ଲାଞ୍ଚ କାରବାରର ଗୁମର ଖୋଲିଲେ ଆଦିବାସୀ ମହିଳା : ଅତିରିକ୍ତ ଜିଲ୍ଲାପାଳଙ୍କୁ ଡଙ୍ଗରିଆ ମହିଳାଙ୍କ ପ୍ରଶ୍ନ, ବାବୁ ଟଙ୍କା ପଠାଇଥିଲି, ତତେ ମିଳିଲା କି?
କନକ ବ୍ୟୁରୋ : ଆଦିମ ଜନଜାତି ଡଙ୍ଗରିଆ କନ୍ଧଙ୍କ ପାଇଁ ସରକାର ଅନେକ ଯୋଜନା କରୁଛନ୍ତି । ଏହି ଜନଜାତିର ଉତଥାନ ପାଇଁ ସରକାରଙ୍କ ଏକାଧିକ ସଂସ୍ଥା କାର୍ଯ୍ୟ କରୁଛି । କିନ୍ତୁ ବାସ୍ତବରେ ସେମାନେ ସୁବିଧା ପାଉଛନ୍ତି କି ନାହିଁ ତାର ତଦାରଖ କରାଯାଉନି । ଫଳରେ ଗରିବ ଲୋକଟି ବହୁ ଅସୁବିଧାର ସାମ୍ନା କରୁଛି । କିପରି ଏହି ଜନଜାତିଙ୍କୁ ଶୋଷଣ କରାଯାଉଛି ତାହାକୁ ସାମ୍ନାକୁ ଆଣିଛନ୍ତି ଡଙ୍ଗରିଆ କନ୍ଧ ମହିଳା ଚାଷୀ ଟିମି ପୁଷିକା ।
Kanak News is now on WhatsApp
Join and get latest news updates delivered to you via WhatsApp
ଆଉ ସେ ପ୍ରଶାସନକୁ ଦେଇଥିବା ଲାଂଚ ଟଙ୍କା ମିଳିଲା ନା ନାହିଁ ସିଧାସଳଖ ଅତିରିକ୍ତ ଜିଲ୍ଲାପାଳଙ୍କୁ ପ୍ରଶ୍ନ କରିଛନ୍ତି ଟିମି । ଯାହା ଶୁଣି ଅଧିକାରୀ ପ୍ରଥମେ ସ୍ତବ୍ଧ ହୋଇଯାଇଥିଲେ । କିନ୍ତୁ ପରେ ଦୁର୍ନୀତିର ପେଡି ଖୋଲିଥିଲେ ମହିଳା । ସୂଚନା ମୁତବାକ, ରାୟଗଡ଼ା ନିୟମଗିରି ପାହାଡରେ ବସବାସ କରନ୍ତି ଟିମି । ଜନଜାତି ମହିଳାଙ୍କୁ ସ୍ୱାବଲମ୍ବୀ କରିବା ଉଦେଶ୍ୟରେ ସରକାରଙ୍କ ତରଫରୁ ୨୭ ହଜାର ଟଙ୍କା ତାଙ୍କୁ ମିଳିଥିଲା । ଡିକେଡିଏ ଅଧିନରେ କାର୍ଯ୍ୟ କରୁଥିବା ଓଡ଼ିଶା ଜନଜାତି ସଶକ୍ତିକରଣ ଓ ଜୀବୀକା ଉନ୍ନତିକରଣ(ଓପିଲିପି) ପକ୍ଷରୁ ଏହି ଟଙ୍କା ଦିଆଯାଇଥିଲା ।
ଟିମିଙ୍କ ଆକାଉଂଟକୁ ଟଙ୍କା ଆସିବା ପରେ ଓପିଲିପିର ଦୁଇ ଜଣ ଅଧିକାରୀ ତାଙ୍କ ପାଖରେ ପହଂଚିଥିଲେ । ବ୍ୟବସାୟ କରିବା ପାଇଁ ଟିମିଙ୍କୁ ଡିଜିଟାଲ ନିକିତି, ସାଇକେଲ, ପ୍ଲାଷ୍ଟିକ ଚୌକି ଦେଇ ୧୪ ହଜାର ୨୦୦ ଟଙ୍କା ତାଙ୍କ ଠୁ ନେଇ ଯାଇଥିଲେ । ଏହା ପରେ ଲାଂଚ ବାବଦକୁ ୬ ହଜାର ୫୦୦ ଟଙ୍କା ତାଙ୍କ ଠାରୁ ନେଇଥିଲେ । ଏବଂ ଏହି ଟଙ୍କା ଅଧିକାରୀଙ୍କୁ ଦେବେ ବୋଲି କହିଥିଲେ । ସରଳତାର ସୁଯୋଗ ନେଇ ଓପିଲିପି ଅଧିକାରୀ ତାଙ୍କଠୁ ଟଙ୍କା ନେଇଯାଇଥିବା ଜାଣିବା ପରେ ଟିମି ପ୍ରଥମେ ଜିଲ୍ଲାପାଳଙ୍କୁ ଭେଟି ଏସମ୍ପର୍କରେ ପଚାରିବାକୁ ଯାଇଥିଲେ । କିନ୍ତୁ ଜିଲ୍ଲାପାଳନ ଥିବାରୁ ଅତିରିକ୍ତ ଜିଲ୍ଲାପାଳଙ୍କୁ ପ୍ରଶ୍ନ କରିଥିଲେ । ତେବେ ଘଟଣା ସାମ୍ନାକୁ ଆସିବା ପରେ ଜଣେ ଅଧିକାରୀ ତାଙ୍କଠୁ ନେଇଥିବା ଟଙ୍କା ଫେରାଇଥିବା ସୂଚନା ମଳିଛି ।