ଷ୍ଟେଜରେ ଚାଲୁନଥିଲା ଏସି, ଭିତରେ ଥିଲା ପ୍ରବଳ ଭିଡ । ବଲିଉଡର ଲୋକପ୍ରିୟ ଗାୟକ କେକେଙ୍କ ମୃତ୍ୟୁକୁ ନେଇ ଉଠିଲା ଅନେକ ପ୍ରଶ୍ନ, ଆୟୋଜକଙ୍କୁ ପଚରାଉଚରା କରୁଛି ପୋଲିସ ।
କନକ ବ୍ୟୁରୋ : ବଲିଉଡର ଲୋକପ୍ରିୟ କଣ୍ଠଶିଳ୍ପୀ କେକେଙ୍କ ଅକାଳ ବିୟୋଗ ସଭିଁଙ୍କୁ ଯେତିକି ମର୍ମାହତ କରିଛି, ସେତିକି ଚକିତ କରିଛି । ମଙ୍ଗଳବାର କୋଲକାତାରେ ସଙ୍ଗୀତ ପରିବେଷଣ ବେଳେ ହଠାତ୍ ଅସୁସ୍ଥ ଅନୁଭବ କରିଥିଲେ କେକେ । ପରେ ଡାକ୍ତରଖାନାରେ ତାଙ୍କୁ ମୃତ ବୋଲି ଘୋଷଣା କରାଯାଇଥିଲା । ଆଶ୍ଚର୍ଯ୍ୟର କଥା କେକେଙ୍କୁ ପୂର୍ବରୁ ସେଭଳି କୌଣସି ରୋଗ ନଥିଲା । ଆଉ ସେ ସବୁବେଳେ ନିଜ ସ୍ୱାସ୍ଥ୍ୟକୁ ପ୍ରାଧାନ୍ୟ ଦେଉଥିଲେ । ନିୟମିତ ଯୋଗ, ବ୍ୟାୟାମ୍ କରୁଥିଲେ । ତଥାପି ଅସ୍ୱାଭାବିକ୍ ଭାବେ ତାଙ୍କର ମୃତ୍ୟୁ ହୋଇଛି । ଷ୍ଟେଜ୍ ଉପରେ ନିଜର ସୁପରହିଟ୍ ଗୀତ ହମ ରହେଁ ନା ରହେଁ କଲ.. ଗାଇବା ପରେ ପରେ ହିଁ ଅସୁସ୍ଥ ହୋଇଯାଇଥିଲେ କେକେ । ଆଉ ତାଙ୍କର ଏହି ଗୀତ ଶେଷ ଗୀତ ହୋଇ ରହିଗଲା । ଯେଉଁ ଷ୍ଟେଜ୍ ତାଙ୍କ ପାଇଁ ଲୋକପ୍ରିୟତା ଆଣି ଦେଇଥିଲା ସେହି ଷ୍ଟେଜରେ ହିଁ ତାଙ୍କ ଜୀବନର ପୂର୍ଣ୍ଣଚ୍ଛେଦ ପଡିଗଲା । ୧୯୯୯ର ଫିଲ୍ମ ହମ ଦିଲ ଦେ ଚୁକେ ସନମରେ ସ୍ଥାନ ପାଇଥିବା ସୁପରହିଟ୍ ଗୀତ ତଡପ ତଡପ କେ.. ଗୀତ କେକେଙ୍କୁ ବଲିଉଡରେ ପରିଚିତ କରାଇଥିଲା । ଏହାପରେ ସଚ୍ କେହ ରାହା ହୈ ଦିବାନା, ପଲ୍, ଜରା ସା ଦିଲ ମୈଁ ଦେ ଜଗା, ଦିଲ ଇବାଦତ୍, ଜିନ୍ଦେଗି ଦୋ ପଲ କି.. ଏଭଳି ଅନେକ ମନଛୁଆଁ ଗୀତ ଭେଟି ଦେଇଛନ୍ତି କେକେ । ଯାହା ସ୍ମୃତି ହୋଇ ସବୁଦିନ ପାଇଁ ରହିଯାଇଛି ।
Kanak News is now on WhatsApp
Join and get latest news updates delivered to you via WhatsApp
କୋଲକାତାରେ ଏକ ଷ୍ଟେଜ ସୋ ସମୟରେ ହଠାତ ଅସୁସ୍ଥ ଅନୁଭବ କରୁଥିବା ବିଶିଷ୍ଟ ବଲିଉଡ୍ ଗାୟକ କେକେଙ୍କୁ ଧରି ଧରି ନିଆ ଯାଉଥିବାର ଏହି ଦୃଶ୍ୟ ଚାରିଆଡେ ଭାଇରାଲ ହୋଇଛି । ହଠାତ ତାଙ୍କ ଦେହରୁ ଝାଳ ବାହାରିଲା, ଓ ସେ ଅସହଜ ମନେ କରୁଥିବା ନେଇ ଆୟୋଜକଙ୍କୁ ଜଣାଇଥିଲେ । ତୁରନ୍ତ ସୋ ବନ୍ଦ କରି ସେ ଚାଲି ବି ଆସିଲେ । ଏହାପରେ ତାଙ୍କୁ ସିଧା ହସପିଟାଲ ନିଆଯାଇଥିଲା । ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ ।
ହମ ରହେଁ ୟା ନାଁ ରହେଁ କଲ୍, ଏଇ ଗୀତ ପରେ ସବୁଦିନ ପାଇଁ ନୀରବି ଗଲେ ଗାୟକ କେକେ । ଏହି ସୁପରହିଟ ଗୀତ ଯେ ତାଙ୍କ ଜୀବନର ଶେଷ ଗୀତ ହେବ ଏହା କେହି ବିଶ୍ୱାସ କରିନଥିଲେ । ଜୀବନର ଶେଷ ଷ୍ଟେଜ ସୋ’ରେ ତାଙ୍କର ପ୍ରସିଦ୍ଧ ଗୀତ ପଲ୍ ଗାଇ ଦର୍ଶକଙ୍କ ମନମୋହି ନେଇଥିଲେ । ଆଉ ଏହାପରେ ସବୁଦିନ ପାଇଁ ନୀରବ ଯାଇଥିଲେ ସମସ୍ତଙ୍କ ପ୍ରିୟ କେକେ । ଏହାପରେ ଆଉ ଶୁଭିବନି କେକେଙ୍କ ଦମଦାର ଭଏସ । ତାଙ୍କ ଗୀତରେ ଆଉ ଦୁଲୁକିବନି ମଂଚ କି ଝୁମିବେନି ଦର୍ଶକ ।
ଲାଇଭ କନସର୍ଟରେ କୋଲକାତାର ଦର୍ଶକଙ୍କୁ ମସଗୁଲ କରିଦେଇଥିଲେ କେକେ । ତୁ ଆଶିକି ହେ, କ୍ୟା ମୁଝେ ପ୍ୟାର ହେ ଗୀତଠାରୁ ଆରମ୍ଭ କରି ଶେଷରେ ହମ ରହେଁ ୟା ନାଁ ରହେଁ କଲ୍ ଗୀତ ଗାଇଥିଲେ କେକେ ।
ବଲିଉଡ ସିଙ୍ଗର କ୍ରିଷ୍ଣକୁମାର କୁନ୍ନଥ, ପ୍ରଶଂସକଙ୍କ ମଧ୍ୟରେ କେକେ ନାଁରେ ପରିଚିତ । ମଙ୍ଗଳବାର ଦିନ କୋଲକାତାରେ ଷ୍ଟେଜ ସୋ’ ପରେ ତାଙ୍କ ସ୍ୱାସ୍ଥ୍ୟ ବିଗିଡି ଯାଇଥିଲା ଏବଂ ତାଙ୍କର ମୃତ୍ୟୁ ହୋଇଥିଲା । ତାଙ୍କ ମୃତ୍ୟୁ ଘଟଣାରେ ଆୟୋଜକକୁ ପଚରାଉଚରା କରୁଛି କୋଲକାତା ପୋଲିସ । ସେ ରହିଥିବା ହୋଟେଲରେ ଫରେନସିକ୍ ଟିମ୍ ପହଂଚି ତଦନ୍ତ କରିଛି । ଏସଏସକେଏମ୍ ହସ୍ପିଟାଲରେ ତାଙ୍କ ପୋଷ୍ଟମର୍ଟମ କରାଯିବା ଶବ ପରିବାର ଲୋକଙ୍କୁ ହସ୍ତାନ୍ତର କରାଯାଇଛି ।