ରାଜସ୍ଥାନରେ ନୂଆ ରେକର୍ଡ ! ଗୋଟିଏ ଦିନରେ ୯୫୦୦ ପ୍ରକଳ୍ପର ଶୁଭାରମ୍ଭ କରିବେ ପ୍ରଧାନମନ୍ତ୍ରୀ
କନକ ବ୍ୟୁରୋ : ଆଗାମୀ ୨୯ ତାରିଖ ଦିନ ରାଜସ୍ଥାନ ସରକାର ନୂଆ ରେକର୍ଡ କରିବାକୁ ଯାଉଛନ୍ତି । ଏହିଦିନ ରାଜ୍ୟରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଜାତୀୟ ରାଜପଥ ସମେତ ମୋଟ୍ ୯ହଜାର ୫ଶହ ପ୍ରକଳ୍ପର ଶୁଭାରମ୍ଭ କରିବେ । ୯ହଜାର ୫ଶହ ପ୍ରକଳ୍ପ ପାଇଁ ରାଜସ୍ଥାନ ସରକାର ୨୭ ହଜାର କୋଟି ଟଙ୍କାର ବ୍ୟୟ ବରାଦ କରିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ମିଳିଥିବା ସୂଚନା ଅନୁଯାୟୀ, ଆସନ୍ତା ସପ୍ତାହରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଉଦୟପୁର ଗସ୍ତ କରି କେତେକ ପ୍ରକଳ୍ପର ଶିଳାନ୍ୟାସ ସହିତ କେତେକ ପ୍ରକଳ୍ପକୁ ଲୋକାର୍ପିତ କରିବେ । ମୋଦିଙ୍କ ସହିତ ସଡ଼କ ଓ ପରିବହନ ମନ୍ତ୍ରୀ ନୀତିନ ଗଡ଼କରୀ ଓ ରାଜସ୍ଥାନ ମୁଖ୍ୟମନ୍ତ୍ରୀ ବସୁନ୍ଧରା ରାଜେ ସିନ୍ଧିଆ ମଧ୍ୟ ଏହି ସମସ୍ତ କାର୍ୟ୍ୟକ୍ରମରେ ଯୋଗ ଦେବେ ।
ମିଳିଥିବା ସୂଚନା ଅନୁଯାୟୀ, ଜାତୀୟ ରାଜପଥ ପ୍ରାଧିକରଣ ଓ ସଡ଼କ ପରିବହନ ମନ୍ତ୍ରଣାଳୟ ରାଜ୍ୟରେ ୧୦୯ଟି ପ୍ରକଳ୍ପର ୩ ହଜାର କିଲୋମିଟର ପାଇଁ ଆର୍ଥିକ ସହାୟତା ଯୋଗାଇ ଦେବେ । ଏଥିପାଇଁ ୧୫ ହଜାରେ କୋଟି ଟଙ୍କା ବ୍ୟୟ କରାଯିବ । ପ୍ରଧାନମନ୍ତ୍ରୀ ଶ୍ରୀ ମୋଦି ୨୯ ତାରିଖ ଦିନ ୧୧ଟି ସମ୍ପୂର୍ଣ୍ଣ ହୋଇଥିବା ପ୍ରକଳ୍ପ( ୮୭୩ କିଲୋମିଟର ଜାତୀୟ ରାଜପଥ) ସହିତ କୋଟାର ଚମ୍ବଲ ନଦୀ ଉପରେ ନିର୍ମିତ ପୋଲକୁ ଉଦ୍ଘାଟନ କରିବେ ।
ଏତଦ୍ ବ୍ୟତୀତ ପ୍ରଧାନ ମନ୍ତ୍ରୀ ଶ୍ରୀ ମୋଦି ବିଶାଳ ସାଧାରଣ ସଭାରେ ଉଦ୍ବୋଧନ ଦେବେ ଓ ଏହାର ସିଧା ପ୍ରସାରଣ ପାଇଁ ମଧ୍ୟ ବ୍ୟବସ୍ଥା କରାଯାଇଛି । ଆଗାମୀ ଏକ ବର୍ଷ ପରେ ରାଜସ୍ଥାନରେ ବିଧାନସଭା ନିର୍ବାଚନ ହେବାକୁ ଥିବାରୁ ଏହି ୯୫୦୦ ପ୍ରକଳ୍ପର ଶୁଭାରମ୍ଭ ରାଜନୈତିକ ଦୃଷ୍ଟି କୋଣରୁ ବେଶ୍ ଗୁରୁତ୍ୱପୂର୍ଣ୍ଣ ବୋଲି ଚର୍ଚ୍ଚା ହେଉଛି ।