ ସମର୍ଥକଙ୍କୁ ନେଇ ଯାତ୍ରା କରିଛନ୍ତି ରାହୁଲ ଗାନ୍ଧୀ । ପ୍ରବଳ ଥଣ୍ଡା ସତ୍ୱେ ରାହୁଲ ଗାନ୍ଧୀ ଏଠାରେ ବି ଟି-ସାର୍ଟରେ ନଜର ଆସିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
କଂଗ୍ରେସ ନେତା ରାହୁଲ ଗାନ୍ଧୀ ପ୍ରଥମ ଥର ଭାରତ ଯୋଡ ଯାତ୍ରାରେ ରେନ୍ କୋଟ୍ ପିନ୍ଧିଥିବାର ନଜର ଆସିଛନ୍ତି । ଶୁକ୍ରବାର ଜମ୍ମୁ-କାଶ୍ମୀର କାଠୁଆ ଜିଲ୍ଲାରେ ରାହୁଲ ଗାନ୍ଧୀ ନିଜ ସମର୍ଥକଙ୍କୁ ନେଇ ଭାରତ ଯୋଡ ଯାତ୍ରା କରିଥିଲେ । ଏହି ସମୟରେ ବର୍ଷା ହୋଇଥିବାରୁ ପ୍ରଥମ ଥର ରେନ୍ କୋଟ୍ ପିନ୍ଧି ଯାତ୍ରା କରିବାର ନଜର ଆସିଥିଲେ ରାହୁଲ । ତେବେ ବର୍ଷା ଶେଷ ହେବା ପରେ ତୁରନ୍ତ ହିଁ ରେନ୍ କୋଟ୍ ଖୋଲି ଦେଇଥିଲେ । ତେବେ ଭାରତର ସବୁଠାରୁ ଥଣ୍ଡା ସ୍ଥାନ ଭାବେ ଜଣା ଯାଉଥିବା ଜମ୍ମୁ-କାଶ୍ମୀରରେ ବି ରାହୁଲଙ୍କୁ କିଭଳି ଥଣ୍ଡା ଲାଗୁ ନାହିଁ ଏହାକୁ ନେଇ ଚର୍ଚ୍ଚା ଆରମ୍ଭ ହୋଇ ଯାଇଛି ।
ଶୀତ ରୁତୁରେ ଭାରତ ଯୋଡ ଯାତ୍ରା ସମୟରେ ରାହୁଲ ଗାନ୍ଧୀ ଟି-ସାର୍ଟ ପିନ୍ଧିବାକୁ ନେଇ ଅନେକ ଚର୍ଚ୍ଚା, ଆଲୋଚନା ହେଉଛି । ରାହୁଲଙ୍କୁ କିପରି ଥଣ୍ଡା ଲାଗୁନି ଏହାକୁ ନେଇ ଅନେକ କଟାକ୍ଷ କରିବାକୁ ପଛାଇ ନାହାଁନ୍ତି ବିଜେପି ନେତା । ହେଲେ ରାହୁଲ ନିଜର ଏହି ଷ୍ଟାଇଲ୍ କାୟମ୍ ରଖିଛନ୍ତି ।
ଗୁରୁବାର ଜମ୍ମୁ-କାଶ୍ମୀରରେ ଏଂଟ୍ରି କରିଛି ଭାରତ ଯୋଡ ଯାତ୍ରା । ଏଥିରେ ରାହୁଲଙ୍କୁ ମଶାଲ ଧରି ସମର୍ଥକଙ୍କ ସହ ରାଲି କରୁଥିବା ଦେଖିବାକୁ ମିଳିଥିଲା । ସେପଟେ ଶୁକ୍ରବରା ଉଦ୍ଧବ ଠାକରେ ଗୋଷ୍ଠିର ଶିବସେନା ସାଂସଦ ସଂଜୟ ରାଉତ ଭାରତ ଯୋଡ ଯାତ୍ରାରେ ଯୋଡି ହୋଇଛନ୍ତି । ତାଙ୍କ ସହ କାନ୍ଧରେ କାନ୍ଧ ମିଶାଇ ଯାତ୍ରା କରିଛନ୍ତି ରାହୁଲ ।
୭ ସେପ୍ଟେମ୍ବର ୨୦୨୨ରେ ତାମିଲନାଡୁ କନ୍ୟାକୁମାରୀରୁ ଆରମ୍ଭ ହୋଇଥିଲା କଂଗ୍ରେସର ଭାରତ ଯୋଡ ଯାତ୍ରା । ୧୯ ଜାନୁଆରୀରେ ଏହି ଯାତ୍ରା ଜମ୍ମୁ-କାଶ୍ମୀରରେ ପ୍ରବେଶ କରିଛି । ୧୨୫ ଦିନରେ ରାହୁଲ ଗାନ୍ଧୀ ୧୩ଟି ରାଜ୍ୟ ଦେଇ ଯାତ୍ରା କରିଛନ୍ତି । ଜମ୍ମୁ-କାଶ୍ମୀରରେ ୯ ଦିନ ଧରି ଏହି ଯାତ୍ରା ହେବ । ଆଉ ୩୦ ଜାନୁଆରୀରେ ଶେଷ ହେବ ଭାରତ ଯୋଡ ଯାତ୍ରା । ଏଥିପାଇଁ ୨୧ଟି ରାଜନୈତିକ ଦଳର ପ୍ରମୁଖ ନେତାଙ୍କୁ ନିମନ୍ତ୍ରଣ କରାଯାଇଛି ।